ടെസ്ല കമ്പനിയുടെ ബോർഡ് ഓഫ് ഡയറക്ടേഴ്സ് സിഇഒ ഇലോൺ മസ്കിന് പകരക്കാരനെ കണ്ടെത്താനുള്ള തിരച്ചിൽ ആരംഭിച്ചതായി റിപ്പോർട്ടുകൾ സൂചിപ്പിക്കുന്നു. ഏകദേശം ഒരു മാസം മുമ്പ് എക്സിക്യൂട്ടീവ് സെർച്ച് കമ്പനികളുമായി ബന്ധപ്പെട്ടെന്നാണ് റിപ്പോർട്ടിൽ പറയുന്നത്.എങ്കിലും ഈ പിൻഗാമിയെ കണ്ടെത്താനുള്ള ഇപ്പോഴത്തെ ശ്രമങ്ങളുടെ സ്ഥിതി വ്യക്തമായിട്ടില്ല. ഇതിനെ കുറിച്ച് ബോർഡ് അംഗമായ മസ്കിന് അറിയാമോ എന്നും വ്യക്തമല്ല.
ടെസ്ലയുടെ വിൽപ്പനയിലും ലാഭത്തിലും ഉണ്ടായ ഇടിവിന്റെ പശ്ചാത്തലത്തിലാണ് ഈ നീക്കം നടക്കുന്നത്. വിപണിയിലെ കടുത്ത മത്സരം, പ്രത്യേകിച്ച് ചൈനീസ് ഇലക്ട്രിക് വാഹന നിർമ്മാതാക്കളിൽ നിന്നുള്ള വെല്ലുവിളി കമ്പനിയുടെ പ്രകടനത്തെ സാരമായി ബാധിച്ചിട്ടുണ്ട്. കൂടാതെ, ഡിപ്പാർട്ട്മെന്റ് ഓഫ് ഗവൺമെന്റ് എഫിഷ്യൻസി (DOGE) എന്ന ട്രംപ് ഭരണകൂടത്തിലെ തന്റെ പങ്കിൽ മസ്ക് കൂടുതൽ ശ്രദ്ധ കേന്ദ്രീകരിക്കുന്നതും ഒരു കാരണമായി നിലനിൽക്കുന്നുണ്ട്.
അടുത്തിടെ, മസ്ക് തന്റെ കമ്പനികളിൽ കൂടുതൽ ശ്രദ്ധ കേന്ദ്രീകരിക്കുന്നതിനായി ട്രംപ് ഭരണകൂടത്തിലെ തന്റെ പങ്കാളിത്തം കുറയ്ക്കുമെന്ന് പറഞ്ഞിരുന്നു. എന്നിരുന്നാലും, സിഇഒ പദവിയുമായി ബന്ധപ്പെട്ട ഈ റിപ്പോർട്ടിനെക്കുറിച്ച് ടെസ്ലയോ മസ്കോ ഔദ്യോഗികമായി പ്രതികരിച്ചിട്ടില്ല. ടെസ്ലയുടെ ഭാവി ദിശയെക്കുറിച്ചും അതിന്റെ നേതൃത്വത്തെക്കുറിച്ചും വ്യാപകമായ ചർച്ചകൾക്ക് ഈ വാർത്ത വഴിയൊരുക്കിയിട്ടുണ്ട്. നിക്ഷേപകരും വിപണി വിദഗ്ധരും ഈ മാറ്റങ്ങൾ സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്.
