“പരിഹാസമല്ല, വേണ്ടത് നീതി”; ലിംഗന്യൂനപക്ഷ പോരാട്ടത്തെ എതിർക്കുന്നവരുടെ വായടപ്പിച്ച് എംപി ലിയ ഗസൻ

വിന്നിപെഗ്: ഫസ്റ്റ് നേഷൻ വിഭാഗത്തിലെ സ്ത്രീകൾക്കും ലിംഗന്യൂനപക്ഷങ്ങൾക്കും നേരെയുള്ള അതിക്രമങ്ങളെ പരിഹസിക്കുന്നവർക്കെതിരെ കടുത്ത ഭാഷയിൽ പ്രതികരിച്ച് എൻഡിപി എംപി ലിയ ഗസൻ. യഥാർത്ഥ പ്രശ്നങ്ങളിൽ നിന്ന് ജനങ്ങളുടെ ശ്രദ്ധ തിരിക്കാനാണ് സോഷ്യൽ മീഡിയയിൽ ഇത്തരം വിവാദങ്ങൾ ഉണ്ടാക്കുന്നതെന്ന് ഒട്ടാവയിൽ നടത്തിയ വാർത്താസമ്മേളനത്തിൽ മാനിറ്റോബ എംപി പറഞ്ഞു.

ഫസ്റ്റ് നേഷൻ സ്ത്രീകൾക്കും ട്രാൻസ്‌ജെൻഡർ ഉൾപ്പെടെയുള്ള വിഭാഗങ്ങൾക്കും നേരെ നടക്കുന്ന അതിക്രമങ്ങളെ ‘തുടർച്ചയായ വംശഹത്യ’ എന്ന് ലിയ ഗസൻ വിശേഷിപ്പിച്ചിരുന്നു. ഇതിനെതിരെ ഇലോൺ മസ്ക് അടക്കമുള്ളവർ രംഗത്തെത്തിയതോടെയാണ് വിഷയം ചർച്ചയായത്. എന്നാൽ, തുല്യനീതിക്ക് വേണ്ടിയുള്ള തന്റെ നിലപാടുകളിൽ എതിർപ്പുള്ളവർ വെറും വിദ്വേഷം പ്രചരിപ്പിക്കുന്നവരാണെന്നും, രാജ്യത്തെ വർഗീയത അവസാനിപ്പിക്കാനാണ് താൻ ശ്രമിക്കുന്നതെന്നും അവർ വ്യക്തമാക്കി.

ഈ വിഭാഗങ്ങളുടെ സുരക്ഷയ്ക്കായി സർക്കാർ നൽകിവന്ന ഫണ്ട് വെട്ടിക്കുറച്ചതാണ് ഇപ്പോഴത്തെ പ്രധാന പ്രതിസന്ധിയെന്ന് ലിയ ഗസൻ ചൂണ്ടിക്കാട്ടി. പ്രധാനമന്ത്രി മാർക്ക് കാർണിയുടെ ഈ തീരുമാനത്തിനെതിരെ വലിയ പ്രതിഷേധമാണ് ഉയരുന്നത്. പദപ്രയോഗങ്ങളെ ചൊല്ലി തർക്കമുണ്ടാക്കുന്നത് വിഷയത്തിന്റെ ഗൗരവം കുറയ്ക്കാനാണെന്ന് മുൻ അന്വേഷണ കമ്മീഷണർ മരിയൻ ബുള്ളറും പറഞ്ഞു. ഫസ്റ്റ് നേഷൻ ജനതയ്ക്കെതിരായ അതിക്രമങ്ങൾ തടയാൻ സർക്കാർ ഉടൻ ഇടപെടണമെന്നാണ് മനുഷ്യാവകാശ പ്രവർത്തകരുടെ പ്രധാന ആവശ്യം.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

"We need justice, not ridicule"; MP Leah Gasan silences those opposing the fight for gender equality