സെന്റ് ജോൺസ്: കാനഡയിലെ ഫെഡറൽ ഗവൺമെന്റുമായി ചേർന്ന് നടപ്പിലാക്കാൻ ഉദ്ദേശിച്ചിരുന്ന ദേശീയ സമുദ്ര സംരക്ഷണ മേഖലയുമായി ബന്ധപ്പെട്ട ചർച്ചകളിൽ നിന്ന് ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യ പിന്മാറി. പ്രവിശ്യയിലെ പുതിയ പ്രോഗ്രസീവ് കൺസർവേറ്റീവ് ഗവൺമെന്റാണ് ഈ സുപ്രധാന തീരുമാനമെടുത്തത്. പ്രവിശ്യയുടെ തെക്കൻ തീരത്ത് നിർദ്ദിഷ്ട സംരക്ഷണ മേഖല നിലവിൽ വന്നാൽ അത് മേഖലയിലെ ഖനനം, മത്സ്യബന്ധനം, അക്വാകൾച്ചർ തുടങ്ങിയ തൊഴിൽ മേഖലകളെയും ഈ വ്യവസായങ്ങളെ ആശ്രയിച്ചു കഴിയുന്ന പ്രാദേശിക സമൂഹങ്ങളെയും ദോഷകരമായി ബാധിക്കുമെന്ന് പ്രവിശ്യ സർക്കാർ വ്യക്തമാക്കി.
2023-ൽ അന്നത്തെ ലിബറൽ ഗവൺമെന്റാണ് പദ്ധതിയുടെ സാധ്യതകൾ പഠിക്കുന്നതിനായി ഫെഡറൽ ഗവൺമെന്റുമായി ധാരണാപത്രം ഒപ്പിട്ടത്. ഇതിന്റെ ഭാഗമായി ബുർജിയോയ്ക്ക് അടുത്തുള്ള സാൻഡ്ബാങ്ക്സ് പ്രൊവിൻഷ്യൽ പാർക്കിനെ ഒരു നാഷണൽ പാർക്കായി മാറ്റുന്ന കാര്യവും പരിഗണനയിലുണ്ടായിരുന്നു. മിയാപുക്കക്, കാലിപു ഗോത്രവിഭാഗങ്ങളും ബുർജിയോ നഗരസഭയും ഈ കരാറിൽ പങ്കാളികളായിരുന്നുവെങ്കിലും പ്രവിശ്യയിലെ മത്സ്യത്തൊഴിലാളി യൂണിയനുകളും അക്വാകൾച്ചർ വ്യവസായ രംഗത്തുള്ളവരും പദ്ധതിയെ ശക്തമായി എതിർത്തിരുന്നു.
കഴിഞ്ഞ ഒക്ടോബറിൽ നടന്ന തിരഞ്ഞെടുപ്പിന് മുന്നോടിയായി, അധികാരത്തിൽ വന്നാൽ ഈ കരാറിൽ നിന്ന് പിന്മാറുമെന്ന് പ്രോഗ്രസീവ് കൺസർവേറ്റീവ് പാർട്ടി ജനങ്ങൾക്ക് വാഗ്ദാനം നൽകിയിരുന്നു. ആ വാഗ്ദാനം പാലിച്ചുകൊണ്ടാണ് ഇപ്പോൾ പദ്ധതിയുമായുള്ള ചർച്ചകൾ അവസാനിപ്പിക്കാൻ സർക്കാർ തീരുമാനിച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Newfoundland and Labrador pulls out of talks about national marine conservation area
