കനേഡിയൻ സർക്കാർ നടത്തിയ പുതിയ സർവേ പ്രകാരം, അവിടുത്തെ മിക്ക ഫെഡറൽ പൊതുമേഖലാ ജീവനക്കാർക്കും ദിവസാവസാനം മാനസികമായ തളർച്ച അനുഭവപ്പെടുകയും, ജോലിയിൽ ഉയർന്ന സമ്മർദ്ദം നേരിടുന്നുവെന്നും കണ്ടെത്തൽ. അവർക്ക് ജോലിയോടുള്ള സംതൃപ്തി കുറഞ്ഞതായും സർവേയിൽ കണ്ടെത്തി. കാനഡ ട്രഷറി ബോർഡ് സെക്രട്ടേറിയറ്റ് തിങ്കളാഴ്ച പുറത്തുവിട്ട 2024-ലെ പബ്ലിക് സർവീസ് എംപ്ലോയി സർവ്വേ ഫലങ്ങളുടെ അടിസ്ഥാനത്തിലാണ് ഈ വിവരങ്ങൾ പുറത്തുവിട്ടിരിക്കുന്നത്.
ജീവനക്കാരുടെ ഇടപെടൽ, നേതൃത്വം, തൊഴിൽ അന്തരീക്ഷം, തൊഴിലിടത്തിലെ ക്ഷേമം, വേതനം തുടങ്ങിയ വിഷയങ്ങളിലെ അഭിപ്രായങ്ങളാണ് ഈ സർവ്വേ അളന്നത്.
സർവ്വേയിൽ 93 ഫെഡറൽ ഡിപ്പാർട്ട്മെന്റുകളിലെയും ഏജൻസികളിലെയും 186,635 ജീവനക്കാർ പ്രതികരിച്ചു, ഇത് 50.5 ശതമാനം പ്രതികരണ നിരക്കാണ്. 2024-ൽ 23 ശതമാനം ജീവനക്കാരും തങ്ങൾക്ക് “ഉയർന്ന” അല്ലെങ്കിൽ “വളരെ ഉയർന്ന” ജോലി സംബന്ധമായ സമ്മർദ്ദമുണ്ടെന്ന് റിപ്പോർട്ട് ചെയ്തു, ഇത് 2022-ൽ 19 ശതമാനമായിരുന്നു.
2022-ൽ 28 ശതമാനമായിരുന്നത് 2024-ൽ 35 ശതമാനം ജീവനക്കാർക്കും ദിവസാവസാനം “എപ്പോഴും” അല്ലെങ്കിൽ “മിക്കപ്പോഴും” വൈകാരികമായി തളർച്ച അനുഭവപ്പെടുന്നുണ്ടെന്നും സർവ്വേ കണ്ടെത്തി. മാനസികാരോഗ്യത്തിന്റെ കാര്യത്തിൽ “മികച്ചത്” എന്ന് വിലയിരുത്തിയത് 10 ശതമാനം പേർ മാത്രമാണ്. 25 ശതമാനം “വളരെ നല്ലതും” 36 ശതമാനം “നല്ലതും” എന്ന് വിലയിരുത്തിയപ്പോൾ, 2022-ലെ കണക്കുകളുമായി താരതമ്യം ചെയ്യുമ്പോൾ ഇത് കുറവാണ്.
തങ്ങളുടെ ജോലിയിൽ സംതൃപ്തിയുണ്ടെന്ന് 72 ശതമാനം ഫെഡറൽ പൊതുമേഖലാ ജീവനക്കാരും പറഞ്ഞപ്പോൾ, 2020-ലും 2022-ലും ഇത് 78 ശതമാനമായിരുന്നു. “എൻ്റെ ജോലിയിൽ സംതൃപ്തിയുണ്ട്” എന്ന പ്രസ്താവനയോട് വിയോജിപ്പ് രേഖപ്പെടുത്തിയ പൊതുമേഖലാ ജീവനക്കാരുടെ എണ്ണം 2020-ലും 2022-ലും 11 ശതമാനമായിരുന്നത് 2024-ൽ 15 ശതമാനമായി ഉയർന്നു. ജോലി-വ്യക്തിജീവിതം സന്തുലിതമാക്കാൻ ജോലിസ്ഥലത്ത് പിന്തുണ ലഭിക്കുന്നുണ്ടെന്ന് 69 ശതമാനം പേർ ശക്തമായി തന്നെ യോജിച്ചു., ഇത് 2022-ൽ 78 ശതമാനമായിരുന്നു. ജീവനക്കാർ ആഴ്ചയിൽ കുറഞ്ഞത് മൂന്ന് ദിവസം ഓഫീസിൽ എത്തണമെന്ന് സർക്കാർ നിർബന്ധമാക്കിയതിന് തൊട്ടുപിന്നാലെ, 2024 ഒക്ടോബർ 28 മുതൽ ഡിസംബർ 31 വരെയാണ് ട്രഷറി ബോർഡ് സെക്രട്ടേറിയറ്റ് സർവ്വേ നടത്തിയത്.
തങ്ങളുടെ ഓഫീസ് ജോലി ആവശ്യകതകൾക്ക് അനുയോജ്യമാണെന്ന് 65 ശതമാനം പൊതുമേഖലാ ജീവനക്കാരും അഭിപ്രായപ്പെട്ടു, ഇത് 2022-ൽ 80 ശതമാനവും 2020-ൽ 78 ശതമാനവുമായിരുന്നു. തങ്ങൾക്ക് ജോലിയിൽ വില കൽപ്പിക്കപ്പെടുന്നുണ്ടെന്ന് 67 ശതമാനം പൊതുമേഖലാ ജീവനക്കാരും സമ്മതിച്ചു, ഇത് 2022-ൽ 72 ശതമാനമായിരുന്നു. തങ്ങൾ ചെയ്യുന്ന ജോലിയിൽ അഭിമാനമുണ്ടെന്ന് 82 ശതമാനം പേർ അഭിപ്രായപ്പെട്ടു, ഇത്
2022-ൽ 85 ശതമാനമായിരുന്നു. “മൊത്തത്തിൽ, ഞാൻ എൻ്റെ ജോലി ഇഷ്ടപ്പെടുന്നു” എന്ന പ്രസ്താവനയോട് 77 ശതമാനം പേർ യോജിച്ചു, ഇത് 2022-ൽ 81 ശതമാനവും 2020-ൽ 83 ശതമാനവുമായിരുന്നു. ഡിപ്പാർട്ട്മെന്റുകളിലെയും ഏജൻസികളിലെയും സീനിയർ മാനേജ്മെന്റിൽ വിശ്വാസമില്ലാത്ത പൊതുമേഖലാ ജീവനക്കാരുടെ എണ്ണം വർധിക്കുന്നതായും സർവ്വേ കണ്ടെത്തി.
55 ശതമാനം പ്രതികർത്താക്കളും സീനിയർ മാനേജ്മെന്റിൽ വിശ്വാസമുണ്ടെന്ന് പറഞ്ഞപ്പോൾ, 2022-ൽ ഇത് 64 ശതമാനവും 2020-ൽ 68 ശതമാനവുമായിരുന്നു. തങ്ങളുടെ ഡിപ്പാർട്ട്മെൻ്റോ ഏജൻസിയോ അതിന്റെ കാഴ്ചപ്പാടും ദൗത്യവും ലക്ഷ്യങ്ങളും നന്നായി ആശയവിനിമയം ചെയ്യുന്നുണ്ടെന്ന് 65 ശതമാനം പേർ അഭിപ്രായപ്പെട്ടു. തങ്ങളുടെ ഡിപ്പാർട്ട്മെൻ്റോ ഏജൻസിയോ ജോലി ചെയ്യാൻ മികച്ച സ്ഥലമാണെന്ന് 67 ശതമാനം പേർ ശുപാർശ ചെയ്യുമെന്ന് പറഞ്ഞു, ഇത് 2022-ൽ 73 ശതമാനമായിരുന്നു. അടുത്ത രണ്ട് വർഷത്തിനുള്ളിൽ നിലവിലെ സ്ഥാനം ഉപേക്ഷിക്കാൻ ഉദ്ദേശിക്കുന്നുവെന്ന് 36 ശതമാനം പേർ അഭിപ്രായപ്പെട്ടു.
