നോവ സ്കോഷ്യ ബജറ്റ് വെട്ടിക്കുറയ്ക്കൽ; ചാരിറ്റി സ്ഥാപനങ്ങൾ പ്രതിസന്ധിയിൽ

ഹാലിഫാക്സ്: നോവ സ്കോഷ്യ സർക്കാരിന്റെ പുതിയ ബജറ്റിൽ സാമൂഹിക സേവന മേഖലയ്ക്കുള്ള വിഹിതം വെട്ടിക്കുറച്ചതിനെതിരെ കടുത്ത പ്രതിഷേധവുമായി സന്നദ്ധ സംഘടനകൾ രംഗത്ത്. സർക്കാരിന്റെ ഈ നീക്കം ദരിദ്രരായ ജനങ്ങളെ കൂടുതൽ ദുരിതത്തിലാക്കുമെന്നും ഭാവിയിൽ ഇത് സർക്കാരിന് തന്നെ വലിയ സാമ്പത്തിക ബാധ്യത വരുത്തിവെക്കുമെന്നും ചാരിറ്റി സ്ഥാപനങ്ങൾ മുന്നറിയിപ്പ് നൽകുന്നു.

ബജറ്റിലെ തുക വെട്ടിക്കുറച്ചതിനെത്തുടർന്ന് കുടുംബങ്ങളെ സഹായിക്കുന്ന ‘ഫാമിലി എസ്.ഒ.എസ്’ (Family SOS) പോലുള്ള സംഘടനകൾക്ക് തങ്ങളുടെ പ്രവർത്തനം തന്നെ അവസാനിപ്പിക്കേണ്ടി വരുമോ എന്ന ആശങ്കയിലാണ്. ഈ സംഘടനയുടെ വാർഷിക ബജറ്റിന്റെ ഭൂരിഭാഗവും വരുന്ന 3,00,000 ഡോളറാണ് സർക്കാർ വെട്ടിക്കുറച്ചത്. പ്രതിസന്ധിയിലായ കുടുംബങ്ങളെ സഹായിക്കുന്ന ഇത്തരം സംഘടനകൾ ഇല്ലാതാകുന്നത് കുട്ടികളെ സംരക്ഷണ കേന്ദ്രങ്ങളിലേക്ക് (Foster Care) മാറ്റേണ്ട സാഹചര്യമുണ്ടാക്കുമെന്നും, ഇത് സർക്കാരിന് ഒരു കുട്ടിക്ക് വർഷം തോറും ഒരു ലക്ഷം ഡോളറോളം അധിക ബാധ്യത വരുത്തുമെന്നും ഫാമിലി എസ്.ഒ.എസ് വക്താക്കൾ ചൂണ്ടിക്കാട്ടുന്നു.

ബജറ്റിലെ വെട്ടിക്കുറയ്ക്കലുകൾ ബ്രൺസ്‌വിക് സ്ട്രീറ്റ് മിഷൻ (Brunswick Street Mission) പോലുള്ള മറ്റ് സംഘടനകളെയും നേരിട്ട് ബാധിക്കുമെന്നാണ് വിലയിരുത്തൽ. സർക്കാരിന്റെ സഹായം കുറയുന്നതോടെ കൂടുതൽ ആളുകൾ ഭക്ഷണം തേടി ഫുഡ് ബാങ്കുകളെയും ചാരിറ്റി സ്ഥാപനങ്ങളെയും സമീപിക്കുമെന്ന് ബ്രൺസ്‌വിക് സ്ട്രീറ്റ് മിഷൻ എക്സിക്യൂട്ടീവ് ഡയറക്ടർ ലിസ ഹാരിസൺ പറഞ്ഞു. കഴിഞ്ഞ മൂന്ന് വർഷമായി തങ്ങളുടെ സേവനം തേടിയെത്തുന്നവരുടെ എണ്ണം വർധിച്ചുകൊണ്ടിരിക്കുകയാണെന്നും പുതിയ സാഹചര്യം ഇത് കൂടുതൽ രൂക്ഷമാക്കുമെന്നും അവർ കൂട്ടിച്ചേർത്തു.

അതേസമയം, പ്രോഗ്രസീവ് കൺസർവേറ്റീവ് സർക്കാരിന്റെ ബജറ്റിനെതിരെ നോവ സ്കോഷ്യ എൻഡിപി നേതാവ് ക്ലോഡിയ ഷെൻഡർ കടുത്ത വിമർശനവുമായി രംഗത്തെത്തി. ബജറ്റ് പുനപ്പരിശോധിക്കണമെന്നും ഏറ്റവും ദുർബലരായ ജനങ്ങളെ സഹായിക്കുന്ന മേഖലകളിലല്ല വെട്ടിക്കുറയ്ക്കൽ നടത്തേണ്ടതെന്നും അവർ ആവശ്യപ്പെട്ടു.

സാമ്പത്തിക സമ്മർദ്ദങ്ങൾ കൈകാര്യം ചെയ്യുന്നതിനും പ്രധാന സേവനങ്ങൾ സംരക്ഷിക്കുന്നതിനുമുള്ള കടുത്ത തീരുമാനങ്ങളാണ് ബജറ്റിലുള്ളതെന്നാണ് പ്രീമിയർ ടിം ഹൂസ്റ്റന്റെ ഓഫീസിൽ നിന്നുള്ള വിശദീകരണം. ബജറ്റിലെ നിർദ്ദേശങ്ങളെക്കുറിച്ചുള്ള ചർച്ചകൾ അടുത്ത ആഴ്ച നോവ സ്കോഷ്യ നിയമസഭയിൽ തുടരും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Nova Scotia charities warn budget cuts could cost government more later