ടെഹ്റാൻ: അമേരിക്കയും ഇസ്രയേലും സംയുക്തമായി നടത്തിയ മിസൈൽ ആക്രമണത്തിൽ തെക്കൻ ഇറാനിലെ സ്കൂൾ തകർന്ന് 36 പെൺകുട്ടികൾ കൊല്ലപ്പെട്ടു. ശനിയാഴ്ച പുലർച്ചെ തെക്കൻ ഇറാനിലെ ഹോർമോസ്ഗാൻ പ്രവിശ്യയിലുള്ള എലമെന്ററി പ്രൈമറി സ്കൂളിന് നേരെയാണ് ആക്രമണമുണ്ടായതെന്ന് ഇറാൻ ഔദ്യോഗികമായി സ്ഥിരീകരിച്ചു. കൊല്ലപ്പെട്ടവരെല്ലാം കൊച്ചു പെൺകുട്ടികളാണെന്നും സിവിലിയൻ കേന്ദ്രങ്ങളെ ലക്ഷ്യമിട്ടുള്ള ഈ നീക്കം ക്രൂരമാണെന്നും ഇറാൻ ഭരണകൂടം വ്യക്തമാക്കി.
ഇറാൻ നടത്തിയ പ്രത്യാക്രമണങ്ങളെത്തുടർന്ന് ഗൾഫ് രാജ്യങ്ങളിലും യുദ്ധഭീതി പടർന്നു. ബഹ്റൈനിലെ അമേരിക്കൻ അഞ്ചാം കപ്പൽ പടയുടെ ആസ്ഥാനത്തിന് നേരെ ഇറാൻ മിസൈൽ ആക്രമണം നടത്തി. യു.എ.ഇ തലസ്ഥാനമായ അബുദാബിയിൽ മിസൈൽ അവശിഷ്ടങ്ങൾ വീണ് ഒരു ഏഷ്യൻ വംശജൻ കൊല്ലപ്പെട്ടതായും സ്ഥിരീകരിച്ചിട്ടുണ്ട്. ഇസ്രയേൽ, ബഹ്റൈൻ, ഖത്തർ, സൗദി അറേബ്യ, കുവൈത്ത് എന്നിവിടങ്ങളിലെ അമേരിക്കൻ-ഇസ്രയേൽ സൈനിക കേന്ദ്രങ്ങൾ ലക്ഷ്യമാക്കിയാണ് ഇറാൻ തിരിച്ചടി നൽകുന്നത്.
സംഘർഷം രൂക്ഷമായതോടെ ഗൾഫ് മേഖലയിലേക്കുള്ള വിമാന സർവീസുകൾ ഭൂരിഭാഗവും തടസ്സപ്പെട്ടു. മേഖലയിലെ എല്ലാ യു.എസ്, ഇസ്രായേൽ സൈനിക ആസ്ഥാനങ്ങളും തങ്ങളുടെ ലക്ഷ്യമാണെന്ന് ഇറാനിയൻ ഉദ്യോഗസ്ഥർ മുന്നറിയിപ്പ് നൽകിയിട്ടുണ്ട്. യുദ്ധം പടരുന്ന സാഹചര്യത്തിൽ ഗൾഫ് രാജ്യങ്ങൾ ഉന്നതതല സുരക്ഷാ ജാഗ്രത പുറപ്പെടുവിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Israeli attack on girls' school in Iran; 36 children killed
