അഭ്യർത്ഥനയുമായി മാനിറ്റോബ, വഴങ്ങാതെ ഒന്റാരിയോ; പ്രവിശ്യകൾ തമ്മിലുള്ള ‘വിസ്‌കി പോര്’ കനക്കുന്നു

ടൊറന്റോ: കാനഡയിലെ പ്രശസ്തമായ ‘ക്രൗൺ റോയൽ’ വിസ്‌കി ബ്രാൻഡ് ഔദ്യോഗിക മദ്യവിൽപനശാലകളുടെ (LCBO) ഷെൽഫുകളിൽ നിന്ന് നീക്കം ചെയ്യാനുള്ള ഒന്റാരിയോ പ്രീമിയർ ഡഗ് ഫോർഡിന്റെ തീരുമാനത്തിനെതിരെ പ്രതിഷേധം ശക്തമാകുന്നു. മാനിറ്റോബയിലെ പ്രതിപക്ഷ നേതാവ് ഓബി ഖാൻ ഇതുസംബന്ധിച്ച് ഡഗ് ഫോർഡിന് കത്തയച്ചു. ഒന്റാരിയോയുടെ തീരുമാനം മാനിറ്റോബയിലെ നൂറുകണക്കിന് തൊഴിലാളികളുടെ ഉപജീവനത്തെ ബാധിക്കുമെന്ന് കത്തിൽ ചൂണ്ടിക്കാട്ടുന്നു. ക്രൗൺ റോയലിന്റെ നിർമ്മാതാക്കളായ ‘ഡയാജിയോ’ (Diageo) ഒന്റാരിയോയിലെ തങ്ങളുടെ ബോട്ലിങ് പ്ലാന്റ് യുഎസിലേക്ക് മാറ്റാൻ തീരുമാനിച്ചതാണ് പ്രീമിയർ ഡഗ് ഫോർഡിനെ പ്രകോപിപ്പിച്ചത്.

കമ്പനിയുടെ ഈ നീക്കം വഴി ഒന്റാരിയോയിൽ ഏകദേശം 200 ഓളം പേർക്ക് തൊഴിൽ നഷ്ടമാകും. ഇതിനോടുള്ള പ്രതിഷേധമായാണ് ഒന്റാറിയോയിലെ സർക്കാർ നിയന്ത്രിത മദ്യവിൽപനശാലകളിൽ നിന്ന് ഈ ബ്രാൻഡ് ഒഴിവാക്കുമെന്ന് ഫോർഡ് പ്രഖ്യാപിച്ചത്. എന്നാൽ, ഒന്റാരിയോയിൽ കുപ്പിയിലാക്കുന്നുണ്ടെങ്കിലും ക്രൗൺ റോയൽ വിസ്‌കി നിർമ്മിക്കുന്നതും മിശ്രണം ചെയ്യുന്നതും മാനിറ്റോബയിലെ ഗിംലിയിലാണെന്ന് മാനിറ്റോബ നേതാക്കൾ ഓർമ്മിപ്പിക്കുന്നു. വിസ്‌കി ബഹിഷ്കരിക്കുന്നത് മാനിറ്റോബയിലെ പ്ലാന്റിന്റെ നിലനിൽപ്പിനെ ബാധിക്കുമെന്നും ഇത് കാനഡയിലെ ആഭ്യന്തര വിപണിയെ തകർക്കുമെന്നും എംപി ജെയിംസ് ബെസാൻ പറഞ്ഞു.

ഒന്റാരിയോയിലെ വൈനുകൾ മാനിറ്റോബയിലെ കടകളിൽ നിന്ന് ഒഴിവാക്കപ്പെടുന്നത് ഫോർഡ് ആഗ്രഹിക്കുന്നുണ്ടോയെന്നും അദ്ദേഹം ചോദിച്ചു. സാമ്പത്തിക അനിശ്ചിതത്വം നിലനിൽക്കുന്ന ഈ സാഹചര്യത്തിൽ കനേഡിയൻ കമ്പനികളെയും തൊഴിലിനെയും സംരക്ഷിക്കാനാണ് തങ്ങൾ ശ്രമിക്കേണ്ടതെന്ന് ഓബി ഖാൻ തന്റെ കത്തിൽ വ്യക്തമാക്കി. ഒന്റാരിയോയിലെ മൊത്തം വിസ്‌കി ഉപഭോഗത്തിന്റെ 25 ശതമാനവും ക്രൗൺ റോയൽ ആണെന്നും കമ്പനിയുടെ കോർപ്പറേറ്റ് ഓഫീസുകൾ ഇപ്പോഴും ടൊറന്റോയിൽ തന്നെയാണെന്നും നേതാക്കൾ ചൂണ്ടിക്കാട്ടുന്നു.

അതേസമയം, തന്റെ തീരുമാനത്തിൽ നിന്ന് പിന്നോട്ടില്ലെന്ന നിലപാടിലാണ് ഡഗ് ഫോർഡ്. താൻ ഒന്റാറിയോയിലെ തൊഴിലവസരങ്ങൾ സംരക്ഷിക്കാനാണ് ശ്രമിക്കുന്നതെന്നും ക്രൗൺ റോയലിന് പകരം കാനഡയിൽ തന്നെയുള്ള മറ്റ് ബ്രാൻഡുകൾ ജനങ്ങൾ ഉപയോഗിക്കണമെന്നും അദ്ദേഹം പറഞ്ഞു. മാനിറ്റോബയിലെ പ്ലാന്റുകളും ഭാവിയിൽ അമേരിക്കയിലേക്ക് മാറാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

മറ്റൊരു പ്രവിശ്യയെ ദോഷകരമായി ബാധിക്കുന്ന നീക്കത്തിൽ നിന്ന് പിന്തിരിയണമെന്നും നിക്ഷേപം ആകർഷിക്കാൻ ഇരു പ്രവിശ്യകളും ഒന്നിച്ച് പ്രവർത്തിക്കണമെന്നുമാണ് മാനിറ്റോബയിലെ നേതാക്കളുടെ ആവശ്യം. വരും ദിവസങ്ങളിൽ ഈ വിഷയത്തിൽ ഇരു പ്രവിശ്യകളും തമ്മിലുള്ള ചർച്ചകൾ തുടർന്നേക്കും.

manitoba-mp-calls-out-doug-fords-terrible-decision-to-strip-crown-royal-off-lcbo-shelves

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt