ഒട്ടാവ: കാനഡയിലെ ലക്ഷക്കണക്കിന് മുതിർന്ന പൗരന്മാർക്ക് ലഭിക്കുന്ന ഓൾഡ് ഏജ് സെക്യൂരിറ്റി (OAS) പെൻഷൻ തുകയിൽ 2026 ഏപ്രിൽ മുതൽ നേരിയ വർദ്ധനവ്. വർഷത്തിൽ നാല് തവണയായി നടത്തുന്ന പരിഷ്കരണത്തിന്റെ ഭാഗമായാണ് ഏപ്രിൽ – ജൂൺ കാലയളവിൽ 0.1 ശതമാനം വർദ്ധനവ് നടപ്പിലാക്കുന്നത്. ഇതോടെ 2025 ഏപ്രിലിലെ തുകയുമായി താരതമ്യം ചെയ്യുമ്പോൾ ആകെ വർദ്ധനവ് 2.1 ശതമാനമായി ഉയർന്നു.
65 മുതൽ 74 വയസ്സുവരെയുള്ളവർക്ക് പ്രതിമാസം പരമാവധി 743.05 ഡോളർ വരെ ലഭിക്കും. 75 വയസ്സിന് മുകളിലുള്ളവർക്ക് 10 ശതമാനം അധിക ആനുകൂല്യം ലഭിക്കുന്നതിനാൽ അവരുടെ പ്രതിമാസ പെൻഷൻ 817.36 ഡോളറായി ഉയരും. ഏപ്രിൽ 28-നാണ് വർദ്ധിപ്പിച്ച തുക ആദ്യമായി ബാങ്ക് അക്കൗണ്ടുകളിൽ എത്തുക. ജീവിതച്ചെലവ് വർദ്ധിക്കുന്നത് കണക്കിലെടുത്ത് ഉപഭോക്തൃ വില സൂചിക (CPI) അടിസ്ഥാനമാക്കിയാണ് സർക്കാർ ഈ മാറ്റങ്ങൾ വരുത്തുന്നത്.
കുറഞ്ഞ വരുമാനമുള്ളവർക്ക് ലഭിക്കുന്ന ഗ്യാരന്റീഡ് ഇൻകം സപ്ലിമെന്റ് (GIS) തുകയിലും ഇതോടൊപ്പം വർദ്ധനവുണ്ടാകും. കാനഡയിൽ 10 വർഷമെങ്കിലും താമസിച്ച 65 വയസ്സ് തികഞ്ഞവർക്കാണ് ഈ ആനുകൂല്യത്തിന് അർഹതയുള്ളത്. 20 വർഷത്തിലധികം കാനഡയിൽ താമസിച്ചവർക്ക് രാജ്യം വിട്ട് പോയാലും ഈ പെൻഷൻ തുക തുടർന്നും ലഭിക്കും. കൃത്യസമയത്ത് ടാക്സ് റിട്ടേൺ ഫയൽ ചെയ്യുന്നവർക്ക് മാത്രമേ ജൂലൈ മാസത്തിൽ നടക്കുന്ന ജി.ഐ.എസ് പുനർനിർണ്ണയത്തിന്റെ ആനുകൂല്യം തടസ്സമില്ലാതെ ലഭിക്കുകയുള്ളൂ എന്നും അധികൃതർ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New OAS Payment Increase Coming In April 2026
