വാഷിംഗ്ടൺ: സെൻട്രൽ ഏഷ്യൻ രാജ്യമായ കസാഖിസ്ഥാൻ എബ്രഹാം ഉടമ്പടിയിൽ (Abraham Accords) ചേരുന്നതായി യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു, കസാഖിസ്ഥാൻ പ്രസിഡൻ്റ് കാസിം-ജോമാർട്ട് ടോകയേവ് എന്നിവരുമായി നടത്തിയ സംയുക്ത ടെലിഫോൺ സംഭാഷണത്തിന് പിന്നാലെ ട്രംപ് തന്നെയാണ് ഈ സുപ്രധാന വിവരം പുറത്തുവിട്ടത്. ട്രംപിന്റെ രണ്ടാമത്തെ ഭരണകാലത്ത് എബ്രഹാം ഉടമ്പടിയിൽ പങ്കുചേരുന്ന ആദ്യത്തെ രാജ്യമാണ് കസാഖിസ്ഥാൻ. ഉടമ്പടിക്ക് പുതിയ അംഗങ്ങളെ ലഭിക്കുന്നത് ലോകമെമ്പാടുമുള്ള രാജ്യങ്ങൾ തമ്മിൽ ബന്ധങ്ങൾ സ്ഥാപിക്കുന്നതിലെ സുപ്രധാനമായ മുന്നേറ്റമായിട്ടാണ് ട്രംപ് ഭരണകൂടം വിലയിരുത്തുന്നത്.
നിലവിൽ, യുഎഇ, ബഹ്റൈൻ, മൊറോക്കോ, സുഡാൻ എന്നീ രാജ്യങ്ങളാണ് എബ്രഹാം ഉടമ്പടിയിൽ അംഗങ്ങളായിട്ടുള്ളത്. കസാഖിസ്ഥാൻ്റെ വരവോടെ, മുസ്ലിം ഭൂരിപക്ഷ രാജ്യങ്ങളെ ഇസ്രായേലുമായി അടുപ്പിക്കാൻ ലക്ഷ്യമിടുന്ന ഈ സമാധാന ദൗത്യത്തിന് പുതിയ ഉണർവ് ലഭിക്കുമെന്നാണ് പ്രതീക്ഷ. ഉടമ്പടിയിൽ ഔദ്യോഗികമായി ഒപ്പുവെക്കുന്നതിനുള്ള സൈനിംഗ് സെറിമണി ഉടൻ പ്രഖ്യാപിക്കുമെന്നും, കൂടുതൽ രാജ്യങ്ങൾ “ശക്തമായ സഖ്യത്തിൽ” ചേരാൻ താൽപ്പര്യം പ്രകടിപ്പിച്ചിട്ടുണ്ടെന്നും ട്രംപ് തൻ്റെ പ്രസ്താവനയിൽ വ്യക്തമാക്കി. സ്ഥിരതക്കും വളർച്ചക്കും വേണ്ടി രാജ്യങ്ങളെ ഒരുമിപ്പിക്കുന്നതിൽ യഥാർത്ഥ പുരോഗതിയും ഫലങ്ങളും ഉണ്ടാകുന്നുണ്ടെന്നും അദ്ദേഹം കൂട്ടിച്ചേർത്തു.
1992-ൽ സോവിയറ്റ് യൂണിയനിൽ നിന്ന് സ്വാതന്ത്ര്യം നേടിയ ഉടൻ തന്നെ കസാഖിസ്ഥാൻ ഇസ്രായേലുമായി നയതന്ത്രബന്ധം സ്ഥാപിച്ചിരുന്നു. അതിനാൽത്തന്നെ, ഈ പുതിയ നീക്കം വെറുമൊരു നയതന്ത്ര ബന്ധത്തിനപ്പുറം ഇരു രാജ്യങ്ങളും തമ്മിലുള്ള സാമ്പത്തിക, പ്രതിരോധ, സാങ്കേതിക പങ്കാളിത്തം കൂടുതൽ വിപുലീകരിക്കുന്നതിനുള്ള കരാറായിരിക്കും. ഉസ്ബെക്കിസ്ഥാൻ പോലുള്ള മറ്റ് സെൻട്രൽ ഏഷ്യൻ രാജ്യങ്ങളും ഉടമ്പടിയിൽ ചേരാൻ സാധ്യതയുണ്ടെന്ന റിപ്പോർട്ടുകൾക്കിടയിലാണ് കസാഖിസ്ഥാൻ്റെ ഈ നിർണായക തീരുമാനം.
അടുത്തിടെ ഗാസയിൽ വെടിനിർത്തൽ നിലവിൽ വന്ന സാഹചര്യത്തിൽ, സൗദി അറേബ്യ പോലുള്ള പ്രാദേശിക ശക്തികളെ ഉടമ്പടിയിൽ എത്തിക്കാൻ യുഎസ് ശ്രമിക്കുന്നതിനിടെയുള്ള കസാഖിസ്ഥാൻ്റെ പ്രവേശനം ലോകശ്രദ്ധ ആകർഷിച്ചിരിക്കുകയാണ്. “സമാധാനം സ്ഥാപിക്കുന്നവർ അനുഗ്രഹിക്കപ്പെട്ടവർ” എന്ന വാക്കുകളോടെയാണ് ട്രംപ് തൻ്റെ പ്രഖ്യാപനം അവസാനിപ്പിച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New energy for peace treaty; Kazakhstan joins Abraham Accords
