വാഷിങ്ടൻ: ഇറാനിൽ ജനകീയ പ്രക്ഷോഭം ആളിപ്പടരുമ്പോൾ ഭരണകൂടത്തിന് കനത്ത മുന്നറിയിപ്പുമായി യുഎസ് പ്രസിഡന്റ് ഡോണൾഡ് ട്രംപ് രംഗത്തെത്തി. സമാധാനപരമായി തെരുവിലിറങ്ങുന്ന പ്രതിഷേധക്കാർക്ക് നേരെ അക്രമമോ വെടിവയ്പോ ഉണ്ടായാൽ അമേരിക്ക ഇടപെടുമെന്ന് ട്രൂത്ത് സോഷ്യലിലൂടെ ട്രംപ് വ്യക്തമാക്കി. സാമ്പത്തിക തകർച്ചയിൽ നട്ടംതിരിയുന്ന ഇറാനിൽ സുരക്ഷാസേനയും സമരക്കാരും തമ്മിലുള്ള ഏറ്റുമുട്ടലിൽ ഇതിനോടകം ഏഴുപേർ കൊല്ലപ്പെട്ടതായാണ് രാജ്യാന്തര ഏജൻസികൾ നൽകുന്ന സൂചന. സംഘർഷത്തിൽ ഒരു പൊലീസ് ഉദ്യോഗസ്ഥൻ കൊല്ലപ്പെടുകയും നിരവധി പേർക്ക് പരുക്കേൽക്കുകയും ചെയ്തതായി ഇറാൻ അധികൃതർ സ്ഥിരീകരിച്ചിട്ടുണ്ട്. പടിഞ്ഞാറൻ ഇറാനിലെ ലോർദ്ഗൻ, മധ്യ പ്രവിശ്യയിലെ ഇസ്ഫഗാൻ എന്നീ നഗരങ്ങളിലാണ് നിലവിൽ സംഘർഷം ഏറ്റവും രൂക്ഷമായി തുടരുന്നത്.
പാശ്ചാത്യ രാജ്യങ്ങൾ ഏർപ്പെടുത്തിയ ഉപരോധം മൂലം ഇറാന്റെ കറൻസി മൂല്യം കുത്തനെ ഇടിഞ്ഞതാണ് നിലവിലെ വലിയ സാമ്പത്തിക പ്രതിസന്ധിക്ക് കാരണമായത്. ഡിസംബർ മാസത്തിൽ നാണ്യപ്പെരുപ്പം 42.5 ശതമാനത്തിലേക്ക് ഉയർന്നതോടെ ഭക്ഷണത്തിനും നിത്യോപയോഗ സാധനങ്ങൾക്കും തീവിലയായി. ആദ്യം വ്യാപാരികൾ കടകളടച്ച് തുടങ്ങിയ പ്രതിഷേധം വിദ്യാർഥികളും പൊതുജനങ്ങളും ഏറ്റെടുത്തതോടെ രാജ്യം വലിയൊരു പ്രക്ഷോഭത്തിലേക്ക് നീങ്ങുകയായിരുന്നു. കഴിഞ്ഞ വർഷം ജൂണിലുണ്ടായ ഇസ്രയേൽ ആക്രമണവും ഇറാന്റെ സാമ്പത്തിക ഭദ്രതയെ കാര്യമായി ബാധിച്ചിട്ടുണ്ട്. അതേസമയം, കുടിയേറ്റം നിയന്ത്രിക്കുന്നതിന്റെ ഭാഗമായി അമേരിക്ക ഗ്രീൻ കാർഡ് നിബന്ധനകൾ കടുപ്പിക്കുകയും ദമ്പതികളുടെ വീട്ടിൽ ഉദ്യോഗസ്ഥർ നേരിട്ടെത്തി പരിശോധന നടത്താൻ തീരുമാനിക്കുകയും ചെയ്തതായും റിപ്പോർട്ടുകളുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Iran protests: Trump says he will not stand by if there is shooting; Strong warning to the administration!
