യുകെ സർക്കാരിന്റെ സുരക്ഷാ വിധിക്കെതിരെയുള്ള നിയമയുദ്ധം പരാജയപ്പെട്ടതിൽ പ്രിൻസ് ഹാരി കടുത്ത നിരാശ പ്രകടിപ്പിച്ചു. 2020-ൽ മുൻ കൺസർവേറ്റീവ് ഭരണകൂടം എടുത്ത തീരുമാനം പുതിയ ലേബർ സർക്കാർ പുനഃപരിശോധിക്കണമെന്ന് ഹാരി ആവശ്യപ്പെട്ടു. ഇപ്പോഴത്തെ സാഹചര്യത്തിൽ കുടുംബത്തെ യുകെയിലേക്ക് കൊണ്ടുവരുന്നത് അപകടകരമാണെന്ന് അദ്ദേഹം വ്യക്തമാക്കി.
സുരക്ഷാ തർക്കം കാരണം കിംഗ് ചാൾസുമായി ഇപ്പോൾ യാതൊരു ബന്ധവുമില്ലെന്ന് പ്രിൻസ് ഹാരി സ്ഥിരീകരിച്ചു. തന്റെ രാജകീയ പദവിക്ക് മാറ്റമൊന്നും സംഭവിച്ചിട്ടില്ലെന്നും, മുൻ പൊതു ഉദ്യോഗസ്ഥരെപ്പോലെ തനിക്കും ഉയർന്ന തലത്തിലുള്ള സുരക്ഷ ആവശ്യമാണെന്നും അദ്ദേഹം വാദിച്ചു. രാജകുടുംബാംഗമെന്ന നിലയിൽ തനിക്കും കുടുംബത്തിനും നേരെയുള്ള നിരവധി ഭീഷണികളുടെ തെളിവുകൾ ഉന്നയിച്ച് സുരക്ഷാ സംവിധാനം വെട്ടിക്കുറച്ചത് അനീതിയാണെന്ന് അദ്ദേഹം പ്രതികരിച്ചു.
“എന്റെ കുടുംബത്തിന്റെ സുരക്ഷയാണ് എന്റെ പ്രഥമ പരിഗണന. എങ്ങനെയാണ് ഒരു പിതാവെന്ന നിലയിൽ സ്വന്തം കുടുംബത്തെ അപകടകരമായ സാഹചര്യത്തിലേക്ക് കൊണ്ടുവരിക? അത് എനിക്ക് ചെയ്യാനാവില്ല,” എന്ന് പ്രിൻസ് ഹാരി അഭിമുഖത്തിൽ പറഞ്ഞു.നിയമപരമായ എല്ലാ അപ്പീലുകളും തള്ളപ്പെട്ടെങ്കിലും, പൊതുതാൽപര്യാർത്ഥം ഈ വിഷയം വീണ്ടും പരിഗണിക്കുമെന്ന് പുതിയ സർക്കാർ ഉറപ്പുനൽകണമെന്ന് പ്രിൻസ് ഹാരി ആവശ്യപ്പെട്ടു.
