ന്യൂഡൽഹി: ഇറാനെതിരെ അമേരിക്കയും ഇസ്രായേലും സംയുക്ത സൈനിക നീക്കം ആരംഭിച്ചതോടെ ലോകം മൂന്നാം ലോകമഹായുദ്ധത്തിന്റെ നിഴലിലായി. ഇസ്രായേലിനും അമേരിക്കയ്ക്കും പിന്തുണയുമായി ബ്രിട്ടൻ, ജർമ്മനി, ഫ്രാൻസ്, കാനഡ, ഓസ്ട്രേലിയ തുടങ്ങിയ പാശ്ചാത്യ രാജ്യങ്ങൾ രംഗത്തെത്തിയതോടെ ആഗോളതലത്തിൽ വ്യക്തമായ ചേരിതിരിവ് പ്രകടമായി. ഇറാൻ നടത്തിയ പ്രത്യാക്രമണത്തിന് പിന്നാലെ ഭൂരിഭാഗം ഗൾഫ് രാജ്യങ്ങളും ഇറാനെതിരെ നിലയുറപ്പിച്ചു. മേഖലയിലെ സമാധാനം തകരുന്നതിൽ ലോകരാഷ്ട്രങ്ങൾ കടുത്ത ആശങ്ക രേഖപ്പെടുത്തി.
അതേസമയം, ഇറാനെ പിന്തുണച്ച് റഷ്യയും ചൈനയും പരസ്യമായി രംഗത്തെത്തിയത് അന്താരാഷ്ട്ര തലത്തിൽ പിരിമുറുക്കം വർദ്ധിപ്പിച്ചു. സിറിയ, ഇറാഖ്, യെമൻ, ലെബനൻ എന്നീ മധ്യപൂർവേഷ്യൻ രാജ്യങ്ങളും ഇറാന് ഐക്യദാർഢ്യം പ്രഖ്യാപിച്ചിട്ടുണ്ട്. ഗൾഫ് രാജ്യങ്ങളുടെ നിലപാടിനൊപ്പം നിൽക്കുന്ന പാകിസ്ഥാനും ഇറാനെതിരെയുള്ള ചേരിയിലാണ് നിലയുറപ്പിച്ചിരിക്കുന്നത്. വൻശക്തി രാജ്യങ്ങൾ വിഘടിച്ചു നിൽക്കുന്നത് യുദ്ധം കൂടുതൽ മേഖലകളിലേക്ക് വ്യാപിക്കാൻ കാരണമാകുമെന്ന് നിരീക്ഷകർ വിലയിരുത്തുന്നു.
ഇന്ത്യയും ജപ്പാനും വിഷയത്തിൽ സംയമനം പാലിക്കണമെന്ന നിലപാടാണ് സ്വീകരിച്ചിരിക്കുന്നത്. ഇരുവിഭാഗവും യുദ്ധത്തിൽ നിന്ന് പിന്തിരിയണമെന്നും ചർച്ചകളിലൂടെ പ്രശ്നപരിഹാരം കാണണമെന്നും ഇന്ത്യ ആഹ്വാനം ചെയ്തു. പശ്ചിമേഷ്യയിലെ സംഘർഷം ആഗോള സാമ്പത്തിക മേഖലയെയും ഇന്ത്യയുടെ വ്യാപാര താൽപ്പര്യങ്ങളെയും ബാധിക്കുമെന്നതിനാലാണ് ഇന്ത്യ സമാധാനപരമായ നീക്കങ്ങൾക്ക് മുൻഗണന നൽകുന്നത്. എണ്ണ വിലയിലുണ്ടാകുന്ന വർദ്ധനവും പ്രവാസികളുടെ സുരക്ഷയും ഇന്ത്യയെ സംബന്ധിച്ചിടത്തോളം നിർണ്ണായകമാണ്.
യുദ്ധം തുടരുന്നത് ആഗോള എണ്ണ-ആയുധ വിപണികളിലെ കച്ചവട താൽപ്പര്യങ്ങളെയും സ്വാധീനിക്കുന്നുണ്ട്. വൻശക്തികൾക്കിടയിലെ ഈ പൊട്ടിത്തെറി ലോകത്തെ മറ്റൊരു മഹായുദ്ധത്തിലേക്ക് നയിക്കുമോ എന്ന ഭീതിയിലാണ് അന്താരാഷ്ട്ര സമൂഹം. വ്യാപാരം, ഊർജ്ജ സുരക്ഷ, ആഗോള സമാധാനം എന്നിവ അപകടത്തിലായ സാഹചര്യത്തിൽ ഐക്യരാഷ്ട്രസഭ ഉൾപ്പെടെയുള്ള വേദികളിൽ നയതന്ത്ര ചർച്ചകൾ സജീവമായി നടക്കുന്നുണ്ടെങ്കിലും സംഘർഷത്തിന് അയവ് വന്നിട്ടില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Is the world heading for World War III? Western countries are lining up against Iran: Russia and China are guarding Iran! What is India’s stance?
