‘കൂടുതൽ സഹകരണം ആവശ്യമാണ്’: ചർച്ചയായി യുഎസ് അഭാവം ; കാനഡക്ക് പുതിയ വ്യാപാര നേട്ടങ്ങൾ

ജോഹന്നാസ്ബർഗ്: ലോകത്തിലെ പ്രമുഖ സാമ്പത്തിക ശക്തികളുടെ കൂട്ടായ്മയായ ജി20-യുടെ പ്രസക്തിയും ഭാവിയും ചോദ്യചിഹ്നമായി നിൽക്കുന്നുവെന്ന മുന്നറിയിപ്പുമായി ദക്ഷിണാഫ്രിക്കയിൽ സമാപിച്ച ഉച്ചകോടിയിൽ ലോക നേതാക്കൾ. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അഭാവം ഏറെ ചർച്ചയായ ഉച്ചകോടിയിൽ, രാജ്യങ്ങൾ തമ്മിലുള്ള സഹകരണം (Multilateralism) വലിയ പ്രതിസന്ധിയിലാണെന്ന് നേതാക്കൾ തുറന്നു പറഞ്ഞു.

ആഗോള രാഷ്ട്രീയ രംഗത്തെ സംഘർഷങ്ങൾ വർധിക്കുന്നതും ലോകക്രമത്തിൽ വന്ന മാറ്റങ്ങളുമാണ് ഇതിന് കാരണം. “ഈ മേശക്ക് ചുറ്റുമിരുന്ന് പ്രധാന പ്രതിസന്ധികൾ പരിഹരിക്കാൻ നമ്മൾ ബുദ്ധിമുട്ടുകയാണ്,” എന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ അഭിപ്രായപ്പെട്ടു. നിയമങ്ങളും രീതികളും തകർച്ചയുടെ വക്കിലാണെന്നും ട്രംപിന്റെ ‘അമേരിക്ക ഫസ്റ്റ്’ നയവും വ്യാപാര യുദ്ധങ്ങളും രാജ്യങ്ങളെ സുരക്ഷിതത്വത്തിനായി പുതിയ വഴികൾ തേടാൻ പ്രേരിപ്പിക്കുകയാണെന്നും പ്രധാനമന്ത്രി മാർക്ക് കാർണി വിശേഷിപ്പിച്ചു.

അമേരിക്കൻ പ്രസിഡൻ്റ് ഡൊണാൾഡ് ട്രംപിൻ്റെ ഏകപക്ഷീയമായ നയങ്ങൾ ലോക രാഷ്ട്രീയത്തിൽ അനിശ്ചിതത്വം സൃഷ്ടിച്ചതോടെ, കാനഡയെപ്പോലുള്ള ഇടത്തരം ശക്തികൾ മറ്റ് രാജ്യങ്ങളുമായി പുതിയ സൗഹൃദങ്ങളും വ്യാപാര ബന്ധങ്ങളും സ്ഥാപിക്കുന്നതിൽ ശ്രദ്ധ കേന്ദ്രീകരിച്ചു. ഈ ലക്ഷ്യത്തോടെയാണ് പ്രധാനമന്ത്രി മാർക്ക് കാർണി ജി20 ഉച്ചകോടിയിൽ പങ്കെടുത്തത്. കാർണിയുടെ നയതന്ത്ര നീക്കങ്ങളിലൂടെ കാനഡയ്ക്ക് ഇപ്പോൾ വലിയ നേട്ടങ്ങളാണ് ഉണ്ടായിരിക്കുന്നത്. യുഎഇയിൽ നിന്ന് 90 ബില്യൺ ഡോളറിൻ്റെ വൻ നിക്ഷേപം രാജ്യത്തേക്ക് കൊണ്ടുവരാൻ ധാരണയായത് ഇതിൽ പ്രധാനമാണ്.

കൂടാതെ, ദക്ഷിണാഫ്രിക്കയുമായി പുതിയ നിക്ഷേപ കരാറിനും ഇന്ത്യയുമായി ഒരു പുതിയ വ്യാപാര കരാറിനുമുള്ള ചർച്ചകൾക്ക് അദ്ദേഹം തുടക്കമിട്ടു. യൂറോപ്യൻ യൂണിയനെയും ഏഷ്യൻ രാജ്യങ്ങളെയും തമ്മിൽ ബന്ധിപ്പിക്കുന്ന ഒരു പുതിയ വ്യാപാര കൂട്ടായ്മയ്ക്കും കാർണി നേതൃത്വം നൽകി. അമേരിക്കയെ മാത്രം ആശ്രയിക്കാതെ, മറ്റ് രാജ്യങ്ങളുമായി വ്യാപാര ബന്ധങ്ങൾ ശക്തിപ്പെടുത്താനുള്ള കാനഡയുടെ ശ്രമങ്ങളാണ് ഈ നീക്കങ്ങൾ വ്യക്തമാക്കുന്നത്.

ലോക സമ്പദ്‌വ്യവസ്ഥയുടെ ശക്തി ഒരു രാജ്യത്തിൽ മാത്രം ഒതുങ്ങിനിൽക്കാതെ കൂടുതൽ രാജ്യങ്ങളിലേക്ക് വ്യാപിക്കുന്ന ഒരു കാലഘട്ടമാണ് വരാനിരിക്കുന്നതെന്ന് കാർണി പറഞ്ഞു. ഈ മാറ്റത്തിൽ, കാനഡയെപ്പോലുള്ള രാജ്യങ്ങൾക്ക് ലോകത്ത് കൂടുതൽ പങ്കുവഹിക്കാൻ സാധിക്കും. എന്നാൽ, 2027 വരെ ജി20-യുടെ ഭാവിയ്ക്ക് ഉടൻ പ്രശ്‌നങ്ങളൊന്നും ഉണ്ടാകില്ലെന്നും, ലോകരാജ്യങ്ങൾ തമ്മിലുള്ള സഹകരണം അവസാനിക്കുന്നില്ലെന്നും, മറിച്ച് രൂപം മാറുകയാണ് എന്നും ചില വിദഗ്ധർ അഭിപ്രായപ്പെട്ടു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

'More cooperation needed': US absence in talks; Canada sees new trade gains