വിനിപെഗ്: മാനിറ്റോബ പ്രവിശ്യയിൽ നാല് പുതിയ സ്കൂളുകളുടെ നിർമ്മാണ പ്രവർത്തനങ്ങൾ ഈ ആഴ്ച ആരംഭിക്കുമെന്ന് അറിയിച്ച് പ്രീമിയർ വാബ് കിന്യു. മാനിറ്റോബ ജോബ്സ് അഗ്രിമെന്റ് (MJA) ഫ്രെയിംവർക്കിന്റെ ഭാഗമായി നടപ്പിലാക്കുന്ന ഈ പദ്ധതിയിലൂടെ വിനിപെഗിൽ മൂന്ന് സ്കൂളുകളും ബ്രാൻഡനിൽ ഒരു സ്കൂളുമാണ് നിർമ്മിക്കുന്നത്.
വിനിപെഗിലെ സ്കൂൾ നിർമ്മാണ മേഖലകളിൽ പ്രാഥമിക പരിശോധനകളും പൈലിംഗ് ജോലികളും കാലാവസ്ഥയ്ക്ക് അനുസൃതമായി ഇതിനകം ആരംഭിച്ചതായി പ്രീമിയർ വ്യക്തമാക്കി. വിനിപെഗിലെ ഡെവൺഷയർ പാർക്ക്, പ്രെയറി പോയിന്റ്, മീഡോലാൻഡ്സ് റെസിഡൻഷ്യൽ കമ്മ്യൂണിറ്റി എന്നിവിടങ്ങളിലും ബ്രാൻഡന്റെ തെക്ക്-പടിഞ്ഞാറൻ മേഖലയിലുമാണ് പുതിയ വിദ്യാലയങ്ങൾ വരുന്നത്. ഏകദേശം 20 മില്യൺ ഡോളർ ചെലവ് പ്രതീക്ഷിക്കുന്ന ഈ സ്കൂളുകളെല്ലാം ഒരേ ഡിസൈൻ മാതൃകയിലാണ് നിർമ്മിക്കുന്നത്.
പ്രധാന അടിസ്ഥാന സൗകര്യ വികസന പദ്ധതികളിൽ മാനിറ്റോബയിലെ തൊഴിലാളികൾക്ക് മുൻഗണന ഉറപ്പാക്കുക എന്നതാണ് മാനിറ്റോബ ജോബ്സ് അഗ്രിമെന്റ് ലക്ഷ്യമിടുന്നത്. കൃത്യമായ വേതനം, ആനുകൂല്യങ്ങൾ, സുരക്ഷിതമായ തൊഴിൽ സാഹചര്യങ്ങൾ എന്നിവ ഉറപ്പാക്കുന്നതിനൊപ്പം അപ്രന്റിസ്ഷിപ്പ് വഴി പ്രാദേശികമായ തൊഴിൽ നൈപുണ്യം വികസിപ്പിക്കാനും ഈ പദ്ധതി സഹായിക്കും. 50 മില്യൺ ഡോളറോ അതിലധികമോ ചെലവ് വരുന്ന സർക്കാർ മൂലധന പദ്ധതികളെല്ലാം ഇനി മുതൽ ഈ നിയമപരിധിയിൽ വരും.
2025-ലെ ബജറ്റിൽ പ്രഖ്യാപിച്ച ഈ സ്കൂൾ പദ്ധതികൾ 2027-ലെ ശരത്കാലത്തോടെ പൂർത്തിയാക്കി പ്രവർത്തനം ആരംഭിക്കാനാണ് സർക്കാർ ലക്ഷ്യമിടുന്നത്. ഇതോടൊപ്പം വിക്ടോറിയ ആശുപത്രിയിലെ പുതിയ എമർജൻസി റൂം നിർമ്മാണവും ഇതേ പദ്ധതിയുടെ ഭാഗമായി പുരോഗമിക്കുകയാണെന്ന് പ്രീമിയർ കൂട്ടിച്ചേർത്തു. മാർച്ച് മാസത്തോടെ ആശുപത്രിയുടെ നിർമ്മാണ പ്രവർത്തനങ്ങൾ സജീവമാകുമെന്നും ഇതിനായുള്ള കരാർ നടപടികൾ പൂർത്തിയായതായും അദ്ദേഹം അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി:https://chat.whatsapp.com/Ghtm5bIjsVN8SItyDlaj3Q?mode=wwt
New schools coming to Winnipeg and Brandon; construction to begin this week, Premier Wab Kinyu announces
