അരുണാചൽ പ്രദേശിന്റെ കിഴക്കേ അറ്റത്ത്, ഇന്ത്യ-ചൈന-മ്യാൻമർ അതിർത്തികൾ സംഗമിക്കുന്ന മനോഹരമായൊരു താഴ്വരയുണ്ട് – ഡോങ് താഴ്വര. ഇന്ത്യയിൽ സൂര്യരശ്മികൾ ആദ്യമെത്തുന്ന ഈ ഭൂമിക്ക് ‘ഇന്ത്യയുടെ ഉദയസൂര്യന്റെ നാട്’ എന്ന വിശേഷണമുണ്ട്. സാധാരണ പുലർച്ചെ അഞ്ച് മണിക്കും ആറ് മണിക്കും ഇടയിൽ സൂര്യനുദിക്കുമ്പോൾ, ഡോങ്ങിൽ സൂര്യൻ രാവിലെ മൂന്നരയോടെ എത്തും. അതുകൊണ്ടുതന്നെ, നേരത്തെ ഉദിക്കുന്ന സൂര്യൻ വൈകുന്നേരം നാലരയോടെ തന്നെ അസ്തമിക്കുകയും ചെയ്യും. ഈ അതുല്യമായ കാഴ്ച കാണാൻ ലോകത്തിന്റെ വിവിധ ഭാഗങ്ങളിൽ നിന്നുള്ള സഞ്ചാരികൾ ഈ കൊച്ചു ഗ്രാമത്തിലേക്ക് എത്തുന്നു.
ഡോങ് താഴ്വരയുടെ സൗന്ദര്യം അതിന്റെ പ്രകൃതിയിലും സാഹസികതയിലുമാണ്. സമുദ്രനിരപ്പിൽ നിന്ന് ഏകദേശം 1240 മീറ്റർ ഉയരത്തിൽ സ്ഥിതി ചെയ്യുന്ന ഈ പ്രദേശം, ബ്രഹ്മപുത്രയുടെ പോഷകനദിയായ ലോഹിതും സതി നദിയും ചേരുന്നിടത്താണ്. മലനിരകളും, ഇടതൂർന്ന പൈൻ കാടുകളും, നദികളും ചേർന്ന് പ്രകൃതിയെ സ്നേഹിക്കുന്നവർക്ക് ഒരു വിരുന്നൊരുക്കുന്നു. ഡോങ്ങിലെ മനോഹരമായ സൂര്യോദയം കാണണമെങ്കിൽ ഏകദേശം 30-40 മിനിറ്റ് നീളുന്ന ഒരു ട്രെക്കിംഗ് ആവശ്യമാണ്.
വിദൂരവും, ദുർഘടവുമായ വഴികളാണ് ഡോങ്ങിലേക്കുള്ള യാത്രയെ വെല്ലുവിളിയാക്കുന്നത്. ദിബ്രുഗഢ് എയർപോർട്ടാണ് ഏറ്റവും അടുത്തുള്ള വിമാനത്താവളം. അവിടെ നിന്ന് റോഡ് മാർഗം വാളോങ്ങിലെത്തി, തുടർന്ന് കാൽനടയായി ഡോങ്ങിലേക്ക് പോകണം. പ്രകൃതി സൗന്ദര്യം മാത്രമല്ല, ചരിത്രപരമായ പ്രാധാന്യവും ഈ പ്രദേശത്തിനുണ്ട്. 1962-ലെ ഇന്ത്യാ-ചൈന യുദ്ധത്തിൽ നിർണ്ണായകമായ പല പോരാട്ടങ്ങൾക്കും സാക്ഷ്യം വഹിച്ച പ്രദേശമാണിത്. ഈ ഭൂമിയുടെ സൗന്ദര്യവും ചരിത്രവും ഒരുപോലെ സഞ്ചാരികളെ ആകർഷിക്കുന്നു.
New destination for tourists: The first place in India where the sun rises! Dong Valley is a dreamland
