‘ജയിലിൽ ഇട്ടതുപോലെയുള്ള ജീവിതം’: ദിലീപ്-മഞ്ജു ബന്ധത്തിൽ പുതിയ വെളിപ്പെടുത്തൽ; ലിബർട്ടി ബഷീർ പറയുന്നു

കൊച്ചി: മലയാള സിനിമയിലെ താര ദമ്പതികളായിരുന്ന ദിലീപിന്റെയും മഞ്ജു വാര്യരുടെയും വിവാഹബന്ധം തകരാനുള്ള യഥാർത്ഥ കാരണങ്ങളെക്കുറിച്ചുള്ള ചർച്ചകൾക്ക് വർഷങ്ങൾക്കിപ്പുറവും അവസാനമാകുന്നില്ല. ഇരുവരും വ്യക്തിപരമായ കാര്യങ്ങൾ തുറന്നുപറയാൻ തയ്യാറാകാത്ത സാഹചര്യത്തിലും, സിനിമാ മേഖലയിലുള്ള ചിലരുടെ വെളിപ്പെടുത്തലുകൾ ഇടയ്ക്കിടെ സാമൂഹ്യ മാധ്യമങ്ങളിൽ വലിയ ചർച്ചയായി മാറാറുണ്ട്. ഈ പശ്ചാത്തലത്തിൽ, മുൻപ് പ്രൊഡ്യൂസേഴ്സ് അസോസിയേഷൻ പ്രസിഡന്റായിരുന്ന ലിബർട്ടി ബഷീർ ഒരു അഭിമുഖത്തിൽ നടത്തിയ നിർണായക വെളിപ്പെടുത്തലുകളാണ് ഇപ്പോൾ വീണ്ടും ശ്രദ്ധ നേടുന്നത്.

പ്രണയവിവാഹമായിരുന്നിട്ടും ദിലീപിന്റെ വീട്ടിൽ മഞ്ജു വാര്യർക്ക് ഒരു സ്വാതന്ത്ര്യവും ഉണ്ടായിരുന്നില്ലെന്നാണ് ലിബർട്ടി ബഷീർ വെളിപ്പെടുത്തുന്നത്. പലപ്പോഴും നേരിൽ കണ്ട അനുഭവങ്ങളുടെ അടിസ്ഥാനത്തിലാണ് അദ്ദേഹം ഇക്കാര്യം പറയുന്നത്. മഞ്ജുവിനെ ഒന്ന് ഫോണിൽ വിളിക്കാൻ പോലും വലിയ ബുദ്ധിമുട്ടായിരുന്നു. “ആരാണ്, എന്താണ്” എന്നെല്ലാം അന്വേഷിച്ചതിനുശേഷം മാത്രമേ ഫോൺ മഞ്ജുവിന് കൊടുത്തിരുന്നുള്ളൂ. വിളിക്കുമ്പോൾ ദിലീപിന്റെ അമ്മയോ സഹോദരിമാരോ ആണ് ഫോൺ എടുത്തിരുന്നത്. ഒരു ജയിലിൽ കിടക്കുന്നതിനു തുല്യമായ ജീവിതമായിരുന്നു മഞ്ജുവിന് ആ വീട്ടിൽ എന്നാണ് അദ്ദേഹം ആരോപിക്കുന്നത്.

ഇത്രയേറെ കെട്ടുപാടുകളിൽ ശ്വാസം മുട്ടി ജീവിച്ചിരുന്നിട്ടും മഞ്ജു വാര്യർ ഇതേക്കുറിച്ച് പൊതുവേദികളിലോ മറ്റോ ഒരക്ഷരം മിണ്ടാതിരുന്നത് അവരുടെ “തറവാടിത്തം” കൊണ്ടുമാത്രമാണ് എന്നും ലിബർട്ടി ബഷീർ പറയുന്നു. മഞ്ജു തന്നോട് കാര്യമായ വെളിപ്പെടുത്തലുകൾ ഒന്നും നടത്തിയിട്ടില്ല. എന്നാൽ ഒരു സംഭവം അദ്ദേഹം ഓർത്തെടുക്കുന്നുണ്ട്. ‘മീശമാധവൻ’ സിനിമയുടെ 125-ാം ദിവസത്തെ ആഘോഷം എറണാകുളത്തെ ഇന്റർനാഷണൽ ഹോട്ടലിൽ വെച്ച് നടന്ന ദിവസമായിരുന്നു അത്.
എല്ലാവരും ആഘോഷം കഴിഞ്ഞ് പോയെന്ന് കരുതി രാത്രി ഒരു മണിയോടടുത്ത് ഹോട്ടലിൽ നിന്ന് പുറത്തേക്ക് ഇറങ്ങുമ്പോളാണ് മഞ്ജുവിനെ കാണുന്നത്. അന്ന് മൂന്നോ നാലോ മാസം മാത്രം പ്രായമുള്ള മകൾ മീനാക്ഷിയെ ചേർത്തുപിടിച്ച് മഞ്ജു കരഞ്ഞുകൊണ്ട് നിൽക്കുകയായിരുന്നു. ‘എന്താണ് പോകാത്തത്?’ എന്ന് ചോദിച്ചപ്പോൾ ദിലീപിനെ കാണുന്നില്ല എന്നായിരുന്നു മറുപടി. തുടർന്ന് ദിലീപിനെ അന്വേഷിച്ച് പോയപ്പോൾ, അദ്ദേഹം മറ്റൊരു മുറിയുടെ ബാത്ത്‌റൂമിലിരുന്ന് കാവ്യാ മാധവനുമായി സംസാരിക്കുന്നത് താൻ കണ്ടു എന്ന് ബഷീർ വെളിപ്പെടുത്തുന്നു. അന്ന് താൻ ദിലീപിനെ രൂക്ഷമായി വിമർശിക്കുകയും ഉടൻ തന്നെ മഞ്ജുവിനെയും കുഞ്ഞിനെയും വീട്ടിൽ കൊണ്ടുപോയി വിടാൻ ആവശ്യപ്പെടുകയും ചെയ്തുവെന്നും അദ്ദേഹം പറഞ്ഞു. തന്റെ കാറിലാണ് അന്ന് മഞ്ജുവിനെ ദിലീപ് കയറ്റി വിട്ടതെന്നും അദ്ദേഹം ഓർത്തെടുത്തു.

ദിലീപിന് കാവ്യാ മാധവനുമായി ബന്ധമുണ്ടെന്ന് അന്നേ മഞ്ജുവിന് അറിയാമായിരുന്നെന്നും ഇത് പ്രണയിച്ച് വിവാഹം കഴിച്ച് കുഞ്ഞ് ജനിച്ചതിന് ശേഷമുള്ള സംഭവമാണെന്നും ലിബർട്ടി ബഷീർ പറയുന്നു. സാധാരണ ഒരു കലാകാരൻ മറ്റൊരു കലാകാരിയുമായിട്ടുള്ള സൗഹൃദം പോലെയൊന്നും ആയിരുന്നില്ല ഇരുവരുടെയും ബന്ധം. ദിലീപിന് കാവ്യയുമായി നേരത്തെ തന്നെ ശക്തമായ ബന്ധം ഉണ്ടായിരുന്നു. കാവ്യയില്ലാത്ത സിനിമയുടെ ലൊക്കേഷനിൽ പോലും അവർ വന്ന് താമസിച്ചിരുന്നതായും അദ്ദേഹം ആരോപിക്കുന്നു. അമേരിക്കയിൽ നടന്ന കലാപരിപാടികളുടെ വേളയിലും ഇതേ വിഷയവുമായി ബന്ധപ്പെട്ട് പ്രശ്നങ്ങൾ ഉണ്ടായി. ഈ ബന്ധത്തെക്കുറിച്ച് മഞ്ജു വാര്യർക്ക് മുൻപേ അറിയാമായിരുന്നുവെന്നും അദ്ദേഹം വെളിപ്പെടുത്തി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

'Life is like being put in prison': New revelation on Dileep-Manju relationship; says Liberty Basheer