മെട്രോമാന് തിരിച്ചടി!; അതിവേഗ റെയിൽ പദ്ധതിയിൽ ഇ. ശ്രീധരന് ചുമതലയില്ലെന്ന്  അതിവേഗ റെയിൽ കോർപ്പറേഷൻ

കേരളത്തിൽ അതിവേഗ റെയിൽപാത നടപ്പിലാക്കുമെന്ന വാഗ്ദാനവുമായി മുന്നോട്ടുപോകുന്ന മെട്രോമാൻ ഇ. ശ്രീധരന് കേന്ദ്ര സർക്കാരിൽ നിന്നും നാഷണൽ ഹൈ സ്പീഡ് റെയിൽ കോർപ്പറേഷനിൽ നിന്നും കനത്ത തിരിച്ചടി. കേരളത്തിലെ അതിവേഗ റെയിൽ പദ്ധതിയുമായി ബന്ധപ്പെട്ട് ഇ. ശ്രീധരനെ ഒരു തരത്തിലുള്ള ചുമതലകളും ഏൽപ്പിച്ചിട്ടില്ലെന്ന് റെയിൽവേ മന്ത്രാലയത്തിന് കീഴിലുള്ള ഹൈ സ്പീഡ് റെയിൽ കോർപ്പറേഷൻ ഔദ്യോഗികമായി വ്യക്തമാക്കി. വിവരാവകാശ നിയമപ്രകാരം നൽകിയ അപേക്ഷയ്ക്കുള്ള മറുപടിയിലാണ് ഈ നിർണ്ണായക വിവരങ്ങൾ പുറത്തുവന്നത്.

2023 ജൂൺ മുതൽ 2026 ഫെബ്രുവരി ആറ് വരെയുള്ള കാലയളവിൽ കേരളത്തിലെ ഒരു റെയിൽവേ പദ്ധതിയുടെയും ഉത്തരവാദിത്തം ശ്രീധരന് നൽകിയിട്ടില്ലെന്ന് കോർപ്പറേഷൻ അറിയിച്ചു. പദ്ധതികൾ വിലയിരുത്തുന്നതിനോ, സാങ്കേതിക ഉപദേശങ്ങൾ നൽകുന്നതിനോ അദ്ദേഹത്തെ ചുമതലപ്പെടുത്തിയിട്ടില്ലെന്നും മറുപടിയിൽ വ്യക്തമാക്കുന്നു. കേന്ദ്ര റെയിൽവേ മന്ത്രി അശ്വിനി വൈഷ്ണവ് നിർദ്ദേശിച്ചതനുസരിച്ചാണ് താൻ പദ്ധതിയുമായി മുന്നോട്ടുപോകുന്നതെന്ന ശ്രീധരന്റെ മുൻപത്തെ അവകാശവാദങ്ങളെ പൂർണ്ണമായും തള്ളുന്നതാണ് ഈ പുതിയ വെളിപ്പെടുത്തൽ.

നേരത്തെ, അതിവേഗ പാതയുടെ ഡി.പി.ആർ (DPR) തയ്യാറാക്കാൻ കേന്ദ്രമന്ത്രി തന്നോട് ആവശ്യപ്പെട്ടിട്ടുണ്ടെന്നും ഡി.എം.ആർ.സി (DMRC) വഴി ഇതിന്റെ മേൽനോട്ടം വഹിക്കുമെന്നും ശ്രീധരൻ അറിയിച്ചിരുന്നു. ഇതിന്റെ അടിസ്ഥാനത്തിൽ മലപ്പുറത്തെ പൊന്നാനിയിൽ അദ്ദേഹം ഓഫീസ് തുറന്ന് പ്രവർത്തനം ആരംഭിക്കുകയും ചെയ്തിരുന്നു. എന്നാൽ, ഔദ്യോഗിക അനുമതിയില്ലാതെ ഇത്തരമൊരു നീക്കം നടത്തിയത് എന്തിനായിരുന്നു എന്ന ചോദ്യമാണ് ഇപ്പോൾ ഉയരുന്നത്. രാജ്യസഭയിൽ എം.പിമാരായ ഹാരിസ് ബീരാൻ, ജോൺ ബ്രിട്ടാസ് എന്നിവർ ഉന്നയിച്ച ചോദ്യങ്ങൾക്കും വ്യക്തമായ മറുപടി നൽകാൻ റെയിൽവേ മന്ത്രി തയ്യാറാകാതിരുന്നത് ഈ ദുരൂഹത വർധിപ്പിക്കുന്നു.

സംസ്ഥാന സർക്കാർ മുന്നോട്ടുവെച്ച ആർ.ആർ.ടി.എസ് (RRTS) പദ്ധതിക്കെതിരെ ഇ. ശ്രീധരൻ നേരത്തെ കടുത്ത വിമർശനങ്ങൾ ഉന്നയിച്ചിരുന്നു. ആർ.ആർ.ടി.എസ് സാങ്കേതികമായി പ്രായോഗികമല്ലെന്നും അത് വെറും ‘സിമ്പിൾ വേസ്റ്റ്’ ആണെന്നുമാണ് അദ്ദേഹം വാദിച്ചിരുന്നത്. ഇത് കേവലം തിരഞ്ഞെടുപ്പ് സ്റ്റണ്ട് ആണെന്നും അദ്ദേഹം കുറ്റപ്പെടുത്തിയിരുന്നു. എന്നാൽ കേന്ദ്ര ഏജൻസികളിൽ നിന്ന് തനിക്ക് ലഭിച്ചതായി അദ്ദേഹം അവകാശപ്പെട്ട പദവികൾ ഇപ്പോൾ നിഷേധിക്കപ്പെട്ടതോടെ, പദ്ധതിയുടെ ഭാവി സംബന്ധിച്ചും ശ്രീധരന്റെ ഇടപെടലുകൾ സംബന്ധിച്ചും വലിയ രാഷ്ട്രീയ വിവാദങ്ങൾക്കാണ് കേരളം സാക്ഷ്യം വഹിക്കുന്നത്.

Metro Man setback: E.Sreedharan has no role in rail project

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt