സെന്റ് ജോൺസ്: കാനഡയിലെ ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യയുടെ ഊർജ്ജ മേഖലയിൽ വൻ കുതിച്ചുചാട്ടത്തിനൊരുങ്ങി ബേ ഡു നോർഡ് എണ്ണപദ്ധതി. നോർവീജിയൻ എണ്ണക്കമ്പനിയായ ഇക്വിനോറുമായുള്ള (Equinor) നിർണ്ണായക കരാർ സംബന്ധിച്ച ‘സുപ്രധാന പ്രഖ്യാപനം’ ചൊവ്വാഴ്ച വൈകിട്ട് ആറുമണിക്ക് പ്രീമിയർ ടോണി വേക്കാം നടത്തും. സെന്റ് ജോൺസിലെ ഡെൽറ്റ ഹോട്ടലിൽ നടക്കുന്ന ചടങ്ങിൽ പ്രവിശ്യയുടെ സാമ്പത്തിക ഭദ്രതയെ സ്വാധീനിക്കുന്ന സുപ്രധാന തീരുമാനങ്ങൾ ഉണ്ടാകുമെന്നാണ് സൂചന. പദ്ധതിയുടെ സാങ്കേതിക വശങ്ങളെക്കുറിച്ച് മാധ്യമപ്രവർത്തകർക്കായി പ്രത്യേക ബ്രീഫിംഗും സർക്കാർ നിശ്ചയിച്ചിട്ടുണ്ട്.
പ്രവിശ്യാ അസംബ്ലിയിൽ ഭരണ-പ്രതിപക്ഷ കക്ഷികൾ തമ്മിലുള്ള വാഗ്വാദങ്ങൾക്കും ഈ വിഷയം വഴിമരുന്നിട്ടു. ഉൽപ്പാദന കപ്പലിന്റെ (FPSO) പ്രധാന ഭാഗങ്ങൾ പ്രവിശ്യയിൽ തന്നെ നിർമ്മിക്കണമെന്ന തിരഞ്ഞെടുപ്പ് വാഗ്ദാനത്തിൽ സർക്കാർ ഉറച്ചുനിൽക്കുന്നുണ്ടോ എന്ന പ്രതിപക്ഷത്തിന്റെ ചോദ്യത്തിന് ഊർജ്ജ മന്ത്രി ലോയ്ഡ് പാരറ്റ് വ്യക്തമായ മറുപടി നൽകിയില്ല. എന്നാൽ, സംസ്ഥാനം ഇതുവരെ കണ്ടിട്ടുള്ളതിൽ വച്ച് ഏറ്റവും മികച്ച ആനുകൂല്യങ്ങൾ ഉറപ്പാക്കുന്ന കരാറായിരിക്കും ഇതെന്ന് അദ്ദേഹം അവകാശപ്പെട്ടു. എണ്ണ-വാതക മേഖലയുടെ പുനരുജ്ജീവനത്തിനുള്ള തുടക്കം മാത്രമാണിതെന്ന് പ്രീമിയർ ടോണി വേക്കാമും വ്യക്തമാക്കി.
ഏകദേശം 1400 കോടി ഡോളറിന്റെ (14 Billion USD) വമ്പൻ നിക്ഷേപമാണ് ഇക്വിനോറും പങ്കാളികളായ ബിപിയും (BP) ചേർന്ന് ഈ പദ്ധതിക്കായി ലക്ഷ്യമിടുന്നത്. ഫ്ലെമിഷ് പാസ് ബേസിനിൽ നിന്ന് ആദ്യഘട്ടത്തിൽ 40 കോടി ബാരൽ എണ്ണ ഉൽപ്പാദിപ്പിക്കാനാണ് തീരുമാനം. പദ്ധതി യാഥാർത്ഥ്യമായാൽ ന്യൂഫൗണ്ട്ലാൻഡ് തീരത്തെ നാലാമത്തെ സജീവ എണ്ണപ്പാടമായും, ആഴക്കടൽ മേഖലയിലെ ആദ്യ പദ്ധതിയായും ബേ ഡു നോർഡ് മാറും. വർദ്ധിച്ചുവരുന്ന ചിലവുകൾ കണക്കിലെടുത്ത് 2023-ൽ ഇക്വിനോർ പദ്ധതി താൽക്കാലികമായി നിർത്തിവെച്ചിരുന്നെങ്കിലും, പുതിയ സർക്കാരുമായുള്ള ചർച്ചകൾക്കൊടുവിൽ പദ്ധതിയുമായി മുന്നോട്ട് പോകാൻ തീരുമാനിക്കുകയായിരുന്നു.
നിർമ്മാണ പ്രവർത്തനങ്ങളിൽ പ്രാദേശിക തൊഴിലാളികൾക്ക് മുൻഗണന നൽകുന്നതിലൂടെ തൊഴിൽ മേഖലയിലും വലിയ മാറ്റങ്ങൾ പ്രതീക്ഷിക്കുന്നുണ്ട്. ഫ്ലോട്ടിംഗ് ഡ്രൈഡോക്ക് നിർമ്മാണത്തിനായി കോടിക്കണക്കിന് ഡോളർ നിക്ഷേപിക്കുമെന്നും ഇത് പ്രതിരോധ മേഖലയുൾപ്പെടെയുള്ള മറ്റ് വ്യവസായങ്ങൾക്കും ഗുണകരമാകുമെന്നുമാണ് രാഷ്ട്രീയ നിരീക്ഷകർ കരുതുന്നത്. 2025-ൽ പദ്ധതിയുടെ അന്തിമ നിക്ഷേപ തീരുമാനം (FID) ഉണ്ടാകുമെന്നും 2031-ഓടെ ആദ്യഘട്ട എണ്ണ ഉൽപ്പാദനം ആരംഭിക്കുമെന്നുമാണ് നിലവിലെ റിപ്പോർട്ടുകൾ സൂചിപ്പിക്കുന്നത്.
newfoundland-labrador/equinor-oil-agreement-nl-
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
