ക്ലാസ്സ് മുറിയിലെ കൊലക്കയറുകൾ; ഡോക്ടറാകാൻ പോയ നിതിൻ നെടുമങ്ങാട്ടെ വീട്ടിലെത്തിയത് ചേതനയറ്റ്, ഉള്ളുരുകി നാട്

അഞ്ചരക്കണ്ടി: അഞ്ചരക്കണ്ടി ഡെന്റൽ കോളേജിലെ ബിഡിഎസ് ഒന്നാം വർഷ വിദ്യാർത്ഥി നിതിൻ രാജ് ആത്മഹത്യ ചെയ്യുന്നതിന് മുൻപ് സുഹൃത്തിനയച്ച ഞെട്ടിക്കുന്ന ശബ്ദസന്ദേശം പുറത്തുവന്നു. കോളേജിലെ സ്റ്റാഫ് റൂം അധ്യാപകർ കൂട്ടത്തോടെ വിദ്യാർത്ഥികളെ അധിക്ഷേപിക്കുന്ന ഇടമാണെന്നും തന്നെ ‘വിഡ്ഢി’ എന്ന് വിളിച്ചതായും നിതിൻ സന്ദേശത്തിൽ പറയുന്നു. അമ്മയെയും അമ്മയുടെ ശസ്ത്രക്രിയയെയും കുറിച്ച് അധ്യാപകൻ ക്ലാസ്സിൽ പരിഹസിച്ചതായും ഇതിനെതിരെ പ്രതികരിച്ചതാണ് ശത്രുതയ്ക്ക് കാരണമായതെന്നും ശബ്ദരേഖയിൽ വ്യക്തമാക്കുന്നുണ്ട്.

കോളേജിന് പുറത്തിറങ്ങിയാൽ കൈയ്യും കാലും വെട്ടുമെന്നും അവയവങ്ങളില്ലാതെ ജീവിക്കേണ്ടി വരുമെന്നും അധ്യാപകൻ ഭീഷണിപ്പെടുത്തിയതായി നിതിൻ പറയുന്നു. ഇന്റേണൽ മാർക്ക് കുറച്ചത് കുടുംബത്തിന് നൽകുന്ന ‘സർപ്രൈസ്’ ആണെന്നായിരുന്നു അധ്യാപകരുടെ പരിഹാസം. ക്ലാസ്സിലെ ഭൂരിഭാഗം പേരും അധ്യാപകരുടെ അടിമകളാണെന്നും എന്നാൽ താൻ അങ്ങനെയാകാൻ തയ്യാറല്ലെന്ന് മുഖത്തുനോക്കി പറഞ്ഞതായും നിതിൻ സുഹൃത്തിനോട് വെളിപ്പെടുത്തി. ക്രൂരമായ മാനസിക പീഡനമാണ് നിതിൻ അനുഭവിച്ചിരുന്നതെന്ന് ഈ സന്ദേശം അടിവരയിടുന്നു.

നിതിന്റെ മരണത്തിൽ അനാട്ടമി വിഭാഗം മേധാവി ഡോ. എം.കെ. റാം ഉൾപ്പെടെയുള്ളവർക്കെതിരെ ഗുരുതര ആരോപണങ്ങളുമായി കുടുംബം രംഗത്തെത്തി. ജാതിയുടെയും നിറത്തിന്റെയും പേരിൽ നിതിനെ എച്ച്ഒഡി നിരന്തരം അധിക്ഷേപിച്ചിരുന്നതായി പിതാവ് രാജൻ ആരോപിച്ചു. മകനെ ‘പുഴുത്ത പട്ടി’ എന്നും ‘തെരുവ് പട്ടി’ എന്നും അധ്യാപകർ വിളിച്ചിരുന്നതായും ഇവിടെ പഠിക്കാൻ നിനക്ക് എന്ത് അർഹതയാണുള്ളതെന്ന് ചോദിച്ചതായും മാതാപിതാക്കൾ മാധ്യമങ്ങളോട് പറഞ്ഞു.

സീനിയർ വിദ്യാർത്ഥികളിൽ നിന്ന് റാഗിംഗ് നേരിട്ടതായും കുടുംബം സംശയിക്കുന്നു.

ആരോപണവിധേയരായ അനാട്ടമി വിഭാഗം മേധാവി ഡോ. എം.കെ. റാം, അസോസിയേറ്റ് പ്രൊഫസർ ഡോ. സംഗീത എന്നിവരെ അന്വേഷണ വിധേയമായി സസ്പെൻഡ് ചെയ്തിട്ടുണ്ട്. കോളേജിന്റെ ഭാഗത്തുനിന്ന് ആഭ്യന്തര അന്വേഷണ സമിതിയും രൂപീകരിച്ചു. നിതിൻ ആത്മഹത്യ ചെയ്യില്ലെന്നും കോളേജ് അധികൃതർ മരണവിവരം കൃത്യസമയത്ത് അറിയിച്ചില്ലെന്നും സഹോദരീ ഭർത്താവ് അശോക് കുമാർ ആരോപിച്ചു. ഒരു ഡോക്ടറായി മടങ്ങിവരുമെന്ന് പ്രതീക്ഷിച്ചിരുന്ന മകന്റെ മരണവിവരം വാർത്തകളിലൂടെയാണ് കുടുംബം അറിഞ്ഞത്.

നിതിൻ രാജിന്റെ മൃതദേഹം തിരുവനന്തപുരം നെടുമങ്ങാട്ടെ വീട്ടിലെത്തിച്ചപ്പോൾ അതിവൈകാരികമായ രംഗങ്ങളാണ് അരങ്ങേറിയത്. മകന്റെ ചേതനയറ്റ ശരീരം കണ്ട് മാതാപിതാക്കൾ തളർന്നുവീണു. പഠനത്തിൽ മിടുക്കനായിരുന്ന നിതിന്റെ വേർപാട് നാടിനെ ഒന്നാകെ കണ്ണീരിലാഴ്ത്തി. കുറ്റക്കാർക്കെതിരെ കർശന നടപടി വേണമെന്നും ഇത്തരം ക്രൂരതകൾ ഇനിയൊരു വിദ്യാർത്ഥിക്കും ഉണ്ടാകരുതെന്നുമുള്ള ആവശ്യവുമായി നാട്ടുകാരും ബന്ധുക്കളും പ്രതിഷേധത്തിലാണ്.

Murderous cords in the classroom; Nithin, who went to become a doctor, returned home to Nedumangad, a place of horrors

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt