ഹോക്കി കിറ്റുകൾ നഷ്ടമായി, മടങ്ങാനൊരുങ്ങിയ ടീമിന് കൈത്താങ്ങായി കോൾ ഹാർബർ; പ്രതിസന്ധിയെ തോൽപ്പിച്ച് ഐസ് ഹോക്കിയിൽ കിരീടം ചൂടി കൊച്ചുതാരങ്ങൾ

ഹാളിഫാക്സ്: കാനഡയിലെ വിഖ്യാത ഹോക്കി താരങ്ങളായ സിഡ്നി ക്രോസ്ബിയുടെയും നഥാൻ മക്കിന്നന്റെയും വളർച്ചയ്ക്ക് സാക്ഷ്യം വഹിച്ച മൈതാനമാണ് നോവ സ്കോഷ്യയയിലെ കോൾ ഹാർബർ. അവിടെ ഇത്തവണ നടന്ന ‘ജോ ലാമോണ്ടെയ്ൻ മെമ്മോറിയൽ ഹോക്കി ടൂർണമെന്റിൽ’ കളിക്കാർക്കിടയിൽ മാത്രമല്ല, ഗാലറിയിലും ആവേശം നിറഞ്ഞുനിന്നു. എന്നാൽ ഈ ആവേശം കളിക്കളത്തിലെ പ്രകടനം കൊണ്ട് മാത്രമായിരുന്നില്ല, മറിച്ച് ഒരു നാട് മുഴുവൻ പകർന്നുനൽകിയ സ്നേഹത്തിന്റെയും ഒത്തൊരുമയുടേയും ഫലമായിരുന്നു.

ന്യൂഫൗണ്ട്‌ലാൻഡ് ആൻഡ് ലാബ്രഡോറിൽ നിന്ന് ടൂർണമെന്റിൽ പങ്കെടുക്കാനെത്തിയ മൂന്ന് ടീമുകൾ ഹാളിഫാക്സ് സ്റ്റാൻഫീൽഡ് ഇന്റർനാഷണൽ എയർപോർട്ടിൽ ഇറങ്ങിയപ്പോൾ നേരിട്ടത് വലിയൊരു പ്രതിസന്ധിയായിരുന്നു. വിമാനമിറങ്ങി ലഗേജ് ഏരിയയിൽ എത്തിയപ്പോഴാണ് തങ്ങളുടെ ഹോക്കി ഗിയറുകൾ (കളി ഉപകരണങ്ങൾ) അടങ്ങിയ ബാഗുകൾ ന്യൂഫൗണ്ട്‌ലാൻഡിൽ തന്നെ മറന്നുവെച്ച വിവരം അവർ അറിയുന്നത്. അണ്ടർ-11 വിഭാഗത്തിൽ മത്സരിക്കാനെത്തിയ സെന്റ് ജോൺസ് ‘ക്യാപ്‌സ്’ ടീമിലെ കുട്ടികൾ ഇതോടെ തീർത്തും നിരാശരായി. കളിക്കാനുള്ള ഉപകരണങ്ങളില്ലാതെ നാട്ടിലേക്ക് മടങ്ങേണ്ടി വരുമെന്ന അവസ്ഥയിലായിരുന്നു താരങ്ങളും പരിശീലകരും.

ടീമിന്റെ അവസ്ഥ മനസ്സിലാക്കിയ ടൂർണമെന്റ് സംഘാടകർ ഒട്ടും വൈകിയില്ല. ടൂർണമെന്റ് ചെയർമാൻ ജെഫ് മക്ഫീയുടെ നേതൃത്വത്തിൽ സോഷ്യൽ മീഡിയ വഴി സഹായം അഭ്യർത്ഥിച്ചു. നിമിഷങ്ങൾക്കകം കോൾ ഹാർബർ നിവാസികൾ ആ വിളിക്ക് മറുപടി നൽകി. മണിക്കൂറുകൾക്കുള്ളിൽ സ്പോർട്സ് കോംപ്ലക്സിലെ മൾട്ടി പർപ്പസ് റൂം ഹോക്കി ഉപകരണങ്ങളാൽ നിറഞ്ഞു. പ്രാദേശിക ബിസിനസ് സ്ഥാപനങ്ങളും വ്യക്തികളും മത്സരിച്ചാണ് സഹായവുമായെത്തിയത്. ഏകദേശം 25 കുട്ടികൾക്ക് ആവശ്യമായ എല്ലാ സാമഗ്രികളും ഇതിനോടകം സമാഹരിക്കപ്പെട്ടു.

അപരിചിതരായ ഒരു ജനത കാട്ടിയ ഈ വലിയ മനസ്സ് ടീമിന് നൽകിയ ആത്മവിശ്വാസം ചെറുതല്ല. കടം വാങ്ങിയ ഉപകരണങ്ങളുമായി കളിക്കളത്തിലിറങ്ങിയ അണ്ടർ-11 ക്യാപ്‌സ് ടീം തങ്ങളുടെ വിഭാഗത്തിൽ ചാമ്പ്യന്മാരായിക്കൊണ്ടാണ് മറുപടി നൽകിയത്. “തളർന്നുപോയ കുട്ടികൾക്ക് ആ നിമിഷം സ്പെഷ്യൽ ആക്കി മാറ്റാൻ ഒരു നാട് മുഴുവൻ കൂടെ നിന്നു,” എന്ന് ടീം ഹെഡ് കോച്ച് സ്റ്റീവ് ബാൺസ് പറഞ്ഞു. ഇതൊരു സ്വർണ്ണ മെഡൽ വിജയത്തേക്കാൾ മൂല്യമുള്ള അനുഭവമാണെന്നും അദ്ദേഹം കൂട്ടിച്ചേർത്തു.

മത്സരത്തിനപ്പുറം കായിക ലോകത്തെ മാനുഷിക മൂല്യങ്ങളുടെയും ഒത്തൊരുമയുടെയും ഉദാഹരണമായി മാറിയിരിക്കുകയാണ് കോൾ ഹാർബറിലെ ഈ സംഭവം. പ്രതിസന്ധി ഘട്ടങ്ങളിൽ തളരാതെ കൈപിടിച്ചുയർത്താൻ ഒരു കായിക സമൂഹം കൂടെയുണ്ടെന്ന സന്ദേശമാണ് ഇത് ലോകത്തിന് നൽകുന്നത്.

nova-scotia-community-rallies-to-support-newfoundland-hockey-players-who-lost-their-gear

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt