ഫ്രെഡറിക്ടൺ: ന്യൂ ബ്രൺസ്വിക്ക് പ്രവിശ്യയിലെ കുടിവെള്ള സുരക്ഷാ മാനദണ്ഡങ്ങൾ ഏഴ് വർഷത്തെ കാലതാമസത്തിന് ശേഷം പരിഷ്കരിച്ചു. കുടിവെള്ളത്തിലെ മാംഗനീസിന്റെ അളവ് സംബന്ധിച്ച ഹെൽത്ത് കാനഡയുടെ 2019-ലെ മാർഗ്ഗനിർദ്ദേശങ്ങൾക്കനുസൃതമായാണ് പുതിയ മാറ്റങ്ങൾ വരുത്തിയത്. കുട്ടികളുടെയും നവജാതശിശുക്കളുടെയും തലച്ചോറിന്റെ വളർച്ചയെ ദോഷകരമായി ബാധിക്കുന്ന അളവിൽ മാംഗനീസ് അടങ്ങിയിട്ടും മുൻപ് പ്രവിശ്യാ ലബോറട്ടറികൾ നൽകിയ റിപ്പോർട്ടുകളിൽ ആരോഗ്യ മുന്നറിയിപ്പുകൾ ഉൾപ്പെടുത്തിയിരുന്നില്ലെന്ന് ആക്ഷേപം ഉയർന്നിരുന്നു.
ന്യൂ ബ്രൺസ്വിക്കിലെ ജനസംഖ്യയുടെ 40 ശതമാനവും ആശ്രയിക്കുന്ന സ്വകാര്യ കിണറുകളിലെ ജലത്തിൽ മാംഗനീസിന്റെ സാന്നിധ്യം കൂടുതലാണെന്ന് കണ്ടെത്തിയിട്ടുണ്ട്. പ്രവിശ്യയിലെ ഏകദേശം 1.2 ലക്ഷം സ്വകാര്യ കിണറുകളിൽ 30 ശതമാനത്തിലും അനുവദനീയമായതിലും കൂടുതൽ അളവിൽ മാംഗനീസ് അടങ്ങിയിരിക്കാൻ സാധ്യതയുണ്ടെന്നാണ് ഔദ്യോഗിക കണക്കുകൾ സൂചിപ്പിക്കുന്നത്. ഹെൽത്ത് കാനഡ നിശ്ചയിച്ചിട്ടുള്ള 0.12 mg/L എന്ന പരിധിയേക്കാൾ എട്ട് മടങ്ങ് വരെ കൂടുതൽ മാംഗനീസ് പലയിടങ്ങളിലും കണ്ടെത്തിയിട്ടുണ്ട്.
സർക്കാർ ലാബുകളിൽ നിന്ന് ഒരേ ജല സാമ്പിളിന് വ്യത്യസ്ത റിപ്പോർട്ടുകൾ ലഭിക്കുന്നതിലെ വൈരുദ്ധ്യവും പരിഹരിച്ചതായി പരിസ്ഥിതി മന്ത്രി ഗില്ലെസ് ലെപേജ് വ്യക്തമാക്കി. മുൻപ് നേരിട്ട് ലാബിൽ നൽകുന്ന സാമ്പിളുകൾക്ക് ആരോഗ്യ മുന്നറിയിപ്പ് ലഭിച്ചിരുന്നെങ്കിലും സർവീസ് ന്യൂ ബ്രൺസ്വിക് വഴി നൽകുന്നവയ്ക്ക് കൃത്യമായ വിവരങ്ങൾ ലഭിച്ചിരുന്നില്ല. ഇനി മുതൽ സ്വകാര്യ കിണറുകളിലെയും മുൻസിപ്പൽ കുടിവെള്ള പദ്ധതികളിലെയും പരിശോധനാ റിപ്പോർട്ടുകൾക്ക് ഏകീകൃത ദേശീയ മാനദണ്ഡം ബാധകമായിരിക്കുമെന്ന് അദ്ദേഹം അറിയിച്ചു.
മാംഗനീസിന് പുറമെ അലുമിനിയം, ചെമ്പ്, ഈയം, സയാനോബാക്ടീരിയ ടോക്സിനുകൾ, ഗ്ലൈഫോസേറ്റ് പോലുള്ള കീടനാശിനികൾ എന്നിവയുടെ അളവ് സംബന്ധിച്ച മാർഗ്ഗനിർദ്ദേശങ്ങളും ഹെൽത്ത് കാനഡയുടെ മാനദണ്ഡങ്ങൾക്കനുസരിച്ച് പുതുക്കിയിട്ടുണ്ട്. കുടിവെള്ളത്തിൽ മാംഗനീസിന്റെ അളവ് കൂടുതലായി കണ്ടെത്തുന്നവർ ശുദ്ധീകരണ സംവിധാനങ്ങൾ ഏർപ്പെടുത്തണമെന്ന് അധികൃതർ നിർദ്ദേശിച്ചു. ഇതിനായി ഏകദേശം 1,500 ഡോളർ മുതൽ 2,800 ഡോളർ വരെ ചിലവ് വരുമെന്നാണ് സാങ്കേതിക വിദഗ്ധരുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Brunswick revises safety standards after seven years, now includes health warnings in laboratory reports
