ഇന്ത്യ-കാനഡ നയതന്ത്രബന്ധം പുനഃസ്ഥാപിക്കാനുള്ള ശ്രമങ്ങൾ നടക്കുന്നതിനിടെ ബ്രിട്ടീഷ് കൊളംബിയയിൽ ഖാലിസ്ഥാൻ വാദികൾ ‘റിപ്പബ്ലിക്ക് ഓഫ് ഖാലിസ്ഥാൻ എംബസി’ സ്ഥാപിച്ചത് പുതിയ ആശങ്കകൾക്ക് വഴിവെക്കുന്നു. കാനഡയിലെ സറേയിലുള്ള ഗുരു നാനാക്ക് സിഖ് ഗുരുദ്വാരയുടെ ഒരു ഭാഗത്താണ് ഈ പ്രതീകാത്മക എംബസി സ്ഥാപിച്ചിരിക്കുന്നത്. 2023ൽ കൊല്ലപ്പെട്ട ഖാലിസ്ഥാൻ നേതാവ് ഹർദീപ് സിംഗ് നിജ്ജർ ഈ ഗുരുദ്വാരയുടെ അധ്യക്ഷനായിരുന്നു. നിജ്ജർ വെടിയേറ്റ് കൊല്ലപ്പെട്ടത് ഈ ഗുരുദ്വാരയുടെ പാർക്കിംഗ് സ്ഥലത്തുവെച്ചാണെന്നതും ഈ സംഭവത്തിന്റെ ഗൗരവം കൂട്ടുന്നുണ്ട്.
നിജ്ജറിനെ പരസ്യമായി പിന്തുണയ്ക്കുന്ന ഈ നീക്കം, അടുത്തിടെ ഇരുരാജ്യങ്ങളും തമ്മിൽ അടുക്കാൻ നടത്തിയ ശ്രമങ്ങൾക്ക് തിരിച്ചടിയായേക്കുമെന്നാണ് വിലയിരുത്തൽ. ജി7 ഉച്ചകോടിക്കിടെ ഇന്ത്യൻ പ്രധാനമന്ത്രി നരേന്ദ്ര മോദിയും കാനഡ പ്രധാനമന്ത്രി മാർക്ക് കാർണിയും തമ്മിൽ നടന്ന കൂടിക്കാഴ്ചയോടെ ബന്ധം മെച്ചപ്പെടാൻ സാധ്യതയുണ്ടെന്ന് സൂചനകളുണ്ടായിരുന്നു.
കാനഡയിലെ തീവ്രവാദ ഗ്രൂപ്പുകൾ ഇന്ത്യക്കെതിരെ പ്രവർത്തിക്കാൻ താവളമാക്കുന്നതിനെക്കുറിച്ച് ഇന്ത്യ ദീർഘകാലമായി ആശങ്ക പ്രകടിപ്പിക്കുന്നുണ്ട്. 1985-ലെ എയർ ഇന്ത്യ ബോംബാക്രമണം മുതൽ ഈ വിഷയം ഉന്നയിക്കുന്നുണ്ട്. കാനഡയുടെ സ്വന്തം രഹസ്യാന്വേഷണ ഏജൻസിയായ സി.എസ്.ഐ.എസ്. (Canadian Security Intelligence Service) ഈയിടെയായി ഇത് സ്ഥിരീകരിക്കുന്നുണ്ട്. കാനഡയിൽ പ്രവർത്തിക്കുന്ന ഖാലിസ്ഥാൻ വാദികൾ രാജ്യത്തിന്റെ സുരക്ഷയ്ക്ക് ഭീഷണിയാണെന്ന് സി.എസ്.ഐ.എസ്. അതിന്റെ വാർഷിക റിപ്പോർട്ടിൽ ആദ്യമായി സമ്മതിച്ചിരുന്നു.
ഖാലിസ്ഥാൻ പ്രസ്ഥാനത്തെ ‘തീവ്രവാദം’ എന്ന് കനേഡിയൻ അധികൃതർ ഔദ്യോഗികമായി വിശേഷിപ്പിച്ചതും ഇതാദ്യമായാണ്. നിജ്ജറിന്റെ കൊലപാതകവുമായി ബന്ധപ്പെട്ട് നാല് പേരെ കാനഡ പോലീസ് അറസ്റ്റ് ചെയ്യുകയും കൊലപാതകം, ഗൂഢാലോചന എന്നീ കുറ്റങ്ങൾ ചുമത്തുകയും ചെയ്തിരുന്നു. ഈ അറസ്റ്റിന് പിന്നാലെയാണ് സി.എസ്.ഐ.എസ്. റിപ്പോർട്ട് പുറത്തുവന്നത്. ‘സിഖ്സ് ഫോർ ജസ്റ്റിസ്’ എന്ന നിരോധിത സംഘടന ‘ഖാലിസ്ഥാൻ റഫറണ്ടം’ സംഘടിപ്പിക്കാൻ ഒരുങ്ങുന്നതിനിടെയാണ് ഈ ‘എംബസി’യുടെ പ്രഖ്യാപനം. ഇന്ത്യൻ സുരക്ഷാ ഏജൻസികൾ ഈ സാഹചര്യം സൂക്ഷ്മമായി നിരീക്ഷിച്ചുവരികയാണെന്ന് റിപ്പോർട്ടുകൾ സൂചിപ്പിക്കുന്നു.
Khalistan ’embassy’ at Nijjar’s old stomping ground threatens India-Canada reset
