കൊച്ചി: മലയാള സിനിമയിലെ എക്കാലത്തെയും മികച്ച കൂട്ടുകെട്ടുകളിലൊന്നായ സത്യൻ അന്തിക്കാട്-മോഹൻലാൽ ടീം വീണ്ടും ഒന്നിക്കുന്ന ‘ഹൃദയപൂർവ്വം’ എന്ന ചിത്രം ഓണം റിലീസായി പ്രേക്ഷകരിലേക്ക്. ആശിർവാദ് സിനിമാസിൻ്റെ ബാനറിൽ ആൻ്റണി പെരുമ്പാവൂർ നിർമ്മിക്കുന്ന ഈ ചിത്രം വ്യാഴാഴ്ച തിയേറ്ററുകളിൽ എത്തും. കേരളത്തിൽ മാത്രം 235 സ്ക്രീനുകളിലാണ് ചിത്രം റിലീസ് ചെയ്യുന്നത്. മറ്റ് വലിയ ചിത്രങ്ങൾക്കൊപ്പമുള്ള ഓണം സീസണിൽ ഇത് മികച്ച സ്ക്രീൻ കൗണ്ടാണ്.
നീണ്ട ഇടവേളയ്ക്ക് ശേഷമാണ് ഇവർ ഒരുമിക്കുന്നത്. സത്യൻ അന്തിക്കാട് സിനിമകൾക്ക് പതിവില്ലാത്ത വിധം ചിത്രത്തിൻ്റെ പ്രധാന ലൊക്കേഷൻ പൂനെയായിരുന്നു. ബന്ധങ്ങളുടെ ആഴം പറയുന്ന ഒരു “ഫീൽ ഗുഡ്” ചിത്രമായിരിക്കും ഇതെന്ന് സംവിധായകൻ നേരത്തെ അറിയിച്ചിരുന്നു. മോഹൻലാലിനൊപ്പം മാളവിക മോഹനൻ, സിദ്ദിഖ്, ബാബുരാജ്, സബിതാ ആനന്ദ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
അഖിൽ സത്യൻ്റേതാണ് കഥ. നവാഗതനായ ടി.പി. സോനു തിരക്കഥയൊരുക്കുന്നു. അനൂപ് സത്യനാണ് ചിത്രത്തിൻ്റെ പ്രധാന സംവിധാന സഹായി. നർമ്മവും വൈകാരിക നിമിഷങ്ങളും സമന്വയിപ്പിച്ചുകൊണ്ടുള്ള ഒരു കുടുംബചിത്രം പ്രതീക്ഷിക്കുന്ന പ്രേക്ഷകർക്ക് ‘ഹൃദയപൂർവ്വം’ ഒരു മികച്ച ഓണം സമ്മാനമാകുമെന്നാണ് അണിയറപ്രവർത്തകർ പറയുന്നത്.
