കുവൈത്ത് : കുവൈത്ത് അന്താരാഷ്ട്ര വിമാനത്താവളത്തിന് നേരെ ഇറാൻ്റെ ഭാഗത്തുനിന്നും ഡ്രോൺ ആക്രമണം ഉണ്ടായതായി കുവൈത്ത് സിവിൽ ഏവിയേഷൻ അധികൃതർ. ശനിയാഴ്ച രാത്രിയോടെ നടന്ന അപ്രതീക്ഷിത ആക്രമണത്തിൽ വിമാനത്താവളത്തിലെ ഏതാനും ജീവനക്കാർക്ക് പരിക്കേറ്റതായാണ് ഔദ്യോഗിക റിപ്പോർട്ട്. പരിക്കേറ്റവരുടെ നില ഗുരുതരമല്ലെന്ന് അധികൃതർ വ്യക്തമാക്കിയിട്ടുണ്ട്. വിമാനത്താവളത്തിൻ്റെ പ്രവർത്തനങ്ങളെ ആക്രമണം ബാധിച്ചോ എന്ന കാര്യത്തിൽ കൂടുതൽ വ്യക്തത വരേണ്ടതുണ്ട്.
കുവൈത്തിന് പുറമെ അയൽരാജ്യമായ യുഎഇയിലും സമാനമായ രീതിയിൽ സ്ഫോടന ശബ്ദങ്ങൾ കേട്ടതായി റിപ്പോർട്ടുകളുണ്ട്. ദുബായ് ഉൾപ്പെടെയുള്ള നഗരങ്ങളിൽ മിസൈൽ പ്രതിരോധ സംവിധാനങ്ങൾ പ്രവർത്തിച്ചതായാണ് സൂചന. എന്നാൽ യുഎഇയിൽ നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ല. ജനങ്ങൾ പരിഭ്രാന്തരാകേണ്ട സാഹചര്യമില്ലെന്നും അവശ്യസാധനങ്ങൾ അനാവശ്യമായി ശേഖരിച്ചു വെക്കരുതെന്നും യുഎഇ ഭരണകൂടം അറിയിച്ചു. മേഖലയിലെ സമാധാന അന്തരീക്ഷം തകർക്കുന്ന ഇത്തരം നീക്കങ്ങൾക്കെതിരെ സൗദി അറേബ്യ ശക്തമായ ഭാഷയിൽ പ്രതിഷേധം രേഖപ്പെടുത്തി.
അതേസമയം, പേർഷ്യൻ ഗൾഫ് മേഖലയിൽ നിലയുറപ്പിച്ചിരുന്ന അമേരിക്കൻ പടക്കപ്പലുകൾ പിൻവാങ്ങിയതായി ഇറാൻ മാധ്യമമായ ടെഹറാൻ ടൈംസ് അവകാശപ്പെട്ടു. അമേരിക്കൻ കപ്പലുകൾ ഒമാൻ കടലിലേക്കും ഇന്ത്യൻ മഹാസമുദ്രത്തിൻ്റെ തെക്കുകിഴക്കൻ മേഖലയിലേക്കും നീങ്ങിയതായാണ് റിപ്പോർട്ടുകൾ. പശ്ചിമേഷ്യയിൽ സംഘർഷം പടരുന്ന പശ്ചാത്തലത്തിൽ അന്താരാഷ്ട്ര സമൂഹം സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Iranian drone attack at Kuwait airport; employees injured
