സ്മാർട്ട്ഫോൺ മുതൽ ഹെഡ്‍ഫോൺ വരെ; നിങ്ങളുടെ ഗാർഡ്‌ജെറ്റുകൾ വൃത്തിയാക്കാൻ എളുപ്പവഴി!

നമ്മുടെ ദൈനംദിന ജീവിതത്തിൽ സ്മാർട്ട്ഫോണുകൾ, ലാപ്ടോപ്പുകൾ, ഹെഡ്ഫോണുകൾ തുടങ്ങിയ ഇലക്ട്രോണിക് ഉപകരണങ്ങൾ ഒഴിച്ചുകൂടാനാവാത്തതാണ്. ജോലിക്കും വിനോദത്തിനുമായി ഇവയെല്ലാം നമ്മൾ നിരന്തരം ഉപയോഗിക്കാറുണ്ട്. എന്നാൽ, ഈ ഉപകരണങ്ങളുടെ സ്ഥിരമായ ഉപയോഗം അവയിൽ അഴുക്കും അണുക്കളും അടിഞ്ഞുകൂടാൻ സാധ്യതയുണ്ടാക്കുന്നു. ഈ അഴുക്കുകൾ നീക്കം ചെയ്യേണ്ടത് ഉപകരണങ്ങളുടെ ശരിയായ പ്രവർത്തനത്തിനും നമ്മുടെ ആരോഗ്യത്തിനും നിർബന്ധമാണ്. ലോകോത്തര ഇലക്ട്രോണിക്സ് നിർമ്മാതാക്കളായ ലോജിടെക് അടക്കമുള്ള കമ്പനികൾ ഉപകരണങ്ങൾ പതിവായി വൃത്തിയാക്കേണ്ടതിന്റെ പ്രാധാന്യം ഊന്നിപ്പറയുന്നു.
ഉപകരണങ്ങൾ വൃത്തിയാക്കുന്നത് അവയുടെ ഭംഗി നിലനിർത്താൻ സഹായിക്കുക മാത്രമല്ല, അവയുടെ പ്രവർത്തനക്ഷമത മെച്ചപ്പെടുത്തുകയും ആയുസ്സ് വർദ്ധിപ്പിക്കുകയും ചെയ്യും. ഉദാഹരണത്തിന്, ഇയർബഡുകൾ പോലുള്ള ഉപകരണങ്ങളിൽ അണുക്കൾ അടിഞ്ഞുകൂടുന്നത് ചെവിക്ക് അണുബാധ പോലുള്ള ആരോഗ്യപ്രശ്നങ്ങൾക്കും അസ്വസ്ഥതകൾക്കും കാരണമായേക്കാം. അതിനാൽ, ഉപകരണങ്ങൾ വൃത്തിയാക്കുന്നതിന് മുമ്പായി നിർമ്മാതാക്കളുടെ നിർദ്ദേശങ്ങൾ പാലിക്കുന്നത് വളരെ പ്രധാനമാണ്.

കീബോർഡ് വൃത്തിയാക്കാൻ:

കീബോർഡ് വൃത്തിയാക്കാൻ ആദ്യം അതിനെ കമ്പ്യൂട്ടറിൽ നിന്നോ ലാപ്ടോപ്പിൽ നിന്നോ വിച്ഛേദിക്കുക. ശേഷം കീബോർഡ് തലകീഴായി പിടിച്ച് നന്നായി കുടയുക. ഇത് വലിയ അഴുക്കുകൾ നീക്കം ചെയ്യാൻ സഹായിക്കും. കീകളുടെ ഇടയിലുള്ള പൊടി കളയാൻ കംപ്രസ്ഡ് എയർ (compressed air) ഉപയോഗിക്കാം. ഒരു മൈക്രോഫൈബർ തുണി നേരിയ അളവിൽ ഐസോപ്രോപൈൽ ആൽക്കഹോളിൽ (isopropyl alcohol) നനച്ച് കീകളുടെ മുകൾഭാഗം തുടയ്ക്കുക. തുണി അധികം നനയാതിരിക്കാൻ ശ്രദ്ധിക്കുക, കാരണം വെള്ളം കീബോർഡിനുള്ളിൽ കടക്കുന്നത് കേടുപാടുകൾ വരുത്താൻ സാധ്യതയുണ്ട്.

ഇയർഫോൺ വൃത്തിയാക്കാൻ:

ഇയർഫോണിന്റെ ഇയർടിപ്പുകൾ (ear tips) ഊരി മാറ്റാവുന്നതാണെങ്കിൽ അവ ഊരി ചെറുചൂടുവെള്ളത്തിൽ സോപ്പുപയോഗിച്ച് കഴുകി ഉണക്കുക. ഇയർഫോണിന്റെ പ്രധാന ഭാഗത്തുള്ള ഗ്രില്ലിൽ (grill) ചെളിയോ മെഴുകോ അടിഞ്ഞുകൂടിയിട്ടുണ്ടെങ്കിൽ ഒരു പല്ല് കുത്തുന്ന ഈർക്കിലി (toothpick) അല്ലെങ്കിൽ ഒരു പഴയ ടൂത്ത് ബ്രഷ് ഉപയോഗിച്ച് ശ്രദ്ധാപൂർവ്വം നീക്കം ചെയ്യുക. ഒരു കാരണവശാലും വെള്ളം ഇയർഫോണിന്റെ ഉള്ളിലേക്ക് കടക്കാതിരിക്കാൻ ശ്രദ്ധിക്കുക. തുടർന്ന് ഒരു കോട്ടൺ സ്വാബ് (cotton swab) അല്ലെങ്കിൽ മൈക്രോഫൈബർ തുണി ഉപയോഗിച്ച് തുടച്ചു വൃത്തിയാക്കുക.

സ്ക്രീൻ വൃത്തിയാക്കാൻ:

ലാപ്ടോപ്പ്, ടാബ്ലെറ്റ്, മൊബൈൽ ഫോൺ തുടങ്ങിയ ഉപകരണങ്ങളുടെ സ്ക്രീൻ വൃത്തിയാക്കാൻ പ്രത്യേകം രൂപകൽപ്പന ചെയ്ത സ്ക്രീൻ ക്ലീനിംഗ് ലോഷനുകളോ (screen cleaning solution) അല്ലെങ്കിൽ നേരിയ അളവിൽ വെള്ളം ചേർത്ത ഐസോപ്രോപൈൽ ആൽക്കഹോളോ ഉപയോഗിക്കാം. ഒരു മൈക്രോഫൈബർ തുണിയിൽ ഈ ലായനി സ്പ്രേ ചെയ്ത ശേഷം സ്ക്രീൻ മൃദുവായി തുടയ്ക്കുക. നേരിട്ട് സ്ക്രീനിലേക്ക് സ്പ്രേ ചെയ്യുന്നത് ഒഴിവാക്കുക. പേപ്പർ ടവലുകളോ പരുപരുത്ത തുണികളോ ഉപയോഗിക്കുന്നത് സ്ക്രീനിൽ പോറലുകൾ വീഴാൻ ഇടയാക്കും, അതിനാൽ അവ ഒഴിവാക്കുക. വൃത്തിയാക്കുന്നതിന് മുൻപ് ഉപകരണം ഓഫാക്കിയിട്ടുണ്ടെന്ന് ഉറപ്പാക്കുക.

ഉപകരണങ്ങൾ വൃത്തിയാക്കുമ്പോൾ എപ്പോഴും അവ ഓഫ് ചെയ്യാനും വൈദ്യുതി ബന്ധം വിച്ഛേദിക്കാനും ശ്രദ്ധിക്കുക. ഈ ലളിതമായ കാര്യങ്ങൾ ശ്രദ്ധിച്ചാൽ നിങ്ങളുടെ ഇലക്ട്രോണിക് ഉപകരണങ്ങൾ പുതിയതുപോലെ നിലനിർത്താനും ദീർഘകാലം ഉപയോഗിക്കാനും സാധിക്കും.

From smartphones to headphones; let's clean your gadgets!