സെന്റ് ജോൺസ്: ന്യൂഫൗണ്ട്ലാൻഡ് ജൂനിയർ ഹോക്കി ലീഗിൽ താരങ്ങൾ തമ്മിലുണ്ടായ കൂട്ടത്തല്ലിനെത്തുടർന്ന് 18 താരങ്ങൾക്കും പരിശീലകർക്കും കടുത്ത ശിക്ഷാ നടപടി. മാർച്ച് 7-ന് സെന്റ് ജോൺസ് ജൂനിയർ ക്യാപ്സും സതേൺ ഷോർ ജൂനിയർ ബ്രേക്കേഴ്സും തമ്മിൽ നടന്ന മത്സരമാണ് സംഘർഷത്തിൽ കലാശിച്ചത്. സംഭവത്തിൽ ആകെ 53 മത്സരങ്ങളിൽ നിന്നാണ് താരങ്ങളെ വിലക്കിയത്. കളിക്കളത്തിലുണ്ടായ അക്രമസംഭവങ്ങൾ മേഖലയിലെ ഹോക്കി ടൂർണമെന്റുകളുടെ പ്രതിച്ഛായയ്ക്ക് മങ്ങലേൽപ്പിച്ചതായി ലീഗ് അധികൃതർ വ്യക്തമാക്കി.
ക്വാർട്ടർ ഫൈനൽ പോരാട്ടത്തിന്റെ മൂന്നാം പാദത്തിലായിരുന്നു നാടകീയ സംഭവങ്ങൾ അരങ്ങേറിയത്. മത്സരത്തിൽ ജൂനിയർ ക്യാപ്സ് 2-0 ന് മുന്നിട്ടുനിൽക്കെ താരങ്ങൾ തമ്മിൽ ഉരസുകയും ഇത് വലിയ കൈയാങ്കളിയിലേക്ക് നീങ്ങുകയുമായിരുന്നു. രണ്ട് ടീമുകളിലെയും നാല് ഗോൾകീപ്പർമാരും അടിപിടിയിൽ ഏർപ്പെട്ടതോടെ റെഫറിമാർക്ക് കളി നിയന്ത്രിക്കാനാവാതെ വന്നു. ഇതേത്തുടർന്ന് മൂന്നാം പിരീഡിന്റെ തുടക്കത്തിൽ തന്നെ മത്സരം ഉപേക്ഷിക്കാൻ അധികൃതർ നിർബന്ധിതരായി.
താരങ്ങൾ ഗ്ലൗസുകൾ അഴിച്ചുമാറ്റി പരസ്പരം ഇടിക്കുന്ന ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. “ഇത് തികച്ചും ലജ്ജാകരമാണ്. ഹോക്കിയിൽ സ്വാഭാവികമായി ഉണ്ടാകാറുള്ള ചെറിയ തർക്കങ്ങളല്ല ഇവിടെ കണ്ടത്. ഇത്തരം പ്രവണതകൾ ലീഗിൽ അനുവദിക്കില്ല,” എന്ന് സെന്റ് ജോൺസ് ജൂനിയർ ഹോക്കി ലീഗ് വൈസ് പ്രസിഡന്റ് ബോയിഡ് ഹില്ലിയർ പറഞ്ഞു.
സാധാരണ ഗതിയിൽ ഒരു മത്സരത്തിൽ ശരാശരി 45 മിനിറ്റ് മാത്രം പെനാൽറ്റി രേഖപ്പെടുത്താറുള്ള സ്ഥാനത്ത്, ഈ മത്സരത്തിൽ ആകെ 572 മിനിറ്റാണ് റെഫറിമാർ ശിക്ഷാ നടപടിയായി വിധിച്ചത്. ഇതിൽ ബ്രേക്കേഴ്സ് ടീമിന് 324 മിനിറ്റും ക്യാപ്സ് ടീമിന് 248 മിനിറ്റും പെനാൽറ്റി ലഭിച്ചു. അക്രമത്തിന് തുടക്കമിട്ടത് ബ്രേക്കേഴ്സ് താരങ്ങളാണെന്ന ലീഗ് അധികൃതരുടെ ആരോപണം ടീം മാനേജ്മെന്റ് നിഷേധിച്ചിട്ടുണ്ട്. സസ്പെൻഷൻ നടപടികൾക്കെതിരെ അപ്പീൽ നൽകാനാണ് ബ്രേക്കേഴ്സ് ടീമിന്റെ തീരുമാനം.
സസ്പെൻഷൻ ലഭിച്ച 18 പേരിൽ 12 പേരും ബ്രേക്കേഴ്സ് ടീമിൽ നിന്നുള്ളവരാണ്. ഇവർക്ക് മൊത്തം 45 മത്സരങ്ങളിൽ വിലക്കേർപ്പെടുത്തി. ക്യാപ്സ് ടീമിലെ ആറ് പേർക്ക് 8 മത്സരങ്ങളിലെ വിലക്കും ലഭിച്ചു. ശിക്ഷാ നടപടികൾ നേരിടുന്ന ചില താരങ്ങൾക്ക് അടുത്ത സീസണിലെ ആദ്യ അഞ്ച് മത്സരങ്ങൾ വരെ നഷ്ടമാകും. ഇത് ടീമുകളെ സംബന്ധിച്ചിടത്തോളം വലിയ തിരിച്ചടിയാണ്. നേരത്തെ 2023-ലും സമാനമായ അച്ചടക്ക ലംഘനങ്ങളെത്തുടർന്ന് ന്യൂഫൗണ്ട്ലാൻഡിലെ ഹോക്കി മത്സരങ്ങൾക്ക് ശേഷം താരങ്ങൾ തമ്മിലുള്ള ഹസ്തദാനം താൽക്കാലികമായി നിരോധിച്ചിരുന്നു.
multi-brawl-game-that-drew-572-penalty-minutes-a-black-eye-on-nl-hockey-official
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
