തിരുവനന്തപുരം: കേരളത്തിൽ പിഎസ്സി പരീക്ഷ എഴുതാൻ ഇനി പ്രായം ഒരു തടസ്സമാകില്ല. അപേക്ഷിക്കാനുള്ള ഉയർന്ന പ്രായപരിധി 36-ൽ നിന്നും 40 വയസ്സായി ഉയർത്താൻ സംസ്ഥാന മന്ത്രിസഭാ യോഗം തീരുമാനിച്ചു. ഏറെക്കാലമായി ഉദ്യോഗാർത്ഥികൾ ഉന്നയിക്കുന്ന ആവശ്യത്തിനാണ് ഇപ്പോൾ സർക്കാർ പച്ചക്കൊടി കാട്ടിയിരിക്കുന്നത്. അവസരം നഷ്ടപ്പെട്ടെന്ന് കരുതിയിരുന്ന പതിനായിരക്കണക്കിന് ഉദ്യോഗാർത്ഥികൾക്ക് ഈ തീരുമാനം പുത്തൻ പ്രതീക്ഷ നൽകുന്നു.
പുതുക്കിയ നിയമപ്രകാരം പൊതുവിഭാഗത്തിന് 40 വയസ്സുവരെയും ഒബിസി വിഭാഗത്തിന് 43 വയസ്സുവരെയും അപേക്ഷിക്കാവുന്നതാണ്. എസ്സി/എസ്ടി വിഭാഗത്തിൽപ്പെട്ടവർക്ക് 45 വയസ്സുവരെ പിഎസ്സി പരീക്ഷകൾ എഴുതാൻ അവസരമുണ്ടാകും. പങ്കാളിത്ത പെൻഷൻ പദ്ധതിയുടെ ഭാഗമായി ജീവനക്കാരുടെ വിരമിക്കൽ പ്രായം 60 വയസ്സായി ഉയർത്തിയെങ്കിലും അപേക്ഷിക്കാനുള്ള പ്രായപരിധി 36-ൽ തന്നെ തുടരുകയായിരുന്നു. ഈ വിവേചനം അവസാനിപ്പിക്കണമെന്ന ഉദ്യോഗാർത്ഥികളുടെ ആവശ്യം ശക്തമായതോടെയാണ് മന്ത്രിസഭയുടെ നിർണ്ണായക ഇടപെടൽ ഉണ്ടായത്. തെലങ്കാന, ആന്ധ്രാപ്രദേശ്, ഉത്തർപ്രദേശ് തുടങ്ങിയ സംസ്ഥാനങ്ങളിൽ നിലവിൽ 40 വയസ്സിന് മുകളിലാണ് പ്രായപരിധി. ഇതേ മാതൃക പിന്തുടരുന്നതോടെ കേരളത്തിലും കൂടുതൽ പേർക്ക് സർക്കാർ സർവീസിന്റെ ഭാഗമാകാൻ ഇനി വഴിയൊരുങ്ങും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Kerala PSC raises age limit to 40; Government's mega prize for lakhs of candidates
