ടൊറന്റോ: ഉത്തര ധ്രുവമേഖലയിലെ സുരക്ഷാ വെല്ലുവിളികൾ നേരിടാൻ നാറ്റോ പുതുതായി ആരംഭിച്ച ‘ആർക്ക്ടിക് സെൻട്രി’ സംരംഭം സഖ്യത്തിന്റെ സ്ഥിരം സംവിധാനമാക്കണമെന്ന് കാനഡയുടെ വിദേശകാര്യ മന്ത്രി അനിത ആനന്ദ്. ടൊറന്റോയിൽ നടന്ന ‘ആർക്ക്ടിക് 360’ സമ്മേളനത്തിന്റെ ഉദ്ഘാടന പ്രസംഗത്തിലാണ് കാനഡ ഈ നിലപാട് വ്യക്തമാക്കിയത്. ഉത്തര അർദ്ധഗോളത്തിലെ (ഫാർ നോർത്ത്) സഖ്യരാജ്യങ്ങളുടെ സൈനിക പ്രവർത്തനങ്ങൾ ഏകോപിപ്പിക്കാനായി നാറ്റോ സുപ്രീം കമാൻഡർ ബുധനാഴ്ചയാണ് ഈ പുതിയ പദ്ധതി പ്രഖ്യാപിച്ചത്.
ആർക്ക്ടിക് മേഖലയിലെ സുരക്ഷ ഉറപ്പാക്കുന്നതിനൊപ്പം അംഗരാജ്യങ്ങളുടെ പ്രവർത്തനങ്ങൾ ഒരൊറ്റ കമാൻഡിന് കീഴിൽ കൊണ്ടുവരികയാണ് ഈ പദ്ധതിയുടെ ലക്ഷ്യം. ഗ്രീൻലാൻഡിൽ ഡെൻമാർക്ക് നടത്തുന്ന സൈനിക അഭ്യാസങ്ങൾ, നോർവെയുടെ ‘കോൾഡ് റെസ്പോൺസ്’ പരിശീലനം എന്നിവ ഉൾപ്പെടെയുള്ള പ്രവർത്തനങ്ങൾ ഇനി ആർക്ക്ടിക് സെൻട്രി വഴി ഏകോപിപ്പിക്കും. റഷ്യയും ചൈനയും ഈ മേഖലയിൽ സ്വാധീനം വർധിപ്പിക്കുന്ന പശ്ചാത്തലത്തിൽ, പ്രതിരോധ രംഗത്തെ വിടവുകൾ നികത്താൻ ഏകീകൃത കമാൻഡ് അത്യാവശ്യമാണെന്ന് നാറ്റോ സെക്രട്ടറി ജനറൽ മാർക്ക് റൂട്ടെയും വ്യക്തമാക്കി.
അമേരിക്കയിലെ വെർജീനിയയിലുള്ള നോർഫോൾക്ക് നാറ്റോ കമാൻഡ് ആസ്ഥാനമാക്കിയായിരിക്കും ആർക്ക്ടിക് സെൻട്രിയുടെ പ്രവർത്തനം. റഷ്യയുടെ മിസൈൽ ഭീഷണികൾ നേരിടാൻ ഗ്രീൻലാൻഡ് ഉൾപ്പെടെയുള്ള പ്രദേശങ്ങളുടെ പ്രതിരോധം ശക്തമാക്കേണ്ടതുണ്ടെന്ന് സൈനിക വിദഗ്ധർ ചൂണ്ടിക്കാട്ടുന്നു. നിലവിൽ യുക്രെയ്ൻ-റഷ്യ യുദ്ധം നാലാം വർഷത്തിലേക്ക് കടക്കുന്ന സാഹചര്യത്തിൽ, വടക്കൻ മേഖലയിലെ സുരക്ഷാ ഭീഷണികൾ അവഗണിക്കാൻ കഴിയില്ലെന്നും ഇത് സഖ്യരാജ്യങ്ങളുടെ കൂട്ടായ ഉത്തരവാദിത്തമാണെന്നും അനിത ആനന്ദ് കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
A defensive fortress amidst the ice; NATO with Arctic Sentry, Canada with support
