പറക്കും തളികയോ അതോ അന്യഗ്രഹ ജീവികളോ?; കാനഡയെ അമ്പരപ്പിച്ച് ആകാശത്തെ ആ വിചിത്ര കാഴ്ചകൾ, കഴിഞ്ഞ വർഷം മാത്രം റിപ്പോർട്ട് ചെയ്തത് ആയിരത്തിലധികം യുഎഫ്‌ഒ ദൃശ്യങ്ങൾ

ഒട്ടാവ: കാനഡയുടെ ആകാശത്ത് അജ്ഞാത പറക്കും തളികകളുടെയും (UFO) വിശദീകരിക്കാനാവാത്ത പ്രകാശ ഗോളങ്ങളുടെയും സാന്നിധ്യം വർധിക്കുന്നതായി റിപ്പോർട്ട്. 2025-ൽ മാത്രം കാനഡയുടെ വിവിധ ഭാഗങ്ങളിൽ നിന്നായി 1,052 യുഎഫ്‌ഒ ദൃശ്യങ്ങളാണ് റിപ്പോർട്ട് ചെയ്യപ്പെട്ടിട്ടുള്ളത്. മുൻവർഷത്തെ അപേക്ഷിച്ച് അജ്ഞാത പേടകങ്ങളെ കണ്ടതായി അവകാശപ്പെടുന്നവരുടെ എണ്ണത്തിൽ വർധനവുണ്ടായതായി ‘കനേഡിയൻ യുഎഫ്‌ഒ സർവേ’യുടെ (Canadian UFO Survey) പുതിയ കണക്കുകൾ വ്യക്തമാക്കുന്നു.

തിങ്കളാഴ്ചയാണ് ഇതുസംബന്ധിച്ച വാർഷിക റിപ്പോർട്ട് പുറത്തുവിട്ടത്.
റിപ്പോർട്ട് ചെയ്യപ്പെട്ട ദൃശ്യങ്ങളിൽ ഭൂരിഭാഗവും നക്ഷത്രങ്ങളോ വിമാനങ്ങളോ ഉപഗ്രഹങ്ങളോ ആയി തിരിച്ചറിഞ്ഞെങ്കിലും, ഏകദേശം മൂന്ന് ശതമാനം കേസുകളിൽ ശാസ്ത്രീയമായ വിശദീകരണം നൽകാൻ ഗവേഷകർക്ക് സാധിച്ചിട്ടില്ല. വിമാന പൈലറ്റുമാർ, പോലീസ് ഉദ്യോഗസ്ഥർ, അധ്യാപകർ തുടങ്ങി സമൂഹത്തിന്റെ വിവിധ മേഖലയിലുള്ളവർ ഇത്തരം ദൃശ്യങ്ങൾക്ക് സാക്ഷികളായിട്ടുണ്ട്. ഇതിൽ പകുതിയിലധികം റിപ്പോർട്ടുകളും ആകാശത്തെ വിചിത്രമായ വെളിച്ചങ്ങളെക്കുറിച്ചുള്ളതാണ്. കൂടാതെ ഗോളാകൃതിയിലും ത്രികോണാകൃതിയിലുമുള്ള പേടകങ്ങൾ കണ്ടതായും റിപ്പോർട്ടിലുണ്ട്.

വിഷയത്തിൽ ദീർഘകാലമായി ഗവേഷണം നടത്തുന്ന ക്രിസ് റുട്‌കോവ്‌സ്കിയുടെ നേതൃത്വത്തിലാണ് വിവരങ്ങൾ ശേഖരിച്ചത്. ഇതിൽ സസ്‌കാച്ചെവൻ പ്രവിശ്യയിൽ ഹൈവേയ്ക്ക് മുകളിലായി 20 അടി ഉയരത്തിൽ വെള്ളി നിറത്തിലുള്ള തളികാ രൂപം കണ്ടതായും, ഒന്റാറിയോയിൽ ഓറഞ്ച് നിറത്തിലുള്ള വജ്ര ആകൃതിയിലുള്ള വസ്തു പെട്ടെന്ന് ഗോളമായി മാറി ആകാശത്തേക്ക് മറഞ്ഞതായും സാക്ഷികൾ പറയുന്നു.

ട്രാൻസ്‌പോർട്ട് കാനഡയുടെ ഏവിയേഷൻ ഡാറ്റാബേസിലും ഇത്തരം 18 സംഭവങ്ങൾ രേഖപ്പെടുത്തിയിട്ടുണ്ട്. വാൻകൂവർ വിമാനത്താവളത്തിന് സമീപം വെളിച്ചമില്ലാത്ത ഒരു വിചിത്ര യന്ത്രരൂപം കണ്ടതായി പൈലറ്റുമാരും സാക്ഷ്യപ്പെടുത്തി. യുഎഫ്‌ഒ (UFO) എന്ന പദത്തിന് പകരം നിലവിൽ ഔദ്യോഗിക വൃത്തങ്ങൾ യുഎപി (Unidentified Aerial Phenomena – UAP) എന്ന പേരാണ് ഉപയോഗിക്കുന്നത്. കാനഡയിലെ ഇത്തരം സംഭവങ്ങളെക്കുറിച്ച് പഠിക്കാൻ ഒരു പ്രത്യേക ഫെഡറൽ സംവിധാനം രൂപീകരിക്കണമെന്ന് സർക്കാർ ഉപദേശകർ നിർദ്ദേശിച്ചിട്ടുണ്ട്.

ഇത്തരം ദൃശ്യങ്ങൾ കാണുന്നവർ അത് റിപ്പോർട്ട് ചെയ്യാൻ മടിക്കരുതെന്നും കൂടുതൽ വിവരങ്ങൾ ലഭ്യമായാൽ മാത്രമേ ഈ പ്രതിഭാസങ്ങളെക്കുറിച്ച് വ്യക്തമായ ധാരണയിലെത്താൻ സാധിക്കൂ എന്നും ഗവേഷകർ ചൂണ്ടിക്കാട്ടുന്നു. 1989 മുതൽ ഇതുവരെ 26,000-ത്തിലധികം യുഎഫ്‌ഒ റിപ്പോർട്ടുകളാണ് കാനഡയിൽ മാത്രം റജിസ്റ്റർ ചെയ്തിട്ടുള്ളത്.

more-than-1000-ufos-reported-over-canada-in-2025-including-lights-and-triangles

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt