മോങ്ക്ടൺ : ന്യൂ ബ്രൺസ്വിക്കിലെ തദ്ദേശ സ്വയംഭരണ സ്ഥാപനങ്ങൾ, വിദ്യാഭ്യാസ ബോർഡുകൾ, റൂറൽ അഡ്വൈസറി കമ്മിറ്റികൾ എന്നിവയിലേക്കുള്ള തിരഞ്ഞെടുപ്പ് പ്രചാരണത്തിന് തുടക്കമായി. മെയ് 11-ന് നടക്കുന്ന വോട്ടെടുപ്പിൽ 77 തദ്ദേശ ഭരണകൂടങ്ങളിലെ 588 കൗൺസിൽ സ്ഥാനങ്ങളിലേക്ക് 1,102 പേർ നാമനിർദ്ദേശ പത്രിക സമർപ്പിച്ചതായി ഇലക്ഷൻസ് ന്യൂ ബ്രൺസ്വിക് അറിയിച്ചു. മൂന്ന് വർഷം മുമ്പ് നടപ്പിലാക്കിയ ഭരണപരിഷ്കാരങ്ങൾക്ക് ശേഷമുള്ള രണ്ടാമത്തെ തിരഞ്ഞെടുപ്പാണിത്. ഫ്രെഡറിക്ടൺ, സെന്റ് ജോൺ, മോങ്ക്ടൺ തുടങ്ങിയ പ്രധാന നഗരങ്ങൾ ഉൾപ്പെടെ 52 ഇടങ്ങളിൽ മേയർ സ്ഥാനത്തേക്ക് ശക്തമായ മത്സരം നടക്കും. 25 മേയർ സ്ഥാനാർത്ഥികൾ എതിരില്ലാതെ തിരഞ്ഞെടുക്കപ്പെട്ടു.
സംസ്ഥാനത്തെ 211 കൗൺസിലർ സീറ്റുകളിലേക്ക് വോട്ടെടുപ്പ് നടക്കും. അതേസമയം, 136 സ്ഥാനങ്ങളിലേക്ക് എതിരില്ലാതെ സ്ഥാനാർത്ഥികൾ തിരഞ്ഞെടുക്കപ്പെട്ടു. രണ്ട് കൗൺസിൽ സീറ്റുകളിലേക്ക് ആരും പത്രിക നൽകാത്തതിനാൽ ഇവിടങ്ങളിൽ ശരത്കാലത്ത് ഉപതിരഞ്ഞെടുപ്പ് നടത്തേണ്ടി വരും. ഭരണപരിഷ്കാരത്തിലൂടെ 340 പ്രാദേശിക ഘടകങ്ങളെ 77 ഭരണകൂടങ്ങളായും 12 പുതിയ റൂറൽ ഡിസ്ട്രിക്റ്റുകളായും പുനഃസംഘടിപ്പിച്ചിരുന്നു. ഈ പരിഷ്കാരം ജനാധിപത്യ പങ്കാളിത്തം വർദ്ധിപ്പിച്ചോ എന്ന് ഈ തിരഞ്ഞെടുപ്പിലെ വോട്ടിംഗ് ശതമാനവും സ്ഥാനാർത്ഥികളുടെ എണ്ണവും വിലയിരുത്തി തീരുമാനിക്കുമെന്ന് സ്ട്രാറ്റജിക് സ്റ്റെപ്സ് ഇൻകോർപ്പറേറ്റഡ് വൈസ് പ്രസിഡന്റ് ക്രെയിഗ് പോളെറ്റ് വ്യക്തമാക്കി.
വിദ്യാഭ്യാസ ബോർഡ് തിരഞ്ഞെടുപ്പുകളിൽ ഇത്തവണ സ്ഥാനാർത്ഥികളുടെ കുറവ് രേഖപ്പെടുത്തിയിട്ടുണ്ട്. 68 ജില്ലാ വിദ്യാഭ്യാസ കൗൺസിൽ സീറ്റുകളിലേക്ക് 63 പേർ മാത്രമാണ് പത്രിക നൽകിയത്. 11 സീറ്റുകളിൽ മത്സരം നടക്കുമ്പോൾ 18 സീറ്റുകൾ ഒഴിഞ്ഞുകിടക്കുകയാണ്. 12 റൂറൽ ഡിസ്ട്രിക്റ്റ് അഡ്വൈസറി കമ്മിറ്റികളിൽ അഞ്ചെണ്ണത്തിൽ മാത്രമാണ് വോട്ടെടുപ്പ് ആവശ്യമായി വരുന്നത്. ഇവിടങ്ങളിൽ 26 പേർ എതിരില്ലാതെ തിരഞ്ഞെടുക്കപ്പെട്ടപ്പോൾ നാല് സ്ഥാനങ്ങളിലേക്ക് ആരും പത്രിക നൽകിയില്ല. വിദ്യാഭ്യാസ കൗൺസിലുകളിലും റൂറൽ അഡ്വൈസറി കമ്മിറ്റികളിലും ഒഴിഞ്ഞുകിടക്കുന്ന സീറ്റുകളിലേക്ക് പ്രവിശ്യാ ഭരണകൂടം പ്രതിനിധികളെ നിയമിക്കുമെന്ന് അധികൃതർ അറിയിച്ചു.
New Brunswick local elections: Over 1,000 candidates in the running; campaigning in full swing
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
