ഒട്ടാവ: കാനഡയിലെ ഫെഡറൽ പൊതുസേവന രംഗത്ത് ജോലി ചെയ്യുന്നവർക്കായി സർക്കാർ പുതിയ ‘ഏർലി റിട്ടയർമെന്റ് ഇൻസെന്റീവ്’ (ERI) പദ്ധതിയുടെ ഔദ്യോഗിക വിവരങ്ങൾ പുറത്തുവിട്ടു. സാധാരണഗതിയിൽ നിശ്ചിത പ്രായത്തിന് മുൻപ് ജോലിയിൽ നിന്നും വിരമിക്കുമ്പോൾ പെൻഷൻ തുകയിൽ വലിയ കുറവ് സംഭവിക്കാറുണ്ട്. എന്നാൽ ഈ പദ്ധതിയിലൂടെ അർഹരായ ജീവനക്കാർക്ക് പെൻഷൻ വെട്ടിക്കുറയ്ക്കൽ ഇല്ലാതെ തന്നെ നേരത്തെ വിരമിക്കാനുള്ള സുവർണ്ണാവസരമാണ് ലഭിക്കുന്നത്. 2026 മാർച്ച് 27-ന് ആരംഭിച്ച അപേക്ഷാ നടപടികൾ ജൂലൈ 24 വരെ തുടരും. പദ്ധതി പ്രകാരം വിരമിക്കാൻ ആഗ്രഹിക്കുന്നവർ 2027 ജനുവരി 20-നകം ജോലിയിൽ നിന്നും ഒഴിയേണ്ടതുണ്ട്.
ഈ ആനുകൂല്യം ലഭിക്കുന്നതിനായി ജീവനക്കാരെ രണ്ട് വിഭാഗങ്ങളായി തിരിച്ചിട്ടുണ്ട്. 2012 ഡിസംബർ 31-ന് മുൻപ് പെൻഷൻ പ്ലാനിൽ ചേർന്നവർക്ക് 50 വയസ്സ് പൂർത്തിയാകണമെന്നതാണ് നിബന്ധന. എന്നാൽ 2013 ജനുവരി 1-ന് ശേഷമാണ് സർവീസിൽ പ്രവേശിച്ചതെങ്കിൽ അപേക്ഷകർക്ക് കുറഞ്ഞത് 55 വയസ്സ് പ്രായമുണ്ടായിരിക്കണം. രണ്ട് വിഭാഗത്തിൽപ്പെട്ടവർക്കും ഫെഡറൽ സർവീസിൽ മൊത്തം 10 വർഷത്തെ തൊഴിൽ പരിചയവും കുറഞ്ഞത് രണ്ട് വർഷത്തെ പെൻഷൻ വിഹിതവും ഉണ്ടായിരിക്കണം എന്നത് നിർബന്ധമാണ്. നിശ്ചിത കാലാവധിക്ക് മുൻപ് വിരമിക്കുമ്പോൾ ഓരോ വർഷത്തിനും അഞ്ച് ശതമാനം എന്ന കണക്കിൽ പെൻഷനിൽ വരാറുള്ള സ്ഥിരമായ കുറവ് ഈ പദ്ധതി വഴി ഒഴിവാക്കപ്പെടും.
അപേക്ഷാ നടപടികൾ പൂർണ്ണമായും ഓൺലൈൻ വഴിയാണ് നടക്കുന്നത്. അർഹരായ ജീവനക്കാർക്ക് ‘My GC Pension Portal’ വഴി അറിയിപ്പുകൾ ലഭിക്കും. പോർട്ടൽ സൗകര്യമില്ലാത്തവർക്ക് തപാൽ വഴിയും വിവരങ്ങൾ കൈമാറും. അപേക്ഷ സമർപ്പിക്കുന്നതിന് മുൻപ് ഓരോ ജീവനക്കാരും തങ്ങളുടെ വകുപ്പ് മേധാവികളുമായി സംസാരിക്കേണ്ടതുണ്ട്. എങ്കിലും വകുപ്പ് മേധാവികൾ രാജി സ്വീകരിച്ചു കഴിഞ്ഞാൽ പിന്നീട് അപേക്ഷ പിൻവലിക്കാൻ കഴിയില്ല എന്നത് പ്രത്യേകം ശ്രദ്ധിക്കേണ്ടതാണ്. ഏകദേശം 68,000 ജീവനക്കാർക്ക് ഈ പദ്ധതിയുടെ പ്രയോജനം ലഭിക്കുമെന്നാണ് സർക്കാർ കണക്കാക്കുന്നത്. പെൻഷൻ കാര്യങ്ങളിൽ കൂടുതൽ വ്യക്തത വരുത്താൻ സർക്കാർ പ്രത്യേക കൗൺസിലിംഗ് സൗകര്യവും ഒരുക്കിയിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New Canada Early Retirement Incentive – Who Qualifies And How It Works
