നടക്കാൻ വഴിയില്ല, യാത്രയ്ക്കു ബസില്ല! നോവ സ്കോഷ്യയിലെ ജീവിതം ഇപ്പോൾ ഇങ്ങനെ

നോവ സ്കോഷ്യയിൽ സ്വന്തമായി വാഹനമില്ലാത്തവർക്ക് അടിസ്ഥാന ആവശ്യങ്ങൾ പോലും നിറവേറ്റാൻ വലിയ ബുദ്ധിമുട്ടുകൾ നേരിടുന്നതായി പുതിയ പഠന റിപ്പോർട്ട്. സ്റ്റാറ്റിസ്റ്റിക്സ് കാനഡ പുറത്തുവിട്ട വിവരങ്ങൾ പ്രകാരം, ഭൂരിഭാഗം നോവ സ്കോഷ്യ നിവാസികൾക്കും 30 മിനിറ്റിനുള്ളിൽ നടന്നാൽ എത്താവുന്ന ദൂരത്തിൽ ഒരു പലചരക്ക് കടയോ കുട്ടികളുടെ പരിചരണ കേന്ദ്രങ്ങളോ ഇല്ല. ഇത് ദുർബല ജനവിഭാഗങ്ങൾക്ക് കൂടുതൽ വെല്ലുവിളികൾ ഉയർത്തുന്നുണ്ടെന്ന് ഒരു സന്നദ്ധ സംഘടന ചൂണ്ടിക്കാട്ടുന്നു.

തൊഴിൽ കണ്ടെത്താനും ജോലിക്ക് പോകാനും സ്കൂളിൽ പോകാനും ഭക്ഷണസാധനങ്ങൾ വാങ്ങാനും പോലും ഇത് വലിയ തടസ്സമാണെന്ന് ദാരിദ്ര്യം അനുഭവിക്കുന്നവരെ സഹായിക്കുന്ന ‘സൗൾസ് ഹാർബർ റെസ്ക്യൂ മിഷൻ’ സി.ഇ.ഒ മിഷേൽ പോർട്ടർ പറയുന്നു. പൊതുഗതാഗതം ഉപയോഗിച്ച് ഒരു ആരോഗ്യ കേന്ദ്രത്തിൽ എത്താൻ ഒന്നര മണിക്കൂറിലധികം സമയമെടുക്കുമെന്നും പഠനം വെളിപ്പെടുത്തുന്നു. കൂടാതെ, ഹാലിഫാക്സ് ട്രാൻസിറ്റ് ബസുകൾ കൃത്യസമയത്ത് എത്തുന്നത് 68% മാത്രമാണെന്നും ഇത് കഴിഞ്ഞ നാല് വർഷത്തിനിടെ കുറഞ്ഞുവെന്നും റിപ്പോർട്ടിൽ പറയുന്നു. ബസ് വൈകുന്നത് ഒരു നേരത്തെ ഭക്ഷണം പോലും മുടക്കാൻ കാരണമാകുന്നുണ്ടെന്നും പോർട്ടർ കൂട്ടിച്ചേർത്തു.

സാമ്പത്തികമായി പിന്നോക്കം നിൽക്കുന്ന ആളുകൾക്ക് ഇത് വലിയ ബുദ്ധിമുട്ടുകൾ സൃഷ്ടിക്കുന്നുണ്ട്. നഗരങ്ങളിൽ പോലും ഗതാഗത ലഭ്യത ഒരു പ്രശ്നമായി തുടരുകയാണെന്ന് പോർട്ടർ പറയുന്നു. രണ്ട് വർഷം മുമ്പ് സൗൾസ് ഹാർബർ തുറന്ന ഒരു സ്ത്രീകളുടെയും കുട്ടികളുടെയും സംരക്ഷണ കേന്ദ്രത്തിലേക്ക് മുമ്പ് ബസ് സർവീസ് ഉണ്ടായിരുന്നെങ്കിലും പിന്നീട് അത് നിർത്തലാക്കിയത് വലിയ പ്രതിസന്ധിക്ക് കാരണമായി. മെഡിക്കൽ ആവശ്യങ്ങൾക്കും കുട്ടികളുടെ സ്കൂൾ ആവശ്യങ്ങൾക്കും യാത്ര ചെയ്യേണ്ടി വരുമ്പോൾ ടാക്സികളെ ആശ്രയിക്കേണ്ടി വരികയോ ജീവനക്കാരുടെ സ്വന്തം വാഹനങ്ങളെ ആശ്രയിക്കേണ്ടി വരികയോ ചെയ്യുകയാണെന്നും അവർ പറഞ്ഞു.`

ഗ്രാമീണ മേഖലകളിലെ ജനസാന്ദ്രത കുറവാണ് ഇത്തരം ഗതാഗത സംവിധാനങ്ങൾ വികസിപ്പിക്കുന്നതിന് പ്രധാന തടസ്സമെന്ന് ക്വീൻസ് യൂണിവേഴ്സിറ്റിയിലെ പ്രൊഫസർ പട്രീഷ്യ കോളിൻസ് അഭിപ്രായപ്പെട്ടു. നോവ സ്കോഷ്യയിലെ ഏകദേശം 41% ആളുകളും ഗ്രാമപ്രദേശങ്ങളിലാണ് താമസിക്കുന്നത്. കാറുകളിലുള്ള അമിത ആശ്രയം പരിസ്ഥിതിക്ക് ദോഷകരമാണെന്നും റോഡുകൾക്ക് തേയ്മാനം വരുത്തുമെന്നും അവർ കൂട്ടിച്ചേർത്തു. എല്ലാവർക്കും തുല്യമായ ഗതാഗത സൗകര്യങ്ങൾ ഒരുക്കുന്നതിന് ഈ പഠനം സഹായകമാകുമെന്നും ഗതാഗത നയങ്ങളിൽ ഇത് മാറ്റങ്ങൾ വരുത്താൻ ഇടയാക്കുമെന്നും സ്റ്റാറ്റിസ്റ്റിക്സ് കാനഡ വക്താവ് അറിയിച്ചു.

No way to walk, no bus to travel! This is what life in Nova Scotia is like now