ഒട്ടാവ: കാനഡയിലെ ലോട്ടറി പ്രേമികൾക്ക് ഏറെ സുപ്രധാനമായ മാറ്റങ്ങളുമായി ലോട്ടോ മാക്സ് പുതിയ പതിപ്പിലേക്ക് മാറുന്നു. ഏപ്രിൽ പത്താം തീയതി മുതൽ പ്രാബല്യത്തിൽ വരുന്ന പുതിയ പരിഷ്കാരങ്ങൾ അനുസരിച്ച് ടിക്കറ്റ് നിരക്കിലും ഗെയിം രീതിയിലും വലിയ മാറ്റങ്ങളാണ് വരാനിരിക്കുന്നത്. നിലവിൽ അഞ്ച് ഡോളറുള്ള ടിക്കറ്റ് നിരക്ക് ആറ് ഡോളറായി ഉയരുമെങ്കിലും ഓരോ ടിക്കറ്റിലും ലഭിക്കുന്ന വരികളുടെ എണ്ണം മൂന്നിൽ നിന്നും നാലായി വർദ്ധിപ്പിച്ചിട്ടുണ്ട്. ഏപ്രിൽ പതിനാലിന് നടക്കുന്ന നറുക്കെടുപ്പ് മുതലാണ് ഈ മാറ്റങ്ങൾ ബാധകമാവുക.
ഗെയിമിലെ നമ്പറുകളുടെ എണ്ണത്തിലും മാറ്റം വരുത്തിയിട്ടുണ്ട്. ഇനി മുതൽ 50 നമ്പറുകൾക്ക് പകരം 52 നമ്പറുകളിൽ നിന്നാണ് ഏഴ് അക്കങ്ങൾ തിരഞ്ഞെടുക്കേണ്ടത്. ടിക്കറ്റ് നിരക്ക് വർദ്ധിക്കുന്നതിന് ആനുപാതികമായി ബമ്പർ സമ്മാനത്തുകയിലും വലിയ വർദ്ധനവുണ്ട്. പരമാവധി ജാക്ക്പോട്ട് തുക 80 മില്യണിൽ നിന്നും 90 മില്യൺ ഡോളറായാണ് ഉയർത്തിയിരിക്കുന്നത്. ഇതിനുപുറമെ മാക്സ് മില്യൺ മാതൃകയിൽ ഒരു ലക്ഷം ഡോളറിന്റെ കൂടുതൽ സമ്മാനങ്ങളും പുതിയ ലോട്ടോ മാക്സിൽ ഉൾപ്പെടുത്തിയിട്ടുണ്ട്.
ചെറിയ സമ്മാനങ്ങൾ ലഭിക്കാനുള്ള സാധ്യത വർദ്ധിക്കുന്നു എന്നതാണ് പുതിയ മാറ്റത്തിന്റെ പ്രധാന ആകർഷണം. മുൻപ് ഏഴ് ടിക്കറ്റിൽ ഒന്നിന് സമ്മാനം ലഭിക്കാനുള്ള സാധ്യതയുണ്ടായിരുന്ന സ്ഥാനത്ത് ഇനി മുതൽ ഓരോ 5.8 ടിക്കറ്റിലും ഒരു സമ്മാനമെങ്കിലും ഉറപ്പാക്കാം. എന്നാൽ ജാക്ക്പോട്ട് അടിക്കാനുള്ള സാധ്യതയിൽ വലിയ മാറ്റങ്ങളൊന്നുമില്ലെന്ന് വിദഗ്ദ്ധർ ചൂണ്ടിക്കാട്ടുന്നു. ടിക്കറ്റ് വില കൂടുന്നുണ്ടെങ്കിലും അധികമായി ലഭിക്കുന്ന ഒരു ലൈൻ കളിക്കാർക്ക് കൂടുതൽ ഗുണകരമാകുമെന്നാണ് വാട്ടർലൂ സർവകലാശാലയിലെ വിദഗ്ദ്ധനായ മൈക്കൽ വാലസ് അഭിപ്രായപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Lotto Max odds are about to change in Canada
