സെന്റ് മേരീസ് (ന്യൂഫൗണ്ട്ലാൻഡ്): സെന്റ് മേരീസിൽ വർഷങ്ങളായി ഉപേക്ഷിക്കപ്പെട്ട നിലയിലുണ്ടായിരുന്ന മത്സ്യനെയ്യ് സംസ്കരണ ശാല (Fish Sauce Plant) ശക്തമായ കാറ്റിൽ തകർന്നു. വെള്ളിയാഴ്ച രാത്രിയുണ്ടായ അതിശക്തമായ കാറ്റിൽ കെട്ടിടത്തിന്റെ മുൻഭാഗം പൂർണ്ണമായും തകരുകയും ഉള്ളിലുണ്ടായിരുന്ന ടാങ്കുകൾ പുറത്തെ അന്തരീക്ഷവുമായി നേരിട്ട് സമ്പർക്കത്തിലാവുകയും ചെയ്തു. ഇതോടെ പ്രദേശത്ത് അതിശക്തമായ ദുർഗന്ധം പടർന്നത് ജനജീവിതത്തെ ബാധിച്ചിരിക്കുകയാണ്.
കെട്ടിടാവശിഷ്ടങ്ങൾക്കിടയിൽ ചീഞ്ഞഴുകിയ നിലയിലുള്ള മത്സ്യനെയ്യ് സൂക്ഷിച്ച 110 വലിയ ടാങ്കുകളാണുള്ളത്. ഇവയിൽ നിന്നുള്ള ദുർഗന്ധം അസഹനീയമായ സാഹചര്യത്തിൽ സമീപവാസികളെ മാറ്റിപ്പാർപ്പിക്കുന്നതിനെക്കുറിച്ച് ആലോചിക്കുകയാണെന്ന് മേയർ സ്റ്റീവ് റയാൻ അറിയിച്ചു. നിലവിൽ ഈ ഗന്ധം ശ്വസിക്കുന്നത് ആരോഗ്യപ്രശ്നങ്ങൾക്ക് കാരണമാകുമോ എന്ന കാര്യത്തിൽ വ്യക്തതയില്ല. സുരക്ഷാ മുൻകരുതലിന്റെ ഭാഗമായി പ്ലാന്റിന് 300 മീറ്റർ മാത്രം അകലെയുള്ള പ്രാദേശിക സ്കൂളിന് തിങ്കളാഴ്ച അവധി നൽകുന്ന കാര്യവും പരിഗണനയിലാണ്.
കെട്ടിടത്തിനുള്ളിലെ അവശിഷ്ടങ്ങൾ സമുദ്രത്തിലേക്ക് ഒഴുകിയെത്തിയാൽ അത് വലിയ പാരിസ്ഥിതിക ദുരന്തത്തിന് കാരണമാകുമെന്ന് അധികൃതർ ഭയപ്പെടുന്നു. 2016-ൽ എൻവയോൺമെന്റ് കാനഡ നടത്തിയ പരിശോധനയിൽ ഈ പ്ലാന്റിൽ നിന്നുള്ള മാലിന്യം മത്സ്യങ്ങൾക്ക് മാരകമാണെന്ന് കണ്ടെത്തിയിരുന്നു. അന്ന് മാലിന്യം പുറത്തേക്ക് ഒഴുകിയിരുന്ന പൈപ്പുകൾ അടച്ചുപൂട്ടിയെങ്കിലും ടാങ്കുകൾക്കുള്ളിലെ ദ്രാവകം നീക്കം ചെയ്തിരുന്നില്ല. പത്തുവർഷമായി കെട്ടിടത്തിനുള്ളിൽ കെട്ടിക്കിടക്കുന്ന ഈ മാലിന്യം സമുദ്രത്തിലെ ജീവജാലങ്ങൾക്ക് കടുത്ത ഭീഷണിയാണ്.
പ്ലാന്റിലെ മാലിന്യങ്ങൾ നീക്കം ചെയ്യണമെന്ന ആവശ്യത്തിന് പത്തുവർഷത്തെ പഴക്കമുണ്ടെന്നും ശുചീകരണ പ്രവർത്തനങ്ങൾക്കായി ടെൻഡർ നടപടികൾ ആരംഭിക്കാനിരിക്കെയാണ് കെട്ടിടം തകർന്നതെന്നും മേയർ പറഞ്ഞു. നിലവിലെ അടിയന്തര സാഹചര്യം നേരിടാൻ പ്രവിശ്യാ സർക്കാരിന്റെയും ഫെഡറൽ സർക്കാരിന്റെയും സഹായം തേടിയിട്ടുണ്ട്. തിങ്കളാഴ്ച മണിക്കൂറിൽ 100 കിലോമീറ്റർ വേഗതയിൽ വീണ്ടും കാറ്റുവീശാൻ സാധ്യതയുണ്ടെന്ന കാലാവസ്ഥാ മുന്നറിയിപ്പ് ആശങ്ക വർധിപ്പിക്കുന്നു.
newfoundland-labrador/stmarys-plant-collapse
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
