സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യയിൽ നടപ്പിലാക്കാൻ ഒരുങ്ങുന്ന പുതിയ ഡിജിറ്റൽ ആരോഗ്യസംവിധാനത്തിനെതിരെ ഡോക്ടർമാരുടെ ശക്തമായ പ്രതിഷേധം. ‘കോർകെയർ’ (CorCare) എന്ന പേരിൽ അവതരിപ്പിക്കുന്ന നിർബന്ധിത ഇലക്ട്രോണിക് ഹെൽത്ത് ഇൻഫർമേഷൻ സിസ്റ്റം പ്രാബല്യത്തിൽ വരുന്നതോടെ പ്രവിശ്യയിൽ നിന്ന് ഡോക്ടർമാരുടെ വൻതോതിലുള്ള കൊഴിഞ്ഞുപോക്ക് ഉണ്ടാകുമെന്ന് ഇരുന്നൂറ്റമ്പതോളം ഡോക്ടർമാർ ഒപ്പിട്ട നിവേദനത്തിൽ മുന്നറിയിപ്പ് നൽകുന്നു.
ആരോഗ്യവകുപ്പിന്റെ പുതിയ നയങ്ങൾ തിരുത്തണമെന്നും കരാറിലെ വ്യവസ്ഥകൾ പുനഃപരിശോധിക്കണമെന്നുമാണ് ഡോക്ടർമാരുടെ ആവശ്യം. ഏപ്രിൽ 25-ഓടെ പുതിയ സംവിധാനം പൂർണ്ണമായി നടപ്പിലാക്കാനാണ് അധികൃതർ ലക്ഷ്യമിടുന്നത്. എന്നാൽ നിലവിലെ സാഹചര്യത്തിൽ ഈ കരാറിൽ ഒപ്പിടരുതെന്ന് ഡോക്ടർമാരുടെ സംഘടനയായ ന്യൂഫൗണ്ട്ലാൻഡ് ആൻഡ് ലാബ്രഡോർ മെഡിക്കൽ അസോസിയേഷൻ അംഗങ്ങൾക്ക് നിർദ്ദേശം നൽകിയിട്ടുണ്ട്.
സാമ്പത്തിക ബാധ്യതയും നിയമക്കുരുക്കും
പുതിയ ഡിജിറ്റൽ പോർട്ടലായ ‘കോർകെയർ ലിങ്ക്’ ഉപയോഗിക്കുന്നതിനായി ഡോക്ടർമാർ ഒപ്പിടേണ്ട കരാറിലെ വ്യവസ്ഥകളാണ് പ്രധാനമായും പ്രതിഷേധത്തിന് കാരണമാകുന്നത്. ഡാറ്റാ സുരക്ഷയുമായി ബന്ധപ്പെട്ട എന്തെങ്കിലും ലംഘനങ്ങൾ ഉണ്ടായാൽ, അതിൽ ഡോക്ടറുടെ ഭാഗത്ത് തെറ്റില്ലെങ്കിൽ പോലും അന്വേഷണച്ചെലവും നിയമപരമായ ചെലവുകളും ഡോക്ടർ തന്നെ വഹിക്കണമെന്ന വ്യവസ്ഥ അംഗീകരിക്കാനാവില്ലെന്ന് ഇവർ ചൂണ്ടിക്കാട്ടുന്നു. ഇത്തരം ഓപ്പൺ എൻഡഡ് സാമ്പത്തിക ബാധ്യതകൾ തങ്ങളെ കടക്കെണിയിലാക്കുമെന്ന് ഡോക്ടർമാർ ഭയപ്പെടുന്നു. കൂടാതെ, ഡോക്ടർമാരുമായി കൂടിയാലോചിക്കാതെ കരാറിൽ മാറ്റങ്ങൾ വരുത്താൻ ആരോഗ്യവകുപ്പിന് അധികാരം നൽകുന്ന വ്യവസ്ഥയും പ്രതിഷേധത്തിന് കാരണമായിട്ടുണ്ട്.
സേവനം നിർത്താൻ മുതിർന്ന ഡോക്ടർമാർ
പതിറ്റാണ്ടുകളായി പേപ്പർ ഫയലുകൾ ഉപയോഗിച്ച് ചികിത്സ നടത്തുന്ന മുതിർന്ന ഡോക്ടർമാരെയാണ് പുതിയ പരിഷ്കാരം ഏറ്റവും കൂടുതൽ ബാധിക്കുക. നിർബന്ധിത ഡിജിറ്റൽ സംവിധാനത്തിലേക്ക് മാറാൻ പ്രായോഗിക ബുദ്ധിമുട്ടുള്ള പലരും നേരത്തെ വിരമിക്കാൻ തീരുമാനിച്ചേക്കുമെന്ന് ഡെർമറ്റോളജിസ്റ്റായ ഡോ. ബോലു ഒഗുനിയമി പറഞ്ഞു. “ആയിരക്കണക്കിന് രോഗികളെ ചികിത്സിക്കുന്ന ഫാമിലി ഡോക്ടർമാർ പ്രവിശ്യയിലുണ്ട്. ഒരാൾ ജോലി ഉപേക്ഷിച്ചാൽ പോലും അത് നിലവിലെ തകർന്നുകൊണ്ടിരിക്കുന്ന ആരോഗ്യ സംവിധാനത്തെ കൂടുതൽ പ്രതിസന്ധിയിലാക്കും,” അദ്ദേഹം വ്യക്തമാക്കി. നിലവിൽ ഈ പ്രവിശ്യയിലെ 30 ശതമാനത്തോളം ആളുകൾക്ക് സ്വന്തമായി ഫാമിലി ഡോക്ടർമാരില്ലാത്ത അവസ്ഥയുണ്ട്.
ആരോഗ്യമേഖലയിലെ ആശങ്ക
പ്രവിശ്യയിലെ ആകെയുള്ള ഡോക്ടർമാരിൽ 17 ശതമാനത്തോളം പേരാണ് നിലവിൽ പ്രതിഷേധക്കത്തിൽ ഒപ്പിട്ടിരിക്കുന്നത്. ഡിജിറ്റൽ പരിഷ്കാരങ്ങൾ നല്ലതാണെങ്കിലും പ്രായോഗികമായ വെല്ലുവിളികളും സാമ്പത്തിക റിസ്കുകളും പരിഗണിക്കാതെ ഇത് അടിച്ചേൽപ്പിക്കുന്നത് തിരിച്ചടിയാകുമെന്ന് വിദഗ്ധർ നിരീക്ഷിക്കുന്നു. ഡൽഹൗസി സർവകലാശാലയിലെ പ്രൊഫസർ മൈക്കൽ കരണിക്കോളാസ് ഉൾപ്പെടെയുള്ള നിയമവിദഗ്ധരും കരാറിലെ പിഴവുകൾ ചൂണ്ടിക്കാട്ടിയിട്ടുണ്ട്. എന്നാൽ പ്രതിഷേധവുമായി ബന്ധപ്പെട്ട് പ്രതികരിക്കാൻ പ്രവിശ്യാ ആരോഗ്യവകുപ്പ് ഇതുവരെ തയ്യാറായിട്ടില്ല. വരും ദിവസങ്ങളിൽ ഡോക്ടർമാരുടെ സംഘടനയുമായി ചർച്ച നടത്തിയില്ലെങ്കിൽ പ്രവിശ്യയിൽ വലിയ രീതിയിലുള്ള ഡോക്ടർമാരുടെ കുറവ് അനുഭവപ്പെട്ടേക്കാം.
nl-doctors-warn-of-exodus-of-physicians-over-mandatory-new-information-system
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
