വിവിധ പ്രാദേശിക മാധ്യമങ്ങൾക്ക് സാമ്പത്തിക സഹായം ലഭ്യമാക്കുന്നതിനായി മാനിറ്റോബ സർക്കാർ രൂപീകരിക്കുന്ന സർവകക്ഷി കമ്മിറ്റി സമ്മർ സീസണിൽ പ്രവർത്തനം ആരംഭിക്കാനിരിക്കുകയാണ് .വടക്കൻ ഗ്രാമീണ മേഖലകളിലെ മാധ്യമ സ്ഥാപനങ്ങളെ സർക്കാർ പരസ്യങ്ങൾ വർദ്ധിപ്പിച്ചും പൊതു അറിയിപ്പുകൾ നൽകിയും സഹായിക്കുക എന്നതാണ് പ്രീമിയർ വാബ് കിനെവ് എൻഡിപി സർക്കാരിന്റെ പ്രധാന ലക്ഷ്യം. കഴിഞ്ഞ വർഷം അവസാനമാണ് ഇത്തരമൊരു സംരംഭത്തെക്കുറിച്ച് ആദ്യമായി പ്രഖ്യാപനം വന്നത്.
എന്നാൽ ഈ നീക്കത്തിനെതിരെ ശക്തമായ എതിർപ്പുമായി പ്രതിപക്ഷമായ പ്രോഗ്രസീവ് കൺസർവേറ്റീവ് പാർട്ടി രംഗത്തെത്തിയിട്ടുണ്ട്.
കമ്മിറ്റിയുടെ ഘടനയെയും അധികാര പരിധിയെയുമാണ് അവർ പ്രധാനമായും ചോദ്യം ചെയ്യുന്നത്. നാല് എൻഡിപി അംഗങ്ങളും രണ്ട് ടോറി അംഗങ്ങളും മാത്രമുള്ള സമിതിയുടെ രൂപീകരണം ഏകപക്ഷീയമാണെന്ന് അവർ ആരോപിക്കുന്നു. ഇതിനുപുറമെ, ഫ്രഞ്ച്, ഫിലിപ്പിനോ, ചൈനീസ് തുടങ്ങിയ ചില പ്രത്യേക സാംസ്കാരിക വിഭാഗങ്ങളിലെ മാധ്യമങ്ങൾക്ക് അമിത പ്രാധാന്യം നൽകുന്നത് മറ്റ് പ്രാദേശിക മാധ്യമങ്ങളെ അവഗണിക്കുന്നതിന് തുല്യമാണെന്നും അവർ കുറ്റപ്പെടുത്തുന്നു.
കമ്മിറ്റിയുടെ ചെയർമാനായി നിയമിതനായ ന്യൂ ഡെമോക്രാറ്റിലെ റോബർട്ട് ലോയിസെല്ലെ ഈ സംരംഭത്തെ ശക്തമായി ന്യായീകരിച്ചു. എല്ലാ രാഷ്ട്രീയ പാർട്ടികളുടെയും പിന്തുണയും സഹകരണവും അദ്ദേഹം അഭ്യർത്ഥിച്ചു.
എല്ലാ പശ്ചാത്തലങ്ങളിൽ നിന്നുമുള്ള, വിവിധ ഭാഷകളിലുള്ള മാധ്യമ പ്രതിനിധികൾക്കും ഹിയറിംഗിൽ പങ്കെടുക്കാൻ അവസരം നൽകുമെന്നും അദ്ദേഹം ഉറപ്പു നൽകി. “നമ്മൾ ഉടൻ തന്നെ കാര്യമായ ചർച്ചകളിലേക്ക് കടക്കും, എല്ലാവരുമായി കൂടിക്കാഴ്ച നടത്തും,” എന്നും അദ്ദേഹം കൂട്ടിച്ചേർത്തു. ലിബറൽ എംഎൽഎ സിൻഡി ലാമോറെക്സിനെയും സ്വതന്ത്ര അംഗവും മുൻ എൻഡിപി അംഗവുമായ മാർക്ക് വാസില്യവിനെയും കമ്മിറ്റിയിൽ ഉൾപ്പെടുത്തിയിട്ടില്ല. രാഷ്ട്രീയപരമായ ഭിന്നതകൾ നിലനിൽക്കുമ്പോഴും, ഹിയറിംഗുമായി മുന്നോട്ട് പോകാനും മാനിറ്റോബയിലെ മാധ്യമരംഗത്തിന്റെ നിലനിൽപ്പ് ഉറപ്പാക്കാനുമുള്ള ഉറച്ച തീരുമാനത്തിലാണ് സർക്കാർ.
