വെല്ലൻഡ്: വെല്ലൻഡിൽ ഫയർ കോഡ് നിബന്ധനകൾ ലംഘിച്ച കെട്ടിട ഉടമയ്ക്കും കോർപ്പറേറ്റ് ഡയറക്ടർക്കും കോടതി വൻ തുക പിഴ ചുമത്തി. സുരക്ഷാ മാനദണ്ഡങ്ങളിൽ വരുത്തിയ ഗുരുതരമായ വീഴ്ചയെത്തുടർന്ന് ഏകദേശം മൂന്ന് ലക്ഷം കനേഡിയൻ ഡോളറാണ് (2,87,500 ഡോളർ) പിഴയായി നൽകേണ്ടത്. പ്രൊവിൻഷ്യൽ ഒഫൻസസ് കോടതിയാണ് ഈ നിർണ്ണായക വിധി പുറപ്പെടുവിച്ചത്.
വെല്ലൻഡിലെ ഹെല്ലംസ് അവന്യൂവിലുള്ള കെട്ടിടത്തിലാണ് അധികൃതർ സുരക്ഷാ വീഴ്ചകൾ കണ്ടെത്തിയത്. തീപിടിത്തം തടയുന്നതിനുള്ള ഫയർ സെപ്പറേഷനുകൾ, അഗ്നിശമന വാതിലുകൾ എന്നിവ അറ്റകുറ്റപ്പണി നടത്തിയില്ലെന്ന് പരിശോധനയിൽ വ്യക്തമായി. കൂടാതെ, എമർജൻസി എക്സിറ്റ് ലൈറ്റുകൾ പ്രവർത്തനരഹിതമായതും പുക കണ്ടെത്താനുള്ള സ്മോക്ക് അലാറങ്ങൾ കൃത്യമായി പരിപാലിക്കാത്തതും നിയമലംഘനങ്ങളുടെ പട്ടികയിൽ ഉൾപ്പെടുന്നു.
2021 മുതൽ ഈ കെട്ടിടത്തിലെ സുരക്ഷാ പ്രശ്നങ്ങൾ പരിഹരിക്കാൻ അഗ്നിശമന സേന ആവർത്തിച്ച് നിർദ്ദേശങ്ങൾ നൽകിയിരുന്നു. 2022-ലും 2023-ലും നിയമലംഘനങ്ങൾക്ക് പിഴ ചുമത്തിയെങ്കിലും കെട്ടിടത്തിലെ സ്ഥിതി കൂടുതൽ വഷളാവുകയായിരുന്നു. 2023 സെപ്റ്റംബറിൽ നടത്തിയ പരിശോധനയിൽ താമസക്കാർക്ക് കടുത്ത ഭീഷണിയാണെന്ന് കണ്ടെത്തിയതിനെത്തുടർന്ന് കെട്ടിടം താൽക്കാലികമായി അടച്ചുപൂട്ടുകയും ചെയ്തു.
കെട്ടിടം അടച്ചുപൂട്ടിയതോടെ നിരവധി താമസക്കാർക്ക് മാസങ്ങളോളം മാറി താമസിക്കേണ്ടി വന്നു. ഇവരെ മാറ്റിപ്പാർപ്പിക്കുന്നതിനായി നയാഗ്ര റീജിയണൽ സോഷ്യൽ സർവീസസ് ഉൾപ്പെടെയുള്ള സംഘടനകൾ സഹായം നൽകി. അഗ്നി സുരക്ഷാ നിയമങ്ങൾ പാലിക്കുന്നത് ഒരു ഐച്ഛികമായ കാര്യമല്ലെന്നും അത് നിയമപരമായ ബാധ്യതയാണെന്നും വെല്ലൻഡ് ആക്ടിംഗ് ഫയർ ചീഫ് മാറ്റ് റിച്ചാർഡ്സൺ വാർത്താക്കുറിപ്പിൽ വ്യക്തമാക്കി.
niagara-region/welland-niagara-fire-code-fine
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
