കാനഡയിലെ മെഡിക്കൽ പ്രൊഫഷണലുകളുടെ വർധിച്ചുവരുന്ന ആവശ്യകതയ്ക്ക് പരിഹാരമായി മക്മാസ്റ്റർ യൂണിവേഴ്സിറ്റിയും പ്രിൻസ് എഡ്വേഡ് ആയിലൻഡ് (പിഇഐ) സർക്കാരും ചേർന്ന് ഒരു വിപ്ലവകരമായ സംരംഭം ആരംഭിച്ചിരിക്കുകയാണ്. അന്താരാഷ്ട്ര പരിശീലനം നേടിയ ഡോക്ടർമാർക്ക് കാനഡയിലെ ആരോഗ്യസംരക്ഷണ മേഖലയിലേക്ക് വേഗത്തിലും ഫലപ്രദമായും കടന്നുവരാൻ സഹായിക്കുന്ന പ്രത്യേക ഹോസ്പിറ്റലിസ്റ്റ് ഫെലോഷിപ്പ് പ്രോഗ്രാമാണിത്.
‘ പിഇഐ-മക്മാസ്റ്റർ കൊളാബറേറ്റീവ് ഹോസ്പിറ്റലിസ്റ്റ് ഫെലോഷിപ്പ് ‘ എന്ന പേരിൽ അറിയപ്പെടുന്ന ഈ പദ്ധതി കേവലം ഒരു പരിശീലന പ്രോഗ്രാം മാത്രമല്ല, മറിച്ച് രണ്ട് സുപ്രധാന വെല്ലുവിളികളുടെ നേരിട്ടുള്ള പരിഹാരമാണ്. അന്താരഷ്ട്ര മെഡിക്കൽ പ്രൊഫഷനലുകളെ കാനഡയിൽ പ്രാക്ടീസ് ചെയ്യാൻ പ്രാപ്തമാക്കുക, പിഇഐ പോലുള്ള വൈധ്യക്ഷാമം നേരിടുന്ന പ്രദേശങ്ങളിലെ ആരോഗ്യ സേവന ശേഷി ശക്തിപ്പെടുത്തുക എന്നിവയാണ് ഈ രണ്ട് ലക്ഷ്യങ്ങൾ.
പരമ്പരാഗത റെസിഡൻസി മാർഗങ്ങളിൽ നിന്ന് വ്യത്യസ്തമായി, വർഷങ്ങളുടെ പരിശീലനവും പരിമിതമായ സ്ഥാനലഭ്യതയും ആവശ്യമായി വരുന്ന സാഹചര്യത്തിൽ, ഈ മോഡൽ ലൈസൻസിംഗിലേക്കും പ്രാക്ടീസിലേക്കും സുഗമമായ പാത വാഗ്ദാനം ചെയ്യുന്നു. പരിശീലനം പ്രധാനമായും ഒന്റാറിയോയിലെ മക്മാസ്റ്റർ സർവകലാശാലയിൽ നടത്തുന്നതിനോടൊപ്പം, ഫെലോകൾ പിഇഐയിൽ അത്യാവശ്യമായ പ്ലേസ്മെന്റ് ബ്ലോക്ക് പൂർത്തീകരിക്കുന്നു.
പ്രോഗ്രാം പൂർത്തീകരിച്ചതിന് ശേഷം ഡോക്ടർമാർ, ഡോക്ടർ ക്ഷാമം രൂക്ഷമായ പിഇഐയിൽ കുറഞ്ഞത് ഒരു വർഷമെങ്കിലും സേവനം അനുഷ്ഠിക്കാൻ പ്രതിജ്ഞാബദ്ധരാകുന്നു. പ്രവിശ്യയുടെ ആരോഗ്യ അതോറിറ്റിയായ ഹെൽത്ത് പിഇഐ ഫെലോകളെ തിരഞ്ഞെടുക്കുകയും ഫണ്ട് ചെയ്യുകയും മാത്രമല്ല, ജനറൽ ഇന്റേണൽ മെഡിസിൻ, ഇന്റൻസീവ് കെയർ, സബ്സ്പെഷ്യാലിറ്റികൾ എന്നിവയിലെ വൈവിധ്യമാർന്ന കേസുകൾ കൈകാര്യം ചെയ്യാൻ അവരെ തയ്യാറാക്കുകയും ചെയ്യുന്നു.
മക്മാസ്റ്ററിലെ ഫെലോഷിപ്പ് ഡയറക്ടർ ഡോ. ഹാരൂൺ യൂസുഫ് പറയുന്നതനുസരിച്ച്, “ഉയർന്ന പരിശീലനം ലഭിച്ച അന്താരാഷ്ട്ര ഡോക്ടർമാർക്ക് കനേഡീയൻ ആരോഗ്യ സംവിധാനത്തിലേക്ക് മാറാനും രോഗി പരിചരണത്തിൽ വലിയതോതിൽ സംഭാവന നൽകാനും കഴിയും”.
ഫെലോഷിപ്പ് ഇതിനകം തന്നെ ഫലങ്ങൾ കാഴ്ചവെച്ച് തുടങ്ങിയിട്ടുണ്ട്. വിദേശത്ത് പരിശീലനം ലഭിച്ച ഇന്റേണൽ മെഡിസിൻ സ്പെഷ്യലിസ്റ്റായ ഡോ. അലി അബ്ദുള്ള പ്രോഗ്രാം പൂർത്തീകരിച്ച് 2024ൽ പിഇഐയിൽ പ്രാക്ടീസ് ആരംഭിച്ചു. പ്രാദേശിക ആരോഗ്യ സേവന സംവിധാനത്തിലേക്കുള്ള അദ്ദേഹത്തിന്റെ വിജയകരമായ സംയോജനം ഫെലോഷിപ്പിന്റെ സുസ്ഥിരമായ മാറ്റം സൃഷ്ടിക്കാനുള്ള സാധ്യത വ്യക്തമാക്കുന്നു.
ഹെൽത്ത് പിഇഐ സിഇഒ മെലാനി ഫ്രേസറിന്റെ അഭിപ്രായത്തിൽ, ഈ സംരംഭം പ്രാദേശിക ആവശ്യങ്ങൾ നിറവേറ്റുക മാത്രമല്ല, രാജ്യത്തുടനീളമുള്ള തൊഴിൽശക്തി വികസനത്തിന് ഒരു മാതൃകയായി പ്രവർത്തിക്കുകയും ചെയ്യാൻ കഴിയും.
കാനഡയിൽ താമസിക്കുന്ന പരിചയസമ്പന്നരായ വിദേശ ഡോക്ടർമാരെ ഉപയോഗപ്പെടുത്തിയാണ് ഈ പ്രോഗ്രാം രൂപകൽപ്പന ചെയ്തിരിക്കുന്നത് . പിഇഐ-മക്മാസ്റ്റർ ഫെലോഷിപ്പ് ഉയർന്ന നിലവാരമുള്ള പരിശീലനവും വേഗത്തിലുള്ള സംയോജനവും ഒരുമിച്ച് നൽകുന്ന മാതൃകാ പദ്ധതിയാണ്. മറ്റ് പ്രവിശ്യകളിലും ഈ രീതി പിന്തുടരാവുന്നതാണ്.. ആഗോള കഴിവുകളെ ദേശീയ ക്ഷേമത്തിന് അത്യാവശ്യമായ ഒരു സ്വത്തായി അംഗീകരിക്കുന്ന കാനഡയുടെ ആരോഗ്യ സേവന ഭാവിയ്ക്കുള്ള കൂടുതൽ വിശാലവും പ്രതികരണാത്മകവുമായ കാഴ്ചപ്പാടിനെ ഇത് പ്രതിഫലിപ്പിക്കുന്നു.
