വാഷിംഗ്ടൺ: ബഹിരാകാശത്തെ അപകടകാരികളായ ഛിന്നഗ്രഹങ്ങളിൽ (Asteroids) നിന്ന് ഭൂമിയെ സംരക്ഷിക്കുന്നതിനായി നാസ നടത്തിയ ഡിഫ്ലെക്ഷൻ പരീക്ഷണം പ്രതീക്ഷിച്ചതിനേക്കാൾ വലിയ വിജയമായതായി ശാസ്ത്രലോകം. വിക്ഷേപിച്ച ബഹിരാകാശ പേടകം ഛിന്നഗ്രഹത്തിൽ ഇടിച്ചതിനെത്തുടർന്ന് അതിന്റെ സഞ്ചാരപഥത്തിൽ കാര്യമായ മാറ്റം ഉണ്ടായതായി ഗവേഷകർ വെളിപ്പെടുത്തി. അമേരിക്കയിലെ മേരിലാൻഡ് സർവകലാശാലയിലെയും നാസയിലെയും ശാസ്ത്രജ്ഞർ ഉൾപ്പെട്ട സംഘമാണ് പുതിയ പഠന റിപ്പോർട്ട് പുറത്തുവിട്ടത്.
2022-ൽ നടന്ന ‘ഡാർട്ട്’ (DART) മിഷന്റെ ഭാഗമായി ‘ഡിമോർഫോസ്’ എന്ന ചെറിയ ഛിന്നഗ്രഹത്തിലേക്കാണ് നാസ പേടകം ഇടിച്ചിറക്കിയത്. ഭൂമിയിൽ നിന്ന് 11 മില്ല്യൺ കിലോമീറ്റർ അകലെയുള്ള ഈ പാറക്കൂട്ടത്തിന് സെക്കൻഡിൽ 11.7 മൈക്രോൺ വേഗത കുറയ്ക്കാൻ ഈ കൂട്ടിയിടി സഹായിച്ചുവെന്ന് ‘സയൻസ് അഡ്വാൻസസ്’ ജേർണലിൽ പ്രസിദ്ധീകരിച്ച പഠനം പറയുന്നു. ഡിമോർഫോസ് അതിന്റെ മാതൃഗ്രഹമായ ‘ഡിഡിമോസിനെ’ ചുറ്റുന്ന ഭ്രമണപഥത്തിൽ മാറ്റം വരുത്തുക എന്നതായിരുന്നു പ്രാഥമിക ലക്ഷ്യം. എന്നാൽ, ഈ കൂട്ടിയിടിയുടെ ഫലമായി ഈ രണ്ട് ആസ്റ്ററോയിഡുകളും ചേർന്ന് സൂര്യനെ ചുറ്റുന്ന പൊതുവായ പാതയിലും മാറ്റം സംഭവിച്ചതായാണ് പുതിയ കണ്ടെത്തൽ.
ഭാവിയിൽ ഭൂമിക്ക് ഭീഷണിയായേക്കാവുന്ന വലിയ ഛിന്നഗ്രഹങ്ങളെ തകർക്കാതെ തന്നെ അവയുടെ ദിശ മാറ്റി വിടാൻ ഈ സാങ്കേതികവിദ്യയിലൂടെ സാധിക്കുമെന്ന് ശാസ്ത്രജ്ഞർ വ്യക്തമാക്കി. പേടകം ഇടിച്ചപ്പോൾ ഛിന്നഗ്രഹത്തിൽ നിന്ന് തെറിച്ചുപോയ പാറക്കഷണങ്ങളും പൊടിപടലങ്ങളും പേടകത്തിന് നൽകാൻ കഴിഞ്ഞതിനേക്കാൾ ഇരട്ടി ആഘാതം ആസ്റ്ററോയിഡിന് നൽകിയതാണ് ഈ വിജയത്തിന് പിന്നിലെ പ്രധാന കാരണം. നിലവിൽ ഭൂമിക്ക് നേരിട്ട് ആസ്റ്ററോയിഡ് ഭീഷണികളൊന്നുമില്ലെങ്കിലും, മുൻകരുതൽ എന്ന നിലയിൽ ഈ പരീക്ഷണം നിർണായകമാണെന്ന് പഠനത്തിന് നേതൃത്വം നൽകിയ റാഹിൽ മകാഡിയ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
New plan to save Earth; NASA's asteroid experiment a huge success
