നോവ സ്കോഷ്യയിൽ ഡ്രൈവിംഗ് ലൈസൻസ് നേടുന്ന നടപടിക്രമങ്ങൾ കൂടുതൽ ലളിതവും വേഗത്തിലുമാക്കി. റോഡ് ടെസ്റ്റുകൾ ബുക്ക് ചെയ്യുന്നതിനും റദ്ദാക്കുന്നതിനും മാറ്റിവെക്കുന്നതിനും പുതിയ ഓൺലൈൻ ടൂളിന് പ്രവിശ്യാ സർക്കാർ തുടക്കം കുറിച്ചു. ഇനി മുതൽ റോഡ് ടെസ്റ്റുകൾ ഓൺലൈനായി ബുക്ക് ചെയ്യാനും പണം അടക്കാനും സാധിക്കും. നേരത്തെ, ആക്സസ് നോവ സ്കോഷ്യ (Access Nova Scotia) കേന്ദ്രങ്ങളിലേക്ക് വിളിച്ച് മാത്രമായിരുന്നു ടെസ്റ്റുകൾ ബുക്ക് ചെയ്യാനും മാറ്റങ്ങൾ വരുത്താനും സാധിച്ചിരുന്നത്. ഈ മാറ്റം വിദേശ വിദ്യാർത്ഥികൾ ഉൾപ്പെടെയുള്ള ആയിരക്കണക്കിന് പുതിയ ഡ്രൈവർമാർക്ക് വലിയ ആശ്വാസമാണ് നൽകിയിരിക്കുന്നത്.
“ഒരു ഡ്രൈവിംഗ് ടെസ്റ്റിനായി തയ്യാറെടുക്കുന്നത് തന്നെ മതിയായ മാനസിക സമ്മർദ്ദം നൽകുന്ന കാര്യമാണ്.
ഓൺലൈനായി ബുക്ക് ചെയ്യാനുള്ള സൗകര്യം നൽകുന്നത് കാര്യങ്ങൾ ആളുകളുടെ നിയന്ത്രണത്തിലാക്കാനും, മൊത്തത്തിലുള്ള പ്രക്രിയ വേഗതയുള്ളതും ലളിതവും സമ്മർദ്ദരഹിതവുമാക്കാനും സഹായിക്കും,” സൈബർ സുരക്ഷാ-ഡിജിറ്റൽ സൊല്യൂഷൻസ് മന്ത്രി ജിൽ ബാൾസർ പറഞ്ഞു. ടെസ്റ്റ് ബുക്ക് ചെയ്യാനുള്ള ഈ എളുപ്പവഴി, പ്രത്യേകിച്ച് ജോലിത്തിരക്കുള്ള പ്രവാസികൾക്ക് ഒരു വിരൽത്തുമ്പിൽ കാര്യങ്ങൾ സാധ്യമാക്കാൻ ഉപകരിക്കും. ഈ വർഷം ജൂണിൽ ലോവർ സാക്വില്ലിൽ (Lower Sackville) ആരംഭിച്ച പുതിയ ഓൺലൈൻ സേവനം ഘട്ടം ഘട്ടമായി പ്രവിശ്യയിലെ മറ്റ് പ്രദേശങ്ങളിലേക്കും വ്യാപിപ്പിച്ചു. നിലവിൽ സ്റ്റാൻഡേർഡ് ഡ്രൈവർ ലൈസൻസിന് (standard driver’s licence) മാത്രമാണ് ഈ സൗകര്യം ലഭ്യമായിട്ടുള്ളതെങ്കിലും, ഈ വർഷം അവസാനത്തോടെ മറ്റ് എല്ലാ തരം ലൈസൻസുകൾക്കുമായി ഇത് വ്യാപിപ്പിക്കുമെന്ന് പ്രവിശ്യാ സർക്കാർ അറിയിച്ചു. നിലവിൽ റോഡ് ടെസ്റ്റിനുള്ള നിരക്ക് $52.54 (52.54 ഡോളർ) ആണ്.
ഈ മാറ്റം ഡ്രൈവിംഗ് സ്കൂളുകൾക്കും വിദ്യാർത്ഥികൾക്കും ഒരുപോലെ പ്രയോജനകരമാണെന്ന് ഡാർട്ട്മൗത്ത് ആസ്ഥാനമായുള്ള 360 ഡിഫൻസീവ് ഡ്രൈവിംഗ് സ്കൂളിന്റെ ഉടമ കെയ്ലി മാർഷൽ (Kaylee Marshall) അഭിപ്രായപ്പെട്ടു. “ഒരു ബിസിനസ് എന്ന നിലയിൽ ഇത് ഞങ്ങൾക്ക് വലിയ സഹായമാണ്, കൂടാതെ സ്വന്തം അപ്പോയിന്റ്മെന്റുകൾ സ്വയം കൈകാര്യം ചെയ്യുന്ന വ്യക്തിഗത ഡ്രൈവർമാർക്ക് ഇത് പ്രത്യേകിച്ചും സൗകര്യപ്രദമാണ്,” അവർ പറഞ്ഞു.
സേവനം ആരംഭിച്ച ശേഷം ഇതിനകം 4,600-ൽ അധികം റോഡ് ടെസ്റ്റുകൾ ഈ പുതിയ ഓൺലൈൻ സംവിധാനം വഴി ബുക്ക് ചെയ്യപ്പെട്ടു കഴിഞ്ഞു. ഇത് പുതിയ സംവിധാനം ജനങ്ങൾ ഇരു കൈയും നീട്ടി സ്വീകരിച്ചു എന്നതിന്റെ സൂചനയാണ്. ‘സർക്കാർ സേവനങ്ങൾ ജനങ്ങളിലേക്ക്’ എന്ന മുദ്രാവാക്യം യാഥാർത്ഥ്യമാക്കാനുള്ള നോവ സ്കോഷ്യ സർക്കാരിന്റെ ഈ ഡിജിറ്റൽ ചുവടുവെപ്പ്, മറ്റ് പ്രവിശ്യകൾക്കും ഒരു മാതൃകയാക്കാവുന്നതാണ്.
