കാൽഗറി: കാൽഗറി അന്താരാഷ്ട്ര വിമാനത്താവളത്തിൽ വൻ മയക്കുമരുന്ന് വേട്ടയുമായി ബന്ധപ്പെട്ട് ഒരാളെ പോലീസ് അറസ്റ്റ് ചെയ്തു. ചൊവ്വാഴ്ച രാവിലെ 9:30 ഓടെ നടന്ന പരിശോധനയിൽ ഏകദേശം 7.5 ലക്ഷം ഡോളറിലധികം വിലവരുന്ന 15.5 കിലോ ക്രിസ്റ്റൽ മെത്താണ് അധികൃതർ പിടികൂടിയത്. കനേഡിയൻ എയർ ട്രാൻസ്പോർട്ട് സെക്യൂരിറ്റി അതോറിറ്റി നടത്തിയ പതിവ് പരിശോധനയ്ക്കിടെയാണ് സംശയാസ്പദമായ സാഹചര്യത്തിൽ മയക്കുമരുന്ന് കണ്ടെത്തിയത്.
വിമാനത്താവളത്തിലെ പരിശോധനയിൽ ഒരു ചെക്ക്ഡ് ബാഗിനുള്ളിൽ മൂന്ന് പ്രത്യേക പാക്കറ്റുകളിലായി സൂക്ഷിച്ച നിലയിലായിരുന്നു മയക്കുമരുന്ന്. വാൻകൂവറിലേക്കുള്ള വിമാനത്തിൽ യാത്ര തിരിക്കാനിരുന്ന 38-കാരനായ ലോയ്ഡ് ടെഇ മാതാഫയെയാണ് സംഭവവുമായി ബന്ധപ്പെട്ട് പോലീസ് കസ്റ്റഡിയിലെടുത്തത്.
ഇയാൾ കാനഡയിൽ നിന്നും കണക്റ്റിംഗ് ഫ്ലൈറ്റുകൾ വഴി ന്യൂസിലാൻഡിലേക്ക് ലഹരിമരുന്ന് കടത്താനായിരുന്നു ലക്ഷ്യമിട്ടിരുന്നതെന്ന് അന്വേഷണ ഉദ്യോഗസ്ഥർ പറഞ്ഞു . മയക്കുമരുന്ന് കടത്തൽ, കൈവശം വെക്കൽ തുടങ്ങിയ കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നത്. കേസ് വെള്ളിയാഴ്ച കോടതിയിൽ വീണ്ടും പരിഗണിക്കും. സംഭവത്തെക്കുറിച്ച് കൂടുതൽ വിവരങ്ങൾ അറിയുന്നവർ പോലീസിനെയോ ക്രൈം സ്റ്റോപ്പേഴ്സിനെയോ ബന്ധപ്പെടണമെന്ന് അധികൃതർ അഭ്യർത്ഥിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Massive drug bust at Calgary airport; Man arrested with 15.5 kg of crystal meth
