മോങ്ക്ടൺ: ക്യുബെക്കിന് പുറത്തുള്ള കാനഡയുടെ ഇതര പ്രവിശ്യകളിലേക്കുള്ള ഫ്രഞ്ച് ഭാഷാ കുടിയേറ്റത്തിൽ (Francophone Immigration) രാജ്യം നിശ്ചയിച്ച ലക്ഷ്യം തുടർച്ചയായ നാലാം വർഷവും മറികടന്നതായി കാനഡ ഇമിഗ്രേഷൻ മന്ത്രി ലെന മെറ്റ്ലെജ് ദിയാബ് അറിയിച്ചു. 2025-ൽ അനുവദിച്ച സ്ഥിരതാമസ അനുമതികളിൽ 8.9 ശതമാനവും ഫ്രഞ്ച് സംസാരിക്കുന്നവർക്കാണ് ലഭിച്ചത്. ഫ്രഞ്ച് ഭാഷാ വൈദഗ്ധ്യമുള്ളവർക്കായി ഏർപ്പെടുത്തിയ പ്രത്യേക ഇമിഗ്രേഷൻ പദ്ധതികളുടെയും പ്രവിശ്യകളുടെ സഹകരണത്തിന്റെയും ഫലമായാണ് ഈ നേട്ടമെന്ന് മോങ്ക്ടണിൽ നടന്ന വാർത്താസമ്മേളനത്തിൽ മന്ത്രി വ്യക്തമാക്കി. 2029-ഓടെ ഈ നിരക്ക് 12 ശതമാനമായി ഉയർത്തുകയാണ് സർക്കാരിന്റെ ലക്ഷ്യം.
കുടിയേറ്റ നയത്തിന്റെ ഭാഗമായി 2026 മുതൽ പ്രവിശ്യകൾക്കും ടെറിട്ടറികൾക്കുമായി 5,000 ഫെഡറൽ സെലക്ഷൻ സ്ഥാനങ്ങൾ കൂടി അധികമായി അനുവദിക്കുമെന്ന് മന്ത്രി പ്രഖ്യാപിച്ചു. നിലവിലുള്ള പ്രൊവിൻഷ്യൽ നോമിനി പ്രോഗ്രാമിന് പുറമെയാണിത്. രാജ്യാന്തര തലത്തിലുള്ള പ്രഗത്ഭരായ ഉദ്യോഗസ്ഥരെ ആകർഷിക്കുന്നതിലൂടെ ഫ്രഞ്ച്, ഇംഗ്ലീഷ് ഭാഷകൾ കൈകാര്യം ചെയ്യുന്ന തൊഴിലാളികളുടെ ക്ഷാമം പരിഹരിക്കാൻ ഈ നീക്കം സഹായിക്കും.
കാനഡയിലെ ഫ്രഞ്ച് സംസാരിക്കുന്ന ന്യൂനപക്ഷ വിഭാഗങ്ങളുടെ ജനസംഖ്യാപരമായ വളർച്ചയും രാജ്യത്തിന്റെ സാമ്പത്തിക പുരോഗതിയും മുൻനിർത്തിയാണ് ഇത്തരം പരിഷ്കാരങ്ങൾ നടപ്പിലാക്കുന്നത്. അതേസമയം, കുടിയേറ്റത്തിനായുള്ള ‘എക്സ്പ്രസ് എൻട്രി’ സംവിധാനത്തിൽ ഫ്രഞ്ച് ഭാഷാ വിഭാഗത്തിന് നൽകുന്ന അമിത പ്രാധാന്യത്തെച്ചൊല്ലി വിദ്ഗ്ധർക്കിടയിൽ ചർച്ചകൾ സജീവമാണ്.
കനേഡിയൻ എക്സ്പീരിയൻസ് ക്ലാസ് (CEC) വഴിയുള്ള കുടിയേറ്റത്തിന് 500-ന് മുകളിൽ സി.ആർ.എസ് (CRS) സ്കോർ ആവശ്യമായി വരുമ്പോൾ, ഫ്രഞ്ച് വിഭാഗത്തിൽ സ്കോർ 400-ൽ താഴെയുള്ളവർക്കും സ്ഥിരതാമസത്തിന് അവസരം ലഭിക്കുന്നുണ്ട്. ഇത് സാമ്പത്തിക മത്സരക്ഷമതയെ ബാധിക്കുമെന്ന് ചിലർ ചൂണ്ടിക്കാട്ടുമ്പോൾ, ഫ്രഞ്ച് ഭാഷാ സമൂഹങ്ങളെ ശാക്തീകരിക്കാൻ ഇത്തരമൊരു നയം അനിവാര്യമാണെന്നാണ് സർക്കാരിന്റെ വാദം. പുതിയ പ്രഖ്യാപനങ്ങളുടെ കൂടുതൽ വിശദാംശങ്ങൾ വരും ദിവസങ്ങളിൽ ഇമിഗ്രേഷൻ വകുപ്പ് പുറത്തുവിടും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
new-francophone-immigration-announcement
