ന്യൂ ബ്രൺസ്വിക്ക്; പ്രവിശ്യയിലെ സ്കൂളുകളിൽ അധ്യാപകക്ഷാമം രൂക്ഷമാവുകയാണെന്നും, ഈ പ്രതിസന്ധി മറികടക്കാൻ സർക്കാർ അടിയന്തരമായി ഇടപെടണമെന്നും ആവശ്യപ്പെട്ട് ന്യൂ ബ്രൺസ്വിക്ക് ടീച്ചേഴ്സ് അസോസിയേഷൻ (NBTA) രംഗത്തെത്തി. പ്രവിശ്യക്കായുള്ള അധ്യാപകരെ നിലനിർത്തുന്നതിനും പുതിയ നിയമനങ്ങൾക്കുമുള്ള സമഗ്രമായ തന്ത്രം സർക്കാർ ഉടൻ പൂർത്തിയാക്കി പൊതുജനത്തിനായി പ്രസിദ്ധീകരിക്കണമെന്നാണ് NBTA യുടെ പ്രധാന ആവശ്യം. നിലവിൽ അധ്യാപകരെ നിലനിർത്തുക എന്നത് തങ്ങളുടെ ഒന്നാം നമ്പർ മുൻഗണനയാണെന്ന് NBTA പ്രസിഡന്റ് ഹൈദി റൈഡർ വ്യക്തമാക്കി.
അടുത്ത അഞ്ച് വർഷത്തിനുള്ളിൽ ആംഗ്ലോഫോൺ മേഖലയിലെ 1,300 അധ്യാപകരും കൂടാതെ 157 സ്കൂൾ പ്രിൻസിപ്പൽമാരും വൈസ് പ്രിൻസിപ്പൽമാരും വിരമിക്കാൻ യോഗ്യരാകുമെന്നാണ് NBTA യുടെ കണക്കുകൾ സൂചിപ്പിക്കുന്നത്. ഈ വലിയ വിടവ് സ്കൂളുകളുടെ പ്രവർത്തനത്തെ സാരമായി ബാധിക്കുമെന്ന ആശങ്കയും സംഘടന പങ്കുവെക്കുന്നു. നിലവിൽ തന്നെ പ്രവിശ്യയിലുടനീളമുള്ള 180-ൽ അധികം ക്ലാസ് മുറികൾ കൈകാര്യം ചെയ്യുന്നത് സർട്ടിഫൈഡ് അധ്യാപകരല്ല, മറിച്ച് സമൂഹത്തിൽ നിന്നുള്ള അംഗങ്ങളാണ്. ഇവർക്ക് ഈ മേഖലയിൽ തുടരുന്നതിന് ആവശ്യമായ പിന്തുണയും പരിശീലനവും ഉറപ്പാക്കണം.
പ്രൊഫഷണലുകളായ അധ്യാപകരെ പ്രവിശ്യയിൽ നിലനിർത്തുന്നതിനും പുതിയ നിയമനങ്ങൾ പ്രോത്സാഹിപ്പിക്കുന്നതിനുമായി NBTA നാല് പ്രധാന അടിസ്ഥാന കാര്യങ്ങൾ (Pillars) അടങ്ങിയ ശുപാർശകൾ സർക്കാരിന് സമർപ്പിച്ചിട്ടുണ്ട്. അധ്യാപകരുടെ അനുഭവങ്ങളിൽ നിന്നും പ്രതികരണങ്ങളിൽ നിന്നും രൂപപ്പെടുത്തിയ ഈ ശുപാർശകൾ ഐക്യരാഷ്ട്രസഭയുടെ ടീച്ചിങ് പ്രൊഫഷൻ സംബന്ധിച്ച അന്താരാഷ്ട്ര ശുപാർശകളുമായി യോജിക്കുന്നതാണെന്നും പ്രസിഡന്റ് റൈഡർ പറയുന്നു.
അടിസ്ഥാന കാര്യങ്ങൾ ഇവയാണ്:
അധ്യാപകർക്ക് അവരുടെ ജോലികൾ പൂർത്തിയാക്കാൻ മതിയായ സമയവും ഉപകരണങ്ങളും ഉറപ്പാക്കുക. യോഗ്യതയുള്ള പ്രൊഫഷണലുകളെ നിയമിക്കുകയും പഠനത്തിന് പ്രാധാന്യം നൽകുകയും ചെയ്യുക. പ്രൊഫഷനോടും പൊതു വിദ്യാഭ്യാസത്തോടുമുള്ള ബഹുമാനം വർദ്ധിപ്പിക്കുക. വിദ്യാർത്ഥികളുടെ വിജയത്തിന് അടിത്തറയിടുന്ന ഘടകങ്ങൾക്ക് പ്രാധാന്യം നൽകുക.
അധ്യാപകർക്ക് അവരുടെ ജോലികൾ പൂർത്തിയാക്കാൻ കൂടുതൽ സമയം നൽകുന്നതിനായി പ്രതിമാസം രണ്ട് പ്രൊഫഷണൽ ഡെവലപ്മെന്റ് (PD) ദിനങ്ങൾ അനുവദിക്കുന്ന ഒരു പൈലറ്റ് പ്രോഗ്രാം ചില സ്കൂളുകളിൽ ആരംഭിച്ചിരുന്നു. ഈ മാറ്റത്തിന് അധ്യാപകരിൽ നിന്ന് വളരെ നല്ല പ്രതികരണമാണ് ലഭിക്കുന്നതെന്ന് ഹൈദി റൈഡർ അറിയിച്ചു.
സഹപ്രവർത്തകരുമായി സഹകരിക്കാനും, വിദ്യാർത്ഥികളുടെ ആവശ്യങ്ങളോട് കൂടുതൽ പ്രതികരിക്കാനും, തങ്ങളുടെ ജോലി കൃത്യമായി ചെയ്യാനും ഈ സമയം ലഭിക്കുന്നത് സഹായകമാകുന്നു. ഈ പരിപാടി മുന്നോട്ട് പോകുമ്പോൾ ലഭ്യമാകുന്ന വിവരങ്ങൾക്കായി ആകാംഷയോടെ കാത്തിരിക്കുകയാണ് NBTA.
new-brunswick-teacher-shortage-180-classrooms-uncertified-teachers
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
