മണലൂരിൽ ‘കിറ്റ്’ വിവാദം പുകയുന്നു; ടി.എൻ. പ്രതാപനെതിരെ തിരഞ്ഞെടുപ്പ് കമ്മിഷന് പരാതി നൽകാൻ ബിജെപി

തൃശൂർ: മണലൂർ നിയമസഭാ മണ്ഡലത്തിൽ വോട്ടർമാർക്ക് വിതരണം ചെയ്യാനായി കിറ്റുകൾ സൂക്ഷിച്ചെന്ന ആരോപണത്തെത്തുടർന്നുണ്ടായ നാടകീയ രംഗങ്ങളിൽ യുഡിഎഫ് സ്ഥാനാർഥി ടി.എൻ. പ്രതാപനെതിരെ ബിജെപി തിരഞ്ഞെടുപ്പ് കമ്മിഷന് പരാതി നൽകുന്നു. സിനിമാ താരവും ബിജെപി നേതാവുമായ ദേവൻ്റെ തിരഞ്ഞെടുപ്പ് പ്രചാരണം പ്രതാപൻ്റെ നേതൃത്വത്തിൽ തടസ്സപ്പെടുത്തി എന്ന് ആരോപിച്ചാണ് പരാതി. സംഭവത്തിൽ പ്രതികരണവുമായി മണലൂരിലെ എൻഡിഎ സ്ഥാനാർഥി കെ.കെ. അനീഷ് കുമാറും രംഗത്തെത്തിയിട്ടുണ്ട്. മണലൂരിൽ നടന്നത് ടി.എൻ. പ്രതാപൻ്റെ ‘പൊറാട്ടുനാടകം’ മാത്രമാണെന്നാണ് അനീഷ് കുമാറിൻ്റെ ആരോപണം.

കുറേ കൊലപാതകികളെയും ക്രിമിനൽ പശ്ചാത്തലമുള്ളവരെയും കൂട്ടിക്കൊണ്ടുവന്നാണ് കോൺഗ്രസ് ഈ നാടകം കളിച്ചതെന്ന് എൻഡിഎ സ്ഥാനാർഥി ആരോപിച്ചു. ബിജെപി പ്രവർത്തകരോ നേതാവ് ദേവനോ വോട്ടർമാർക്ക് കിറ്റ് നൽകുകയോ, വാങ്ങുകയോ ചെയ്തതായി തെളിയിക്കാൻ പൊലീസിനെയും തിരഞ്ഞെടുപ്പ് കമ്മിഷനെയും വെല്ലുവിളിക്കുന്നതായും അദ്ദേഹം വ്യക്തമാക്കി. “സൂപ്പർ മാർക്കറ്റ് ഉടമ ഒരു എസ്എൻഡിപി നേതാവാണ്. ആ നിലയ്ക്കാണ് അദ്ദേഹത്തെ കാണാൻ ദേവൻ അവിടെയെത്തിയത്. സൂപ്പർ മാർക്കറ്റിൻ്റെ ഉടമ വിഷുവിന് ലഭിച്ച ഒരു ഓർഡർ പ്രകാരമുള്ള സാധനങ്ങളാണ് ഗോഡൗണിൽ തയാറാക്കിക്കൊണ്ടിരുന്നത്. അല്ലാതെ ബിജെപി കിറ്റ് കൊടുത്തതായി എവിടെയെങ്കിലും കണ്ടെത്താൻ സാധിച്ചിട്ടുണ്ടോ? ദേവനും ഈ കിറ്റുമായി യാതൊരു ബന്ധവുമില്ല”- അനീഷ് കുമാർ വിശദീകരിച്ചു.

അതേസമയം, സംഭവവുമായി ബന്ധപ്പെട്ട് സ്ഥാപന ഉടമയെയും ഒരു പ്രാദേശിക ബിജെപി പ്രവർത്തകനെയും പൊലീസ് കസ്റ്റഡിയിലെടുത്തിട്ടുണ്ട്. പിടിയിലായ വാടാനപ്പള്ളി സ്വദേശിയായ ബിജെപി പ്രവർത്തകൻ സതീഷിനെ പൊലീസ് കൂടുതൽ ചോദ്യം ചെയ്തുവരികയാണ്. വിഷുവിനോടനുബന്ധിച്ച് ഒരു സന്നദ്ധ സംഘടനയ്ക്ക് നൽകാൻ ഓർഡർ പ്രകാരം തയാറാക്കിയതാണ് കിറ്റുകളെന്നും, അല്ലാതെ വോട്ടർമാരെ സ്വാധീനിക്കാൻ വേണ്ടി തയാറാക്കിയതല്ലെന്നുമാണ് സതീഷ് പൊലീസിന് നൽകിയിരിക്കുന്ന മൊഴി.

ബിജെപി നേതാവ് ദേവൻ ഗോഡൗണിൽ പ്രവേശിച്ചതിന് സിസിടിവി (CCTV) ദൃശ്യങ്ങൾ ലഭ്യമല്ലാത്തതിനാലാണ് അദ്ദേഹത്തെ കസ്റ്റഡിയിലെടുക്കാത്തതെന്നാണ് പൊലീസ് നൽകുന്ന വിശദീകരണം. സംഭവത്തിന് പിന്നാലെ ടി.എൻ. പ്രതാപൻ്റെ നേതൃത്വത്തിലുള്ള കോൺഗ്രസ് പ്രവർത്തകർ റോഡിൽ കുത്തിയിരുന്ന് പ്രതിഷേധിച്ചിരുന്നു. ഇതേത്തുടർന്ന് റോഡിൽ ഗതാഗതം തടസ്സപ്പെടുകയും പൊലീസ് ടി.എൻ. പ്രതാപനെ അറസ്റ്റ് ചെയ്ത് നീക്കുകയുമായിരുന്നു. വരും ദിവസങ്ങളിലും മണലൂരിൽ ഈ വിഷയം വലിയ രാഷ്ട്രീയ ചർച്ചകൾക്ക് വഴിതുറക്കുമെന്നുറപ്പാണ്.

'Kit' controversy rages in Manalur; BJP to file complaint with Election Commission against T.N. Prathapan

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt