പശ്ചിമേഷ്യയിൽ യുദ്ധമേഘങ്ങൾ കൂടുതൽ കടുക്കുകയാണ്. ഇറാൻ-ഇസ്രയേൽ സംഘർഷം ആറാം ആഴ്ചയിലേക്ക് കടക്കുമ്പോൾ ലോകവ്യാപാരത്തിന്റെ നിർണ്ണായക പാതയായ ഹോർമുസ് കടലിടുക്ക് തുറക്കാൻ യുഎസ് പ്രസിഡന്റ് ഡൊണാൾഡ് ട്രംപ് നൽകിയ 48 മണിക്കൂർ അന്ത്യശാസനം നാളെ അവസാനിക്കും. ഏപ്രിൽ ആറിനകം പാത തുറന്നില്ലെങ്കിൽ ഇറാൻ നേരിടേണ്ടി വരുന്നത് ‘നരകം’ ആയിരിക്കുമെന്ന ട്രംപിന്റെ മുന്നറിയിപ്പിനെ ‘യുഎസിന് സർപ്രൈസ് കാത്തിരിക്കുന്നു’ എന്ന മറുപടിയോടെയാണ് ഇറാൻ നേരിടുന്നത്. ഇതോടെ വരും ദിവസങ്ങളിൽ ആഗോള വിപണികൾ വലിയ പ്രതിസന്ധിയിലാകുമെന്ന് ഉറപ്പായി.
ഹോർമുസ് കടലിടുക്ക് അടഞ്ഞുകിടക്കുന്നത് ആഗോള എണ്ണവിപണിയെ സാരമായി ബാധിച്ചു കഴിഞ്ഞു. ബ്രെന്റ് ക്രൂഡ് ഓയിൽ വില ബാരലിന് 109 ഡോളറിലേക്ക് കുതിച്ചു കയറി. യുദ്ധം ആരംഭിച്ച ശേഷം ക്രൂഡ് ഓയിൽ വിലയിൽ 50 ശതമാനത്തോളം വർധനവാണുണ്ടായത്. എന്നാൽ ഇസ്രയേൽ, യുഎസ് ബന്ധമുള്ള കപ്പലുകൾക്ക് മാത്രമാണ് തങ്ങൾ വിലക്കേർപ്പെടുത്തിയതെന്നാണ് ഇറാന്റെ വാദം. ഇന്ത്യയുൾപ്പെടെയുള്ള രാജ്യങ്ങളിലേക്കുള്ള കപ്പലുകളെ ഇറാൻ കടത്തിവിടുന്നുണ്ട്. എങ്കിലും യുദ്ധം നീണ്ടുപോയാൽ പാചകവാതക ക്ഷാമം ഉണ്ടായേക്കാമെന്ന മുൻകരുതലിന്റെ ഭാഗമായി ഇൻഡക്ഷൻ കുക്കറുകളുടെ ഉൽപാദനം വർധിപ്പിക്കാൻ കേന്ദ്രസർക്കാർ കമ്പനികൾക്ക് നിർദ്ദേശം നൽകിയിട്ടുണ്ട്.
ഓഹരി വിപണിയെ സംബന്ധിച്ചിടത്തോളം കറുത്ത ദിനങ്ങളാണ് മുന്നിലുള്ളത്. ഇന്ത്യൻ വിപണി തുടർച്ചയായ ആറാം ആഴ്ചയും നഷ്ടത്തിലാണ് വ്യാപാരം അവസാനിപ്പിച്ചത്. തിങ്കളാഴ്ച വിപണി തുറക്കുമ്പോൾ വൻ ഇടിവുണ്ടാകുമെന്നാണ് ഗിഫ്റ്റ് നിഫ്റ്റി നൽകുന്ന സൂചനകൾ. പശ്ചിമേഷ്യൻ സംഘർഷത്തിന് പുറമെ റിസർവ് ബാങ്കിന്റെ പണനയ യോഗവും വരാനിരിക്കുന്ന നാലാം പാദ സാമ്പത്തിക ഫലങ്ങളും വിപണിയെ വരും ദിവസങ്ങളിൽ സ്വാധീനിക്കും. ഡോളർ സൂചിക കരുത്താർജ്ജിച്ചു നിൽക്കുന്നതും നിക്ഷേപകരെ ആശങ്കയിലാക്കുന്നുണ്ട്.
സ്വർണ്ണവിലയിലും വലിയ ചാഞ്ചാട്ടമാണ് പ്രകടമാകുന്നത്. അന്താരാഷ്ട്ര വിപണിയിൽ ഔൺസിന് 4,790 ഡോളർ വരെ ഉയർന്ന വില നിലവിൽ 4,676 ഡോളറിലേക്ക് താഴ്ന്നിട്ടുണ്ട്. കേരളത്തിൽ പവൻ വില 1,10,680 രൂപ എന്ന റെക്കോർഡ് നിലവാരത്തിലാണ്. യുദ്ധം കടുക്കുകയും അമേരിക്ക സൈനിക നീക്കം ശക്തമാക്കുകയും ചെയ്താൽ സ്വർണ്ണവിലയിൽ ഇനിയും വലിയ മാറ്റങ്ങൾ ഉണ്ടായേക്കാം. മേഖലയിലേക്ക് കൂടുതൽ യുദ്ധവിമാനങ്ങളും ദീർഘദൂര ക്രൂസ് മിസൈലുകളും അമേരിക്ക വിന്യസിച്ചു കഴിഞ്ഞ സാഹചര്യത്തിൽ ഏപ്രിൽ ആറിന് ശേഷം പശ്ചിമേഷ്യയിൽ എന്ത് സംഭവിക്കുമെന്നാണ് ലോകം ഉറ്റുനോക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Trump says 'hell' is not war; Iran says it's ready, oil prices will plummet, markets will plunge, gold will fall
