വാഷിങ്ടൺ: ചന്ദ്രന്റെ ഭ്രമണപഥത്തിൽ സ്ഥാപിക്കാൻ ലക്ഷ്യമിട്ടിരുന്ന ലൂണാർ സ്പേസ് സ്റ്റേഷൻ പദ്ധതി താൽക്കാലികമായി നിർത്തിവെച്ചതായി അമേരിക്കൻ ബഹിരാകാശ ഏജൻസിയായ നാസ. പദ്ധതിക്ക് പകരം അടുത്ത ഏഴ് വർഷത്തിനുള്ളിൽ 20 ബില്യൺ ഡോളർ ചെലവിൽ ചന്ദ്രന്റെ ഉപരിതലത്തിൽ സ്ഥിരമായ ഒരു ബേസ് ക്യാമ്പ് നിർമ്മിക്കാനാണ് ഏജൻസിയുടെ പുതിയ തീരുമാനമെന്ന് നാസ അഡ്മിനിസ്ട്രേറ്റർ ജാരെഡ് ഐസക്മാൻ അറിയിച്ചു. നാസയിൽ നടന്ന യോഗത്തിലാണ് പ്രധാന ചന്ദ്രദൗത്യമായ ‘ആർട്ടെമിസ്’ പദ്ധതിയിൽ വരുത്തിയ ഈ നിർണ്ണായക മാറ്റങ്ങൾ അദ്ദേഹം പ്രഖ്യാപിച്ചത്.
ചന്ദ്രന്റെ ഭ്രമണപഥത്തിൽ ഗവേഷണ കേന്ദ്രമായും യാത്രികർക്ക് ചന്ദ്രനിലിറങ്ങാനുള്ള ട്രാൻസ്ഫർ സ്റ്റേഷനായും പ്രവർത്തിക്കേണ്ട ‘ലൂണാർ ഗേറ്റ്വേ’ എന്ന പദ്ധതിയാണ് ഇപ്പോൾ വേണ്ടെന്നു വെച്ചിരിക്കുന്നത്. ചന്ദ്രോപരിതലത്തിൽ മനുഷ്യർക്ക് ദീർഘകാലം തങ്ങാനും പ്രവർത്തിക്കാനും ആവശ്യമായ അടിസ്ഥാന സൗകര്യങ്ങൾ നേരിട്ട് ഒരുക്കുന്നതിനാണ് മുൻഗണനയെന്ന് ഐസക്മാൻ വ്യക്തമാക്കി. നോർത്രോപ്പ് ഗ്രമ്മൻ, ഇൻട്യൂറ്റീവ് മെഷീൻസ് തുടങ്ങിയ കമ്പനികളുമായി ചേർന്ന് സ്പേസ് സ്റ്റേഷനായി നിർമ്മിച്ച ഘടകങ്ങൾ പുതിയ പദ്ധതിക്കായി എങ്ങനെ ഉപയോഗിക്കാം എന്നതിനെക്കുറിച്ച് ഏജൻസി ചർച്ചകൾ നടത്തിവരികയാണ്.
ബഹിരാകാശ രംഗത്ത് ചൈന ഉയർത്തുന്ന കടുത്ത വെല്ലുവിളിയാണ് നാസയുടെ ഈ പെട്ടെന്നുള്ള നീക്കത്തിന് പിന്നിലെന്നാണ് വിലയിരുത്തപ്പെടുന്നത്. 2030-ഓടെ ചന്ദ്രനിൽ സ്വന്തം ദൗത്യം എത്തിക്കാൻ ചൈന വേഗത്തിൽ നീങ്ങുന്ന സാഹചര്യത്തിൽ, അമേരിക്കയും തങ്ങളുടെ ലക്ഷ്യങ്ങളിൽ മാറ്റം വരുത്തുകയായിരുന്നു. വൻതുകയുടെ കരാറുകളിൽ പുനഃക്രമീകരണം വേണ്ടിവരുമെങ്കിലും അന്താരാഷ്ട്ര പങ്കാളിത്തത്തോടെ നിശ്ചിത സമയത്തിനുള്ളിൽ ചന്ദ്രോപരിതലത്തിലെ ബേസ് പൂർത്തിയാക്കാൻ കഴിയുമെന്നാണ് നാസയുടെ പ്രതീക്ഷ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
No Lunar Gateway; NASA to build $20 billion base camp on the Moon instead
