വെനിസ്വേലയിൽ നേരിട്ടുള്ള ഭരണമില്ല; നിലപാട് മയപ്പെടുത്തി യു.എസ്

വാഷിംഗ്ടൺ: വെനിസ്വേലയുടെ ആഭ്യന്തര ഭരണകാര്യങ്ങളിൽ യുണൈറ്റഡ് സ്റ്റേറ്റ്സ് നേരിട്ട് ഇടപെടില്ലെന്ന് വിദേശകാര്യ സെക്രട്ടറി മാർക്കോ റൂബിയോ വ്യക്തമാക്കി. വെനിസ്വേലയെ യു.എസ് നേരിട്ട് ഭരിക്കുമെന്ന് ശനിയാഴ്ച പ്രസിഡന്റ് ഡൊണാൾഡ് ട്രംപ് പ്രസ്താവിച്ചിരുന്നു. ഇതിന് പിന്നാലെയാണ് നയതന്ത്ര തലത്തിലുള്ള വിശദീകരണവുമായി റൂബിയോ രംഗത്തെത്തിയത്. നിലവിലുള്ള ‘എണ്ണ ഉപരോധം’ (Oil Quarantine) കർശനമായി നടപ്പിലാക്കുന്നതിലൂടെ വെനിസ്വേലയിലെ നയപരമായ മാറ്റങ്ങൾ ഉറപ്പുവരുത്തുകയാണ് യു.എസ് ലക്ഷ്യമെന്ന് അദ്ദേഹം അറിയിച്ചു.

മറ്റൊരു രാജ്യത്ത് ദീർഘകാലം വിദേശ ഇടപെടലോ രാഷ്ട്രപുനർനിർമ്മാണ ശ്രമങ്ങളോ നടത്താൻ അമേരിക്ക ഉദ്ദേശിക്കുന്നില്ലെന്ന് റൂബിയോ ടെലിവിഷൻ അഭിമുഖങ്ങളിൽ പറഞ്ഞു. നിക്കോളാസ് മഡുറോയുടെ പുറത്താക്കലിന് ശേഷം വെനിസ്വേലയിലെ ഭരണം താൽക്കാലികമായി വാഷിംഗ്ടൺ ഏറ്റെടുക്കുമെന്ന ട്രംപിന്റെ പ്രസ്താവന ആഗോളതലത്തിൽ ആശങ്കയുണ്ടാക്കിയിരുന്നു. ഈ പശ്ചാത്തലത്തിലാണ് ഭരണപരമായ കാര്യങ്ങൾ അവിടെയുള്ള ഉദ്യോഗസ്ഥർ നിർവഹിക്കുമെന്നും യു.എസ് മേൽനോട്ടം വഹിക്കുക മാത്രമാകും ചെയ്യുകയെന്നും റൂബിയോ വ്യക്തമാക്കിയത്.

വെനിസ്വേലയിലെ മയക്കുമരുന്ന് കടത്ത് തടയുന്നതിനും എണ്ണ വ്യവസായം ജനങ്ങളുടെ ഗുണത്തിനായി മാറ്റുന്നതിനും നിലവിലെ ഉപരോധം ശക്തമായ ആയുധമായി ഉപയോഗിക്കും. മഡുറോയ്ക്ക് താഴെയുള്ള ഉദ്യോഗസ്ഥർക്ക് ഭരണം മുന്നോട്ട് കൊണ്ടുപോകാൻ സമയം നൽകുമെന്നും അവരുടെ പ്രവർത്തനങ്ങൾ നിരീക്ഷിച്ച ശേഷം അടുത്ത നടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു. ഇറാഖിലോ അഫ്ഗാനിസ്ഥാനിലോ ഉണ്ടായതുപോലെയുള്ള സൈനിക ഇടപെടലുകൾ വെനിസ്വേലയിൽ ഉണ്ടാകില്ലെന്നാണ് സൂചന.

അതേസമയം, യു.എസ് സേനയുടെ പിടിയിലായ നിക്കോളാസ് മഡുറോയെയും ഭാര്യ സിലിയ ഫ്ലോറസിനെയും ന്യൂയോർക്കിലെത്തിച്ചു. വടക്കൻ ന്യൂയോർക്കിലെ വിമാനത്താവളത്തിൽ ഇറക്കിയ ഇവരെ പിന്നീട് കനത്ത സുരക്ഷയിൽ മാൻഹാട്ടനിലെ ഡ്രഗ് എൻഫോഴ്‌സ്‌മെന്റ് അഡ്മിനിസ്‌ട്രേഷൻ (DEA) ഓഫീസിലേക്ക് മാറ്റി. മയക്കുമരുന്ന് കടത്ത്, ഭീകരവാദം തുടങ്ങിയ കുറ്റങ്ങളാണ് ഇവർക്കെതിരെ ചുമത്തിയിട്ടുള്ളത്. തിങ്കളാഴ്ച മഡുറോയെ മാൻഹാട്ടൻ ഫെഡറൽ കോടതിയിൽ ഹാജരാക്കും.

മഡുറോയുടെ അറസ്റ്റിനെ തുടർന്ന് വെനിസ്വേലയുടെ തലസ്ഥാനമായ കാരക്കാസ് ഇപ്പോഴും നിശ്ചലാവസ്ഥയിലാണ്. നഗരത്തിലെ വ്യാപാര സ്ഥാപനങ്ങളും പെട്രോൾ പമ്പുകളും അടഞ്ഞുകിടക്കുകയാണ്. തെരുവുകളിൽ ജനസഞ്ചാരം കുറവാണെങ്കിലും പ്രധാന കേന്ദ്രങ്ങളിൽ സൈന്യത്തിന്റെയും ആയുധധാരികളായ സിവിൽ ഗ്രൂപ്പുകളുടെയും കാവലുണ്ട്. മഡുറോയെ വിട്ടയക്കണമെന്നും വൈസ് പ്രസിഡന്റ് ഡെൽസി റോഡ്രിഗസാണ് നിലവിലെ താൽക്കാലിക പ്രസിഡന്റെന്നുമാണ് വെനിസ്വേലൻ സുപ്രീം കോടതിയുടെ നിലപാട്.

maduro-arrives-in-us-after-stunning-capture-in-operation-that-trump-says-will-let-us-run-venezuela

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt