തിരുവനന്തപുരം: നടൻ മോഹൻലാലിന്റെ ‘അമ്മ ശാന്തകുമാരിയുടെ സംസ്കാര ചടങ്ങുകൾ ഇന്ന് വൈകിട്ട് തിരുവനന്തപുരത്ത് നടക്കും. മുടവൻമുകളിലെ കുടുംബവീട്ടിലായിരിക്കും സംസ്കാരം. കൊച്ചിയിൽ അന്തരിച്ച ഇവരുടെ ഭൗതികശരീരം ഇന്ന് പുലർച്ചയോടെയാണ് തിരുവനന്തപുരത്തെ വസതിയിൽ എത്തിച്ചത്. പ്രിയപ്പെട്ട അമ്മയ്ക്ക് അന്ത്യാഞ്ജലി അർപ്പിക്കാനായി സിനിമ-സാംസ്കാരിക രംഗത്തെ നിരവധി പ്രമുഖർ മുടവൻമുകളിലെ വീട്ടിലെത്തിക്കൊണ്ടിരിക്കുകയാണ്.
വാർദ്ധക്യസഹജമായ അസുഖങ്ങളെത്തുടർന്ന് ചികിത്സയിലിരിക്കെ ഇന്നലെ ഉച്ചയോടെയാണ് ശാന്തകുമാരി അന്തരിച്ചത്. പക്ഷാഘാതം സംഭവിച്ചതിനെത്തുടർന്ന് കഴിഞ്ഞ പത്ത് വർഷത്തോളമായി ഇവർ ചികിത്സയിലായിരുന്നു. കൊച്ചിയിലെ അമൃത ആശുപത്രിയിൽ ചികിത്സയിലിരിക്കെയായിരുന്നു അന്ത്യം. അമ്മയുടെ വിയോഗവാർത്തയറിഞ്ഞ് മോഹൻലാൽ ഇന്നലെത്തന്നെ കൊച്ചിയിലെത്തുകയും ഭൗതികശരീരത്തിനൊപ്പം തിരുവനന്തപുരത്തേക്ക് തിരിക്കുകയും ചെയ്തു.
അമ്മയുമായി വലിയ വൈകാരിക ബന്ധം പുലർത്തിയിരുന്ന മോഹൻലാൽ, പല പൊതുവേദികളിലും അമ്മയെക്കുറിച്ച് വാചാലനാകാറുണ്ട്. കഴിഞ്ഞ മെയ് മാസത്തിൽ അമ്മയുടെ 89-ാം പിറന്നാൾ ദിനത്തിൽ എളമക്കരയിലെ വീട്ടിൽ വെച്ച് മോഹൻലാൽ നടത്തിയ സംഗീതാർച്ചന ഏറെ ശ്രദ്ധിക്കപ്പെട്ടിരുന്നു. അന്ന് അദ്ദേഹം ആലപിച്ച പാട്ടുകളും ചിത്രങ്ങളും സോഷ്യൽ മീഡിയയിൽ വൈറലായിരുന്നു. ദീർഘകാലമായി രോഗശയ്യയിലായിരുന്ന അമ്മയുടെ തണലായി താരം എന്നും കൂടെയുണ്ടായിരുന്നു.
മകന്റെ ഉയർച്ചയിൽ എന്നും അഭിമാനിച്ചിരുന്ന ശാന്തകുമാരിയുടെ വിയോഗം മലയാള സിനിമാ ലോകത്തിനും വലിയ നോവായി മാറിയിരിക്കുകയാണ്. വൈകിട്ട് നടക്കുന്ന സംസ്കാര ചടങ്ങുകളിൽ സിനിമാ മേഖലയിലെ സഹപ്രവർത്തകരും ബന്ധുക്കളും പങ്കെടുക്കും.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Mohanlal’s mother’s funeral today; Body brought to Thiruvananthapuram, film industry pays last respects
