ഒട്ടാവ: കാനഡയിലെ മൊബൈൽ ഫോൺ, ഇന്റർനെറ്റ് സേവന മേഖലകളിൽ ഉപഭോക്താക്കൾക്ക് കൂടുതൽ ഇളവുകൾ പ്രഖ്യാപിച്ച് കനേഡിയൻ റേഡിയോ-ടെലിവിഷൻ ആൻഡ് ടെലികമ്മ്യൂണിക്കേഷൻ കമ്മീഷൻ (CRTC). വരും മാസങ്ങളിൽ പ്രാബല്യത്തിൽ വരുന്ന പുതിയ നിയമപ്രകാരം, പ്ലാനുകൾ മാറ്റുന്നതിനും സേവനങ്ങൾ റദ്ദാക്കുന്നതിനും നിലവിൽ ഈടാക്കുന്ന ഭീമമായ ഫീസുകൾ പൂർണ്ണമായും ഒഴിവാക്കാനാണ് തീരുമാനം. 2026 ജൂൺ 12 മുതലാണ് പുതിയ പരിഷ്കാരങ്ങൾ രാജ്യവ്യാപകമായി നടപ്പിലാകുന്നത്.
പുതിയ പ്ലാനുകൾ ആക്ടിവേറ്റ് ചെയ്യുമ്പോഴും നിലവിലുള്ളവ അപ്ഗ്രേഡ് ചെയ്യുമ്പോഴും ഉപഭോക്താക്കൾ നൽകേണ്ടി വന്നിരുന്ന $30 മുതൽ $80 വരെയുള്ള അധിക ചിലവുകൾ ഇതോടെ ഇല്ലാതാകും. കൂടാതെ, കരാറുകൾ കാലാവധിക്ക് മുൻപ് അവസാനിപ്പിക്കുമ്പോൾ ഈടാക്കിയിരുന്ന പിഴയും ഇനി മുതൽ കമ്പനികൾക്ക് ഈടാക്കാനാവില്ല. എന്നാൽ വീടുകളിൽ നേരിട്ടെത്തിയുള്ള ഇൻസ്റ്റലേഷൻ ചാർജുകൾക്കും അധിക സേവനങ്ങൾക്കും നിയന്ത്രണങ്ങൾക്ക് വിധേയമായി നിരക്ക് ഈടാക്കാവുന്നതാണ്.
ഉപഭോക്താക്കൾക്ക് കൂടുതൽ ലാഭകരമായ പ്ലാനുകൾ എളുപ്പത്തിൽ തിരഞ്ഞെടുക്കാനും ടെലികോം കമ്പനികൾ തമ്മിലുള്ള മത്സരം വർധിപ്പിച്ച് ജനങ്ങൾക്ക് മെച്ചപ്പെട്ട സേവനം ലഭ്യമാക്കാനുമാണ് ഈ മാറ്റമെന്ന് സി.ആർ.ടി.സി അറിയിച്ചു. പ്ലാൻ മാറ്റുന്നതിലെ സാമ്പത്തിക തടസ്സങ്ങൾ ഒഴിവാക്കുന്നതിലൂടെ സാധാരണക്കാരായ ഉപഭോക്താക്കൾക്കും ചെറുകിട ബിസിനസ് സ്ഥാപനങ്ങൾക്കും വലിയ ലാഭം ലഭിക്കുമെന്നാണ് വിലയിരുത്തൽ. റോജേഴ്സ് കമ്മ്യൂണിക്കേഷൻസ്, ബെൽ കാനഡ, ടെലസ് തുടങ്ങിയ പ്രമുഖ ടെലികോം കമ്പനികൾക്കും അവയുടെ ഉപബ്രാന്റുകൾക്കും പുതിയ നിയമം ബാധകമായിരിക്കും.
2024 നവംബറിൽ ആരംഭിച്ച പൊതുചർച്ചകൾക്കും പഠനങ്ങൾക്കും ഒടുവിലാണ് നിർണ്ണായകമായ ഈ ഭേദഗതി കൊണ്ടുവരുന്നത്. വരും കാലങ്ങളിൽ പ്ലാനുകൾ എളുപ്പത്തിൽ താരതമ്യം ചെയ്യാനുള്ള സൗകര്യവും, ഓഫറുകൾ അവസാനിക്കുന്നത് സംബന്ധിച്ച മുൻകൂർ അറിയിപ്പുകളും നിർബന്ധമാക്കാൻ കമ്മീഷൻ ആലോചിക്കുന്നുണ്ട്. പുതിയ നിയമം ലംഘിച്ച് ഏതെങ്കിലും കമ്പനികൾ ഫീസ് ഈടാക്കിയാൽ ഉപഭോക്താക്കൾക്ക് പരാതി നൽകാനായി പ്രത്യേക സംവിധാനവും ഒരുക്കിയിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Now you can switch to your preferred plan for free: Major reform in telecom laws in Canada; Effective from June 12
