ഡെൽഹി: ഇന്ത്യയും പാകിസ്ഥാനും തമ്മിൽ നിലനിൽക്കുന്ന സംഘർഷങ്ങൾക്കിടെ സൗദി അറേബ്യയും പാകിസ്ഥാനും തമ്മിലുണ്ടാക്കിയ പുതിയ പ്രതിരോധ കരാർ അന്താരാഷ്ട്ര ശ്രദ്ധ നേടുകയാണ്. നാറ്റോ മാതൃകയിലുള്ള ഈ കരാർ, ഇരു രാജ്യങ്ങളിൽ ഒന്നിന് നേരെയുണ്ടാകുന്ന ആക്രമണം ഇരുവർക്കും നേരെയുണ്ടാകുന്ന ആക്രമണമായി കണക്കാക്കുമെന്ന് വ്യക്തമാക്കുന്നുണ്ട്. ഈ നീക്കം പാകിസ്ഥാൻ നയതന്ത്ര വിജയമായി കാണുമ്പോൾ, ഇന്ത്യയിലെ പ്രതിരോധ വിദഗ്ദ്ധർ സ്ഥിതിഗതികൾ സൂക്ഷ്മമായി നിരീക്ഷിക്കുകയാണ്.
പഹൽഗാം ഭീകരാക്രമണത്തിന് ഇന്ത്യ നൽകിയ തിരിച്ചടിയിൽ പാകിസ്ഥാൻ അന്താരാഷ്ട്ര തലത്തിൽ ഒറ്റപ്പെട്ട സാഹചര്യത്തിലാണ് സൗദിയുമായുള്ള ഈ കരാർ വരുന്നത്. ഈ സാഹചര്യത്തിൽ ഇന്ത്യ – പാകിസ്ഥാൻ സംഘർഷത്തിൽ സൗദി പാകിസ്ഥാനെ പിന്തുണച്ചേക്കുമോ എന്ന ആശങ്ക ഉയരുന്നുണ്ട്. എന്നാൽ, ഈ കരാർ സൗദിയെ ഇന്ത്യയുമായി നേരിട്ടുള്ള യുദ്ധത്തിലേക്ക് നയിക്കില്ലെന്നാണ് പ്രതിരോധ, ഭൗമരാഷ്ട്രീയ വിദഗ്ദ്ധർ വിലയിരുത്തുന്നത്.
നിലവിൽ, ഇസ്രായേൽ – ഹമാസ് സംഘർഷം രൂക്ഷമായ സാഹചര്യത്തിലാണ് സൗദിയുടെ ഈ നീക്കം. ഇറാൻ, ലെബനൻ, സിറിയ, യെമൻ, ഖത്തർ തുടങ്ങിയ രാജ്യങ്ങൾക്കെതിരെ ഇസ്രായേൽ നടത്തുന്ന നീക്കങ്ങൾ അറബ് രാജ്യങ്ങൾക്കിടയിൽ വലിയ ആശങ്കയുണ്ടാക്കിയിട്ടുണ്ട്. അതിനാൽ, ഇസ്രായേലിന് ശക്തമായ മുന്നറിയിപ്പ് നൽകാനും അറബ് ലോകത്ത് തങ്ങളുടെ സ്ഥാനം ഉറപ്പിക്കാനുമുള്ള സൗദിയുടെ തന്ത്രപരമായ നീക്കമായാണ് ഈ കരാറിനെ പലരും കാണുന്നത്. ദശാബ്ദങ്ങളായി നിലനിന്നിരുന്ന അനൗദ്യോഗിക പ്രതിരോധ സഹകരണം ഔദ്യോഗികമാക്കിയതിലൂടെ സൗദി പുതിയ സുരക്ഷാ സഖ്യങ്ങൾക്ക് വഴിതുറക്കുകയാണെന്നും അവർ കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Saudi-Pakistan defense deal; Is it targeting India?
